རྗེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་དཔལ་བཟང་པོས་འཕགས་ཡུལ་གྱི་དཔལ་ན་ལེནྜ་གཉིས་པར་གྲགས་པའི་བོད་ཀྱི་གདན་ས་ཆེན་པོ་གསུམ་གྱི་ཡ་གྱལ་དཔལྡན་འབྲས་དཀར་སྤུངས་པའི་ཆོས་སྡེ་ཆེན་པོ་འདི་ཉིད་ཕྱག་བཏབ་ནས་མི་ལོ་ཧྲིལ་པོ་༦༠༠ འཁོར་བའི་དུས་དྲན་གྱི་མཚོན་ཕུད་དམ་བཅའ་གཉིས་པ་དཔལ་ལྡན་བློ་གསལ་གླིང་ནང་ཚོགས་ཡོད།

འཇམ་མགོན་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་དངོས་སློབ་འཕྲིན་ལས་ནམ་མཁའ་དང་མཉམ་པའི་བུ་ཆེན་བཞིའི་ཡ་གྱལ་༧རྗེ་འཇམ་དབྱངས་ཆོས་རྗེ་བཀྲིས་དཔལ་ལྡན་པ་ཆེན་པོ་གང་ཉིད་ཀྱིས་དཔལ་ན་ལེནྜ་གཉིས་པ་ཞེས་སྲིད་པ་གསུམ་ན་སྙན་པའི་གྲགས་པ་བླ་ན་འབར་བའི་ཆོས་སྡེ་ཆེན་པོ་དཔལ་ལྡན་འབྲས་དཀར་སྤུངས་པའི་སློབ་གཉེར་གྱི་གདན་ས་ཆེན་མོ་འདི་ཉིད་ཕྱག་བཏབ་ནས་མི་ལོ་༦༠༠ཧྲིལ་པོ་འཁོར་བའི་བཀའ་དྲིན་རྗེས་དྲན་གྱི་ཚུལ་དུ་གྲྭ་ཚང་ཤར་ནུབ་གཉིས་ཟུང་འབྲེལ་གྱིས་བགྲོ་གླེང་དང་བྱེད་སྒོ་སྣ་ཚོགས་ཤིག་གོ་སྒྲིག་ཡོད་པའི་ཆ་ཤས། དེ་རིང་རེས་གཟའ་ཉི་མའི་དགོང་དྲོར་དཔལ་ལྡན་མཁས་མང་བློ་གསལ་བྱེ་བའི་གསལ་གླིང་གྲྭ་ཚང་གི་ཆོས་རྭའི་ནང་འབྲས་སྤུངས་ཁྲི་པ་རིན་པོ་ཆེ་དབུས་པའི་གྲྭ་ཚང་ཤར་ནུབ་གཉིས་ཀྱི་མཁན་ལས་ཟུར། བཀའ་རབ་འབྱམས་དགེ་བའི་བཤེས་གཉེན། རྒྱལ་སྲས་བླ་སྤྲུལ་ཁག་འཕགས་ཚོགས་འདུས་པ་རྒྱ་མཚོ་བཅས་གདན་འཛོམས་པའི་ཐོག དཔལ་ལྡན་སྒོ་མང་གྲྭ་ཚང་གི་འདི་ལོའི་དགེ་བའི་བཤེས་ལྷ་རམས་པ་རྣམས་དམ་བཅའ་བཞུགས་ཏེ། དཔལ་ལྡན་མཁས་མང་བློ་གསལ་བྱེ་བའི་གསལ་གླིང་གྲྭ་ཚང་གི་སློབ་གཉེར་བ་ཚོས་གཞུང་ཆེན་དབུ་ཕར་གཉིས་དང་། ཚད་མ་རྣམ་འགྲེལ་བཅས་ལ་རིགས་པའི་ལམ་ནས་རྟགས་བསལ་བཏང་སྟེ་མཚན་ཕུད་དམ་བཅའ་ལེགས་པར་གྲུབ་ཡོད།