༄༅། །ཕྱི་ལོ་༢༠༡༩ ལོའི་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོའི་གྲུབ་འབྲས་ཤོག་ལྷེབ་ཐོབ་སྐལ་འབུལ་བ།
༄༅། །ཕྱི་ལོ་༢༠༡༩ ལོའི་ཆོས་སྡེ་ཆེན་པོ་དཔལ་ནཱལནྡཱགཉིས་པ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོའི་ཟུར་རྒྱུགས་དང་། གྲྭ་ཚང་གི་སློབ་གཉེར་རྣམས་ཀྱིས་རྒྱུགས་སྤྲོད་ཆེན་མོ་བཅས་ལེགས་པར་གྲུབ་ནས་གྲུབ་འབྲས་ཤོག་ལྷེབ་ཐོབ་སྐལ་འབུལ་བ།
བོད་རྒྱལ་ལོ་༢༡༤༦ཟླ་བ་༡༠ཚེས༢༤ཉིན་དྲང་ངེས་ལེགས་བཤད་སྙིང་པོ་དང་།གཞུང་ཆེན་བཀའ་པོད་ལྔའི་རྩ་བ།པཎ་ཆེན་ཕར་ཕྱིན་དང་མཐའ་དཔྱོད།སྤྱོད་འཇུག་ཆེན་མོ།དབུ་མ་རིགས་ཚོགས་དྲུག།རྒྱན་རྣམ་ལྔ་སོགས་བློ་རྒྱུགས་འབུལ་མཁན་རྣམས་ཀྱི་རྒྱུགས་བཞེས་གནང་བ་དང་།
ཕྱི་ལོ་༢༠༡༩ལོའི་ཟླ་༡༠ཚེས་༢༧ཉིན་གྱི་དགོང་མོར་ཆོས་སྡེ་ཆེན་མོ་དཔལ་ན་ལེནྡྲ་གཉིས་པ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་འདི་ལོའི་ལོ་འཁོར་རྒྱུགས་སྤྲོད་ཆེན་མོ་འབུལ་མཁན་རྣམས་ཨང་རིམ་ལྟར་བྱ་དགའ་གཟེངས་བསྟོད་བཅས་འབུལ།
དབུ་བཞུགས་གྲྭ་ཚང་རིན་པོ་ཆེའི་ཆོས་སྲིད་གཉིས་ཀྱི་དབུ་ཁྲིད་༧སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག་དང་།བླ་མ་གཞུང་ལེན་པ་དགེ་བཤེས་ཡེ་ཤེས་ཆོས་འཕེལ་མཆོག།དཔལ་ལྡན་ཁྲིམས་བདག་དགེ་བསྐོས་དགེ་བཤེས་བྱང་ཆུབ་ངག་དབང་མཆོག་དབུས་དབུ་ཆོས་གསུམ་དང་།ཕྱག་མཛོད་ཁྲི་པ་དགེ་བཤེས་བློ་བཟང་ཟླ་བ་གཙོས་ཕྱོགས་བཞུགས་ཕྱག་མཛོད་རྣམ་པ།རྒྱུགས་སྤྲོད་ཚོགས་ཆུང་གི་རྒྱུན་ལས་པ་རྣམ་པ།བཀའ་རབ་འབྱམས་དགེ་བའི་བཤེས་གཉེན་འདུས་ཚོགས་ཆེན་མོའི་དབུས་སུ་ཐོག་མར་སྐྱབས་རྗེ་མཁན་རིན་པོ་ཆེས་བཀའ་སློབ་གསུང་བཤད་དང་།དེ་ནས་རྒྱུགས་སྤྲོད་ཚོགས་ཆུང་གི་འགན་འཛིན་གཞོན་པ་དགེ་བཤེས་དགེ་འདུན་ཆོས་འཕེལ་མཆོག་གིས་རྒྱུགས་སྤྲོད་ཀྱི་སྐོར་དང་ཐུགས་རྗེ་ཆེ་ཞུའི་གསུང་བཤད་གནང་།
སློབ་གཉེར་བ་རྟགས་རིགས་འཛིན་གྲྭ་ནས་མཛོད་གཉིས་པའི་བར་འཛིན་གྲྭ་བཅུ་དྲུག་ཡོད་པ་རྣམས་ཀྱི་འཛིན་གྲྭ་རེ་རེའི་རྩེ་ཕུད་དང་གཉིས་གསུམ་དང་།ཨང་དང་གཉིས་གསུམ་གང་ཡོད་པ་རྣམས་ལ་བྱ་དགའ་གཟེངས་བསྟོད་དང་།རྒྱུགས་སྤྲོད་ཚོགས་ཆུང་གི་ཚོགས་གཙོས་རིམ་བཞིན་རྒྱུགས་ཞུགས་པ་ཀུན་རེ་རེ་བཞིན་མཚན་ནས་འབོད་དེ་བློ་རྒྱུགས་དང་རྩོད་རྒྱུགས།བྲིས་རྒྱུགས་བཅས་ཨང་ཇི་ཐོབ་ཁ་གསལ་བཀླགས་ཏེ་རང་ཉིད་གྲུབ་འབྲས་ཤོག་ལྷེབ་བཞེས་སར་ཕེབས་ནས་༧སྐྱབས་རྗེ་མཁན་རིན་པོ་ཆེ་མཆོག་གིས་མཇལ་དར་དང་གཟེངས་བསྟོད་ཕྱག་ཁྱེར་བཅས་གནང་།
བྲིས་རྒྱུགས་ལ་ཀ་སྡེ་དང་ཁ་སྡེ་གཉིས་ལས་ཀ་སྡེ་ནི་རྟགས་རིགས་འཛིན་གྲྭ་ནས་མཛོད་བར་གཞུང་ཚན་སོ་སོའི་དྲི་བ་ལ་ལན་འདེབས་དགོས་པ་དང་།ཁ་སྡེ་ལ་རྟགས་རིགས་འཛིན་གྲྭ་ནས་ཕར་ཕྱིན་སྐབས་ལྔ་པའི་བར་དག་ཡིག་དང་།སུམ་ཅུ་པ།རྟགས་འཇུག།ཆོས་འབྱུང་།སྙན་ངག།བྱང་ཆུབ་སེམས་དཔའ་རྟག་ཏུ་ངུ་དང་།བྱང་ཆུབ་སེམས་དཔའ་གྲགས་པ་བྱང་ཆུབ་ཀྱི་རྟོགས་བརྗོད་སོགས་འཛིན་གྲྭ་སོ་སོར་གང་འཁེལ་བ་རྣམས་རྒྱུགས་སྤྲོད་འབུལ་ལམ་ཞུས་ཡོད།ད་ལོར་རྒྱུགས་འབུལ་མཁན་སློབ་གཉེར་བ་ཡོངས་ཞལ་གྲངས་༡༤༥༠ཆིག་སྟོང་བཞི་བརྒྱ་ལྔ་བཅུ་ཙམ་ཡོད།
དེ་རིང་ནི་སློབ་གཉེར་བ་སོ་སོས་ལོ་གཅིག་གི་རིང་ཚོགས་དང་ཆོས་ར་འགྲིམས། བསླབ་པ་སློབ་གཉེར་བྱས། གཞུང་ཆེན་ཁག་ལ་བརྩོན་ནས་ནམ་སྔ་ལངས་དང་ནུབ་ཕྱི་ཉལ་བྱས། སྙིང་ལ་རུས་པ་བསྐྱེད། འབད་པ་རྡོ་རུས་ཐུག་པ་བྱས་པའི་འབྲས་གྲུབ་འབྲས་གང་འདྲ་ཐོབ་ཡོད་མེད་ཀྱི་དུས་ཚིགས་ཁྱད་པར་ཅན་ཞིག་ཀྱང་ཡིན་ནོོ།།
