འབྲས་སྤུངས་བློ་གསལ་གླིང་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོ་དབུ་འཛུགས།
 |
| བློ་རྒྱུགས་ལེན་མཁན་དཔེ་ཁྲིད་དགེ་རྒན་དང་དགེ་བཤེས་རྣམ་པ། དགེ་བཤེས་ལས་ཐོག་བཅས། |
བཙན་བྱོལ་ནང་གི་ཆོས་སྡེ་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་འདི་ལོའི་ལོ་འཁོར་རྒྱུགས་སྤྲོད་ཆེན་མོ། བོད་རྒྱལ་ལོ་ ༢༡༤༣ ཟླ་ ༦ ཚེས་ ༡༦ དང་། ཕྱི་ལོ་ ༢༠༡༦ ཟླ་ ༨ ཚེས་ ༡༩ རེས་གཟའ་པ་སངས་ཉིན་དབུ་འཛུགས་གནང་ཡོད་ཅིང་།
དེ་ཡང་སྔར་རྒྱུན་བཞིན་འདི་ལོའི་ལོ་འཁོར་རྒྱུགས་སྤྲོད་དུ་དངོས་སུ་ཞུགས་དགོས་པའི་སློབ་གཉེར་བ་ཉམ་ཐག་ནད་པ་དང་གྲྭ་ཚང་གི་ལས་སྣེ་འཁེལ་བ་འགའ་རེ་མ་གཏོགས་སློབ་གཉེར་བ་(༡༨༢༠)ལོ་འཁོར་རྒྱུགས་སྤྲོད་དུ་ཞུགས་ཡོད། རྒྱུགས་སྤྲོད་དངོས་གཞིའི་སྐབས་སུ། དང་པོར་བློ་འཛིན་ནམ་གཞུང་ཆེན་ཁག་གི་རྩ་འགྲེལ་སྐྱོར་རྒྱུགས་ཉིན་གསུམ་གྱི་རིང་ལ། དཔེ་ཁྲིད་དགེ་རྒན་དང་དགེ་བཤེས་རྣམ་པ། དགེ་བཤེས་ལས་ཐོག་པ་དང་འཛིན་དང་པོའི་འཛིན་གྲྭ་བཅས་ནས་ལེན་རྒྱུ་ཡིན་པ་དང་། རེས་གཟའ་མིག་དམར་ནས་ཞོགས་པ་གང་ཡིན་ལ་འཛིན་གྲྭ་སོ་སོའི་ཀ་སྡེ་སློབ་ཚན་རྩོད་གཞུང་ཁག་གི་བྲིས་རྒྱུགས་དང་། ཁ་སྡེ་སུམ་རྟགས་རྩ་འགྲེལ་དང་དག་ཡིག་ངག་སྒྲོན། ཡི་གེའི་བཤད་པ་མཁས་པའི་ཁ་རྒྱན། རྒྱལ་རབས་ཆོས་འབྱུང་། སྙན་ངག་དང་རྟོགས་བརྗོད་བཅས་བྲིས་རྒྱུགས་ཁག་ལེན་རྒྱུ་དང་ཉིན་རྒྱབ་ཏུ་རྩོད་རྒྱུགས་ལེན་གཏན་འཁེལ་འདུག བྲིས་རྒྱུགས་ཆ་ཚང་ཚར་བ་དང་ཞོགས་པ་དང་ཉིན་གུང་། དགོང་མོ་བཅས་སུ་རྩོད་རྒྱུགས་གཏན་འཁེལ་བྱས་ཡོད། སྔར་རྒྱུན་བཞིན་འདི་ལོ་ཡང་རྩོད་རྒྱུགས་ཁག་བརྒྱད་དུ་ཆ་བགོས་ཀྱིས་གཙོ་བོར་དཔེ་ཁྲིད་དགེ་རྒན་དང་དགེ་བཤེས་ལྷ་རམས་པ། དེ་བཞིན་དགེ་ལུགས་རྒྱུགས་སྤྲོད་དུ་ཕེབས་མཁན་ལྷ་རམས་མཐའ་མའི་འཛིན་གྲྭ་ལས་ཁག་ཅིག་སྟེ། ཁྱོན་བསྡོམས་རྩོད་རྒྱུགས་ཀྱི་ཨང་ཀི་སྤྲོད་མཁན་ཞལ་གྲངས་(༣༢)བསྐོ་གཞག་བྱས་ཡོད་པར་མ་ཟད་། སྐྱོར་རྒྱུགས་དང་། བྲིས་རྒྱུགས། རྩོད་རྒྱུགས་བཅས་ཀྱི་དུས་ཡུན་རིང་ལྟ་རྟོག་བྱེད་མཁན་འདི་ལོའི་རྒྱུགས་ཞིབ་ལྷན་ཁང་གི་རྒྱུན་ལས་རྣམ་པ་དང་། དགེ་བསྐོས་དང་ཆབ་རིལ། གྲྭ་ཚང་གི་ཁང་ཚན་ཉེར་ལྔའི་ཁང་རྒན་རྣམས་ཀྱང་ངེས་པར་དུ་ལྟ་རྟོག་དགོས་པ་ནི་སྔ་སྲོལ་བཞིན་གནས་པར་བྱས་ཡོད། དེ་བཞིན་དུ་འཛིན་སྐྱོང་ཕྱག་མཛོད་ཁང་དང་རྒྱུགས་སྤྲོད་ཚོགས་ཆུང་ནས་རྒྱུགས་སྤྲོད་སྐབས་སུ་འགྲོ་གྲོན་ཅི་དགོས་ཀྱི་ཐད་ལ་དགོས་མཁོ་དང་འཚམ་པའི་མཉམ་རུབ་གནང་བ་སོགས། མདོར་ན་གྲྭ་ཚང་གི་སྐྱབས་རྗེ་མཁན་རིན་པོ་ཆེ་ནས་རྟགས་རིག་འཛིན་གྲྭའི་བར་ཀྱི་དགེ་འདུན་པ་ཚོས་རྒྱུགས་སྤྲོད་ལ་ལུས་ངག་ཡིད་གསུམ་གྱིས་རང་འགན་རང་ཁུར་གྱིས་ཞབས་འདེབས་ཞུ་བཞིན་པ་བཅས་ཀྱིས་ཚ་ཚ་འུར་འུར་དུ་འདི་ལོའི་ལོ་འཁོར་རྒྱུགས་སྤྲོད་དབུ་འཛུགས་གནང་བཞིན་ཡོད།།
