༄༅།།ཕྱི་ལོ་༢༠༡༩།༠༤།༡༡ཉིན་དགོང་དྲོ་ བློ་གསལ་གླིང་གྲྭ་ཚང་ནས་༧གོང་ས་སྐྱབས་མགོན་ཆེན་པོ་མཆོག་གི་སྐུའི་ཞབས་རིམ་སྒྲུབ་པ།
༄༅། །རང་ཅག་བོད་གངས་ཅན་པའི་བསྟན་སྲིད་མི་རིགས་བཅས་ཀྱི་བདེ་རྩ་དང་། འཇིག་རྟེན་ཞི་བདེའི་མགོན་སྐྱབས་དཔུང་གཉེན་བླ་ན་མ་མཆིས་པ། ༧སྤྱི་ནོར་༧གོང་ས་སྐྱབས་མགོན་རྒྱལ་བའི་དབང་པོ་ཐབས་ཅད་མཁྱེན་ཅིང་གཟིགས་པ་ཆེན་པོ་མཆོག་སྐུ་ཁམས་སྙུང་བཞེས་ཚུལ་བསྟན་གྱི་སྐུ་གེགས་མཚན་མ་ཅི་མཆིས་རྨེག་མེད་དུ་ཞི་བའི་སླད་དུ་འདི་ཟླའི་ཕྱི་ཚེས་ ༡༠ ཉིན་འབྲས་བློ་གླིང་སྤྲུལ་སྐུ་ལྷན་ཚོགས་ནས་ཞབས་རིམ་སྨན་བླ་མདོ་ཆོག་དང་སྨན་གཟུངས་གང་མང་གནད་སྨིན་འབད་སྒྲུབ་ཞུ་ཟིན་པ་དང་། དེ་རི་ཕྱི་ཚེས་༡༡ ནས་ཉིན་གསུམ་རིང་མགོན་ཁང་དུ་དགེ་བཤེས་རྣམས་ཀྱིས་སྲུང་མ་དམར་ནག་གཉིས་ཀྱི་བསྐང་བཤགས་གསོག་སྒྲུབ་གནང་བ་དང་། གྲྭ་ཚང་གི་མཁན་བླ་འདུས་མང་ཡོངས་ནས་དགོང་དྲོའི་སྐུ་རིམ་དང་ཞོགས་པ་གྲྭ་ཇ་བཅས་ཀྱི་སྐབས་ཞབས་རིམ་དཔལ་ནཱ་ལེཎྜའི་པཎ་གྲུབ་བཅུ་བདུན་གྱི་གསོལ་འདེབས་གང་མང་དང་། ༧རྒྱལ་བའི་ཞབས་བརྟན་གསོལ་འདེབས་གང་མང་། འཕགས་པ་ཐུགས་རྗེ་ཆེན་པོའི་བསྟོད་པ་གང་མང་། འཕགས་མཆོག་སྤྱན་རས་གཟིགས་ཞི་དྲག་གི་གཟུངས་སྔགས་གང་མང་། བཅོལ་ལྡན་སྨན་བླའི་གཟུངས་སྔགས་གང་མང་། སྒྲོལ་མ་དང་གདུགས་དཀར་གང་མང་། ཤེས་རབ་སྙིང་པོ་གང་མང་གསོག་བཞིན་པ།
