༄༅། །ཕྱི་ལོ་ ༢༠༡༩  ལོའི་ཆོས་སྡེ་ཆེན་མོ་དཔལ་ན་ལེནྡྲ་གཉིས་པ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གིས་གཡང་སྒྲུབ་འཚོགས་པ།

https://www.youtube.com/watch?v=gkDccW4bcko

བོད་རྒྱལ་ལོ་༢༡༤༦ ཟླ་བ་ ༩ ཚེས ༥ དང་༦ ། ཕྱི་ལོ་༢༠༡༩ ལོའི་ཟླ་ ༡༡ ཚེས་༡ དང ༢ རེས་གཟའ་པ་སངས་དང་སྤེན་པ་ཉིན་གཉིས་རིང་འབྲས་བློ་གླིང་གཙུག་ལག་ཁང་གི་མགོན་ཁང་གསར་པའི་ནང་དམ་ཚིག་གི་མགོན་པོ་དྲག་པོ་གཟི་ལྡན་དབང་ཕྱུག་གམ་སྟོབས་འཕྲོག་ནག་པོ་ཆེན་པོ་དཔལ་མགོན་ཞལ་བཞི་པ་ཆེན་པོ་དང་།  མགོན་དཀར་ཡིད་བཞིན་འཁོར་ལོ།རྒྱལ་པོ་ཆེན་པོ་རྣམ་སྲས་ཀྱི་གཡང་སྒྲུབ་བཅས་འཚོགས་ཡོད།གཡང་སྒྲུབ་ཀྱི་ཚོགས་མགོན་དུ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་བརྒྱ་དང་གཉིས་པ་རི་རྫོང་སྲས་རིན་པོ་ཆེ་མཆོག་དང་།བློ་གླིང་མཁན་ཟུར་རིན་པོ་ཆེ་རྗེ་བཙུན་དཀོན་མཆོག་དཔག་བསམ་མཆོག།རྒྱུད་སྨད་མཁན་ཟུར་རིན་པོ་ཆེ་རྗེ་བཙུན་མཐུ་སྟོབས་མགོན་པོ་མཆོག།ཚ་བ་ལྷ་ལྡིང་རིན་པོ་ཆེ།སྤོམ་ར་ཟངས་འབུམ་རིན་པོ་ཆེ།ཏྲེ་ཧོར་ཀེའུ་ཚང་རིན་པོ་ཆེ།ཉག་རེ་ཆུང་ཚང་རིན་པོ་ཆེ།ཕ་ར་གྲ་སྨད་རིན་པོ་ཆེ།རོང་པོ་མགར་དགེ་རིན་པོ་ཆེ།ཕ་ར་ཤག་སྐོར་མཁན་སྤྲུལ་རིན་པོ་ཆེ།ཕུ་ཁང་དབུ་ཟུར་དགེ་བཤེས་བློ་བཟང་ལྷུན་འགྲུབ།ཏྲེ་ཧོར་དགེ་བཤེས་བསྟན་འཛིན་དགེ་ལེགས།ཀོང་པོ་དགེ་བཤེས་ཆོས་རྒྱལ།ལྡན་མ་དགེ་བཤེས་བསོད་ནམས་ཟླ་གྲགས།ཏྲེ་ཧོར་དགེ་བཤེས་ཀརྨ་དབུས་རྒྱལ་སྲས་བླ་སྤྲུལ་ཁག་དང་།བཀའ་རབ་འབྱམས་དགེ་བའི་བཤེས་གཉེན་བཞི་བཅུ་ལྷག་གིས་གཡང་སྒྲུབ་ཀྱི་ཆོ་ག་དང་འབྲེལ་བའི་གཡང་འབོད་དང་གཡང་བུམ་སོགས་བསྒྲུབས་གནང་མཛད་ཡོད།འདི་ནི་གཙོ་བོ་ཕྱག་མཛོད་ཀྱིས་འགན་འཁུར་བའི་ཐོག་གོ་སྒྲིག་དང་ཡོན་སྦྱར་གྱི་ཡོད་ཅིང་།གྲྭ་ཚང་གིས་ལོ་རེ་བཞིན་འཚོགས་དང་ཚོགས་མུས་བཅས་ཡིན།

  གཡང་སྒྲུབ་ཀྱི་ཆོ་ག་བྱེད་སྲོལ་འདི་ཡང་བོད་ཀྱི་ས་ཁུལ་དུ་ཕྱྭ་གཡང་གི་རིག་གནས་དར་སྤེལ་ཤུགས་ཆེན་ཕྱིན་ནས་སྟོན་པ་ཤཱཀྱ་ཐུབ་པས་ལྷའི་བུ་ནོར་བུ་ལྷ་ལ་གནང་བའི་ནོར་ལྷ་གཡང་སྐྱབས་སོགས་གཞུང་ཆེན་ཁག་ནང་འཁོད་པའི་རིགས་དང་།བོད་ཀྱི་ས་དགེ་བཀའ་རྙིང་བོན་དང་བཅས་རིས་སུ་མ་ཆད་པའི་གྲུབ་མཐའ་ཚང་མར་སོ་སོའི་ལུགས་དང་མཐུན་པའི་གཡང་སྒྲུབ་བྱེད་སྲོལ་སྣ་ཚོགས་དར་ཡོད།ད་དུང་གསེར་འོད་གཡང་སྐྱབས་དང་།བཀྲ་ཤིས་གཡང་འབོད་སོགས་བྱེད་སྲོལ་དང་།

དེ་བཞིན་ནོར་ལྷར་ངོས་འཛིན་པའི་ལེགས་ལྡན་ནག་པོ། སྒྲོལ་མ། ནོར་རྒྱུན་ལྷ་མོ་དང་། རྣམ་སྲས། གནོད་སྦྱིན་ཛམ་བྷ་ལ་སོགས་ཀྱི་སྒྲུབ་ཐབས་དང་མཆོད་སྟངས་མང་པོ་ཡོད་ལ་སྤྱིར་བཏང་གི་བསངས་མཆོད་སོགས་ཀྱི་ནང་དུའང་གཡང་འགུགས་ཀྱི་ནང་དོན་མང་པོ་ཡོད།  ཕྱྭ་གཡང་ངམ་གཡང་འབོད་དང་གཡང་འགུགས་ཀྱི་ཆོ་ག་བྱེད་དགོས་པའི་རྒྱུ་མཚན་ནི་ཆོས་གཡང་། ལྷ་གཡང་། མི་གཡང་། རྒྱུ་དངོས་དང་ཟས་ནོར། བསོད་ནམས་དང་ལོངས་སྤྱོད། དཔལ་འབྱོར། རིགས་རྒྱུད། ལོ་ཏོག །ཕྱུགས་རིགས་སོགས་གང་ལ་ཡང་ཁྱབ་པས་ཚེ་རིང་པོ་འདོད་པ་རྣམས་ལ་ཚེ་གཡང་དང་། བསོད་ནམས་ཅན་ལ་ནོར་གཡང་། སྙན་གྲགས་ཅན་ལ་གྲགས་གཡང་། རིགས་རྒྱུད་འཕེལ་བར་བུ་ཡི་གཡང་སོགས་མདོར་ན་འཇིག་རྟེན་འདིའི་ལེགས་པའི་ཕྱོགས་ཐམས་ཅད་ཚང་མ་ལ་གཡང་དུ་ངོས་འཛིན་གྱིས་དེ་ཐམས་ཅད་ཆོ་གར་བརྟེན་ནས་ཚུར་འགུགས་ཐབས་བྱེད་པ་ལ་ཕྱྭ་གཡང་འགུགས་པ་ཞེས་འབོད་ཀྱི་ཡོད།

བོད་ཀྱི་དགོན་སྡེ་དང་ཁྱིམ་ཚང་ཁག་གི་དམིགས་བསལ་གྱི་དངོས་པོ་རེ་གཉིས་རྩ་བ་ཆེན་པོས་ཉར་ཚགས་བྱས་ཏེ་གཡང་རྟེན་བྱེད་ཀྱི་ཡོད། དངོས་པོ་དེ་དག་ནི་ཡིན་གཅིག་རིན་ཐང་ཆེ་བའི་དངོས་པོ་ཡིན་པའི་ངེས་པ་མེད་པར་ཡོང་ཁུངས་ལ་བལྟོས་ནས་རྩ་ཆེའི་རིན་ཐང་མངོན་གྱི་ཡོད། དེ་ཡང་དངོས་པོ་དེ་དག་ནི་ནོར་ལྷའི་དངོས་གྲུབ་ལས་བྱུང་བར་གྲགས་པ་སོགས་ཁག་གཅིག་ཕུད། སྔོན་བྱོན་གྱི་སྐྱེས་བུ་དམ་པ་དང་ཡང་ན་ཁྱིམ་ཚང་སྒེར་ཡིན་ཕྱིན་མི་རྒྱུད་ཀྱི་ཚེ་རིང་བ་དང་བསོད་ནམས་སྙན་གྲགས་ཅན་གྱི་མེས་པོས་སྤྱོད་མྱོང་བའི་དངོས་རྫས་ཉར་ཚགས་བྱས་ནས་དེ་དག་གི་ཕྱྭ་གཡང་དང་བསོད་བདེ་བསོད་ནམས་མུ་མཐུད་གནས་ཐབས་བྱེད་པ་ཞིག་ཡིན། ཡང་ཁྱིམ་ཚང་ལ་ལས་གཡང་བུམ་ནང་གཡང་རྫས་བྱུར་བུར་གཏམས་ནས་གཡང་འགུགས་ཀྱི་ཆོ་ག་བྱས་རྗེས་ཁྱིམ་གྱི་སྦུག་དུ་བཞག་ན་ཕྱྭ་གཡང་མི་ཉམས་པའི་ངོས་འཛིན་བྱེད་པ་ཡིན། ད་དུང་མི་ལ་ལས་གསེར་ཊམ་སོགས་ཅུང་རིན་ཐང་ཆེ་བ་དང་ལོ་རྒྱུས་རིང་བའི་དངོས་པོ་དག་ཁུག་མ་དཀར་སྔོན་སོགས་ཀྱི་ནང་ཉར་ཚགས་བྱས་ནས་སྤྱིར་ན་བེད་སྤྱོད་མ་བཏང་བར་དངུལ་སོགས་འབེལ་པོ་ཡོང་བའམ་ནོར་ལོངས་སྤྱོད་འདོད་རྒུའི་ཆར་དུ་བསྙིལ་བའི་འདུན་པ་འཆང་གི་ཡོད་པ་བཅས་སོ།།