མཁས་མང་བློ་གསལ་བྱེ་བའི་གླིང་གྲྭ་ཚང་གི་ལོ་འཁོར་ཞབས་རིམ་འགོ་འཛུགས།

༈ རང་ཅག་རྣམས་ལ་བཀའ་དྲིན་མཚུངས་ཟླ་བླ་ན་མ་མཆིས་པ་འཛམ་གླིང་ཞི་བདེའི་དེད་དཔོན་ཆེན་པོ་༧སྤྱི་ནོར་༧གོང་ས་སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་སྐུ་ཚེའི་ཞབས་རིམ་དང་། བོད་བསྟན་སྲིད་སྤྱིའི་བདེ་དོན་དང་། འཛམ་གླིང་ཞི་བདེ། གྲྭ་ཚང་གི་ཁྲི་གདན་ཟུར་རྒྱལ་སྲས་བླ་སྤྲུལ་ཁག་དང་། བཀའ་རབ་འབྱམས་དགེ་བའི་བཤེས་གཉེན་འདུས་ཚོགས་ཡོངས་དང་། གྲྭ་ཚང་གི་འབྲེལ་ཡོད་ཁག་དང་། གྲྭ་ཚང་གི་ཕྱི་ནང་ལས་དོན་ཀུན་གྱི་སླད་ལོ་ལྟར་ཞབས་རིམ་ཆེན་མོ་ཉིན་ལྔ་ཡོད་པ་ལས་༧རྒྱལ་བའི་བཀའ་འགྱུར་རིན་པོ་ཆེ་དག་སྒྲོག་དང་། སྒྲོལ་མ་འབུར་ཐེར་ཉིན་ཚོགས། གྲྭ་ཚང་གི་ཐུན་མོང་མ་ཡིན་པའི་སྲུང་མ་དཔལ་མགོན་ཞལ་བཞི། དཔལ་ལྡན་ལྷ་མོ། རྡོ་རྗེ་གྲགས་ལྡན། དམ་ཅན་ཆོས་སྐྱོང་བཅས་ཀྱི་བསྐང་བཤགས་གསོག་སྒྲུབ་སོགས་ཞབས་རིམ་སྨིན་སྒྲུབ་གནང་དང་གནང་མུས་ལྟར། དེ་རིང་གི་ཉིན་དང་པོར་འདུས་མང་གིས་དཔལ་མགོན་ཞལ་བཞི་པའི་བསྐང་བཤགས་གསོག་སྒྲུབ་གནང་། ཚོགས་དབུས་སུ་གྲྭ་ཚང་གི་སྐབས་བཅོ་ལྔ་པའི་ཕྱག་མཛོད་རྣམས་ཀྱིས་ལོ་ངོ་ཧྲིལ་པོ་གསུམ་རིང་ཕྱག་ལས་གཟེངས་སུ་ཐོན་པ་གནང་གྲུབ་སྟེ་འདུས་མང་ལ་ལྷག་མཆོད་ཀྱི་གཏོང་སྒོའི་མཆོད་པ་འབུལ་བ་དང་། གྲྭ་ཚང་གིས་ཕྱག་མཛོད་རྣམས་ལ་ཐུགས་རྗེ་ལེགས་གསོལ་ཆེད་ཕྱག་འཁྱེར་གྱི་གཟེངས་རྟགས་དེ་ཉིད་གྲྭ་ཚང་གི་ཆོས་སྲིད་གཉིས་ཀྱི་དབུ་ཁྲིད༧སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་དཔལ་བཟང་པོ་མཆོག་གིས་གནང་གྲུབ་རྗེས་གསུང་བཤད་ཀྱི་བཀའ་སློབ་ཀྱང་ཕེབས། དཔལ་ལྡན་ཁྲིམས་བདག་དགེ་བསྐོས་ལྷ་རམས་པ་བསྟན་འཛིན་བསམ་འཕེལ་ལགས་ནས་ཀྱང་ཞབས་རིམ་ཀྱི་དགོས་དམིགས་སོགས་བཀའ་སློབ་གལ་ཆེར་གནང་། དེ་ནས་འཇམ་མགོན་རྒྱལ་བའི་རྒྱལ་ཚབ་༧དགའ་ལྡན་ཁྲི་ཆེན་རྡོ་རྗེ་འཆང་༧རྗེ་བཙུན་རི་རྫོང་སྲས་ཐུབ་བསྟན་ལུང་རྟོགས་ཉི་མ་དཔལ་བཟང་པོ་མཆོག་དབུ་བཞུགས་ཐོག་མཁན་ལས་ཟུར། རྒྱལ་སྲས་བླ་སྤྲུལ་ཁག་དང་བཀའ་རབ་འབྱམས་དགེ་བའི་བཤེས་གཉེན་འདུས་མང་ཡོངས་དང་བཅས་བློ་གླིང་གྲྭ་ཚང་གི་སྤྲུལ་པའི་གཙུག་ལག་ཁང་གི་མདུན་དུ་སྐུ་པར་ལྷན་སྒྲོན་གནང་བ་བཅས་སོ།།

https://www.facebook.com/Dorjee520/videos/2303204649743760/

https://www.facebook.com/100011664431042/videos/pcb.874579016274238/874578699607603/?type=3&theater