གདན་ས་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་མཁས་པའི་དབང་ཕྱུག་རྗེ་བཙུན་བློ་བཟང་རྒྱ་མཚོ་དཔལ་བཟང་པོ་མཆོག་དགོངས་པ་ཆོས་དབྱིངས་སུ་ཞི་བར་གཤེགས་པར།
༼ མྱ་ངན་ཞུ་འཕྲིན ༽
ཕྱི་ལོ་༢༠༡༦ ཟླ་བ་༠༩ ཚེས་༡༩ རེས་གཟའ་ཟླ་བའི་ཉིན། གདན་ས་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་མཁས་པའི་དབང་ཕྱུག་རྗེ་བཙུན་བློ་བཟང་རྒྱ་མཚོ་དཔལ་བཟང་པོ་མཆོག་དགོངས་པ་ཆོས་དབྱིངས་སུ་ཞི་བར་གཤེགས་པར་འབྲས་བློ་གླིང་གྲྭ་ཚང་གི་འདུས་མང་སྤྱི་དང་། གང་ཉིད་ཀྱི་སློབ་བུའི་ཚོགས་བཅས་ལ་གྱོང་གུད་གསུབ་ཏུ་མེད་པ་གཅིག་བྱུང་བར་བློ་ཕམ་ཚད་མེད་སྐྱེ་གཞིར་གྱུར་ཅིང་། སྐྱབས་རྗེ་བདེ་བར་གཤེགས་པ་མཁན་ཟུར་རིན་པོ་ཆེས་གྲྭ་ཚང་འདི་ཉིད་ལ་བསྐྱངས་བའི་བཀའ་དྲིན་གཞལ་དཀའ་བ་རྣམས་འདུས་མང་ཡོངས་ཀྱིས་སྙིང་ལ་བཅངས་ཏེ་མཁན་ཟུར་རིན་པོ་ཆེའི་ཐུགས་དགོངས་ཟབ་མོ་ཡོངས་སུ་རྫོགས་ཤིང་། སླར་ཡང་བསྟན་འགྲོའི་མགོན་དཔུང་དམ་པ་གྱུར་པར་མི་དང་མི་མིན་སོགས་ཀྱི་བར་ཆད་ཅི་མཆོས་དམིགས་མེད་དུ་ཞི་བར་མཆོག་གསུམ་གསོལ་འདེབས་ཐུགས་སྨོན་མཚམས་སྦྱོར་བཅས།
འབྲས་སྤུངས་བློ་གསལ་གླིང་གྲྭ་ཚང་ནས་ཕྱི་ལོ་ ༢༠༡༦ ཟླ་བ་ ༠༩ ཚེས་ ༢༠ ཉིན།
