༄༅།།ཕྱི་ལོ་༢༠༡༩ལོའི་མཁས་མང་བློ་གསལ་བྱེ་བའི་གླིང་གྲྭ་ཚང་གི་ལོ་འདིའི་དགེ་བཤེས་རྣམས་ཀྱིས་དམ་འཇོག་གནང་།
བོད་རྒྱལ་ལོ་༢༡༤༦ཟླ་བ་༩ཚེས༡༨དང་།ཕྱི་ལོ་༢༠༡༩ལོའི་ཟླ་༡༡ཚེས་༡༥རེས་གཟའ་པ་སངས་ནས་བོད་ཟླ་༩པའི་ཚེས་༢༨དང་།ཕྱི་ཟླ་༡༡པའི་ཚེས་༢༤བར་ཉིན་དགུ་རིང་།ཆོས་སྡེ་ཆེན་མོ་དཔལ་ན་ལེནྡྲ་གཉིས་པ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་འདི་ལོའི་དགེ་བཤེས་ལྷ་རམས་པ་དང་ཚོགས་རམས་པ་རྣམས་དེ་རིང་ནས་གཙུག་ལག་ཁང་དུ་དགེ་བཤེས་དམ་བཅའ་འཇོག་བཞིན་པ་ཡིན།
དགེ་བཤེས་དམ་འཇོག་ནི་བོད་ཟླ་བཅུ་གཉིས་པའི་དགུན་ཆོས་ཆེན་མོའི་ནང་དགེ་བཤེས་ལྷ་ཚོགས་ཐམས་ཅད་དམ་བཅའ་འཇོག་རྒྱུ་ཡིན་ཞིང་། དེ་ཡང་ཕལ་ཆེར་དགེ་བཤེས་ལྷ་རམས་པ་དམ་བཅའ་ཉིན་གཅིག་དང་། ཚོགས་རམས་པ་རྣམས་ཚོགས་ཐེངས་རེར་དམ་བཅའ་འཇོག་དགོས་ཀྱང་གསུང་ཆོས་སོགས་དུས་བསྟུན་གྱིས་ངེས་གཏན་མེད། ད་ལོར་༸ སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་གསུང་ཆོས་ཡོད་པར་བརྟེན་དམ་བཅའ་སྔར་སྣུར་གྱིས་འཚོགས་ཡོད། དམ་བཅའ་ཉིན་སྔ་དྲོ་ཆུ་ཚོད་བརྒྱད་པ་ལ་འཚོགས་པ་དང་། ཕྱི་དྲོར་ཆུ་ཚོད་བདུན་པའི་ཐོག་འཚོགས་ཡོད། དམ་བཅའ་ཚོགས་ཚུལ་ཡང་སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་དབུ་བཞུགས་ཐོག་དབུ་ཆོས་གཉིས་དབུས་འདུས་མང་ལྷན་བཞུགས་གྲུབ་ནས་དབུ་མཛད་ཀྱིས་ཞལ་འདོན་སྒྲོལ་མ་དང་ཤེར་སྙིང་གསུང་གྲུབ་རྗེས། དཔལ་ལྡན་ཡོན་ཏན་མ་དབུ་སྐུལ་གནང་བ་དང་ཚོགས་ཐེངས་དེར་དམ་བཅའ་དངོས་གཞི་སུ་འཁེལ་ཡོད་ན་དམ་བཅའ་རྣམས་ཀྱི་སྔོན་ལ་ཕེབས་ཏེ་རྗེས་མ་རྣམས་རྒན་ཞོན་གོ་རིམ་ལྟར་གདོང་གྲལ་ནས་ཕེབས་གྲུབ་རྗེས་གདིང་བ་བཏིང་ནས་སྐུ་ཕྱག་ལན་གསུམ་ཕུལ། དེ་ནས་དབུ་ཞྭ་ཕྱག་ཏུ་བསྣམས་ཏེ་དཔལ་ལྡན་ཡོན་ཏན་མ་ཚར་བར་ཙོག་པུར་བཞུགས། དེ་ནས་སྐུ་ལ་མཚན་དཔེ་དབུ་སྐུལ་གནང་བ་དང་དགེ་བཤེས་རྣམས་ཕེབས་ནས་སོ་སོའི་དམ་ཁྲི་ཐོག་གདིང་བ་བཏིང་དགོས། དབུ་ཞྭ་ཕྱག་ཏུ་བསྣམས་ཏེ་དམ་ཁྲི་ལ་གཡས་བསྐོར་གྱིས་མཁན་རིན་པོ་ཆེ་མཆོག་ལ་དབུ་བཏུགས་ཞུས་རྗེས་དམ་ཁྲི་ལ་འཁོད། དེ་ནས་དམ་བཅའ་སུ་འཁེལ་ཡོད་ན་གྲྭ་ཚང་གི་མཐོང་བ་བརྒྱུད་པའི་ཕྱག་བཞེས་ལྟར་འཇམ་དཔལ་རྡོ་རྗེ་སོགས་སྐྱོར་བཞིན་ཕྲེང་བ་སྐོར་བཞིན་པའི་ངང་ནས་མཆོད་བརྗོད་བཏོན། ན་མོ་སངས་རྒྱས་ཐམས་ཅད་སོགས་དབྱངས་དང་བཅས་སྐྱོར་བཞིན་པའི་ངང་དབུ་ཞྭ་ཕྱག་ཏུ་བསྣམས་ཏེ་ཚིགས་བཅད་བཞི་པའི་མཚམས་རེར་གུས་བཏུད་ཞུས་ནས་དབུ་ཞྭ་ལ་མགོ་བོ་བཏུག་པར་མཛད། དེ་ནས་གཞུང་བཤད་མཛད་བཞིན་སྐབས་སུ་བླ་མ་གཞུང་ལེན་པའི་ཕྱག་བརྡར་བ་དང་བརྗོད་མཚམས་འཇོག་གནང་དགོས། གཞུང་ལེན་པས་བཀའ་པོད་ལྔ་ཡི་ས་བཅད་གདོང་གྲལ་དུ་ཡར་མར་ཕེབས་ཏེ་སྐྱོར་གནང་དགོས། དགེ་བཤེས་ཀྱི་མདུན་དུ་དྷི༔ སྐད་དང་བཅས་ཕྱག་བརྡར་ཏེ་དགེ་བཤེས་ལགས་ཀྱིས་བཀའ་པོད་ལྔ་ཡི་དམ་བཅའ་འཇོག་གནང་མཛད་རྗེས་བླ་མ་གཞུང་ལེན་པས་རྟགས་གསལ་དངོས་གཞི་དབུ་འཛུགས་དགོས། དེ་ནས་རིམ་བཞིན་བླ་སྤྲུལ་དགེ་བཤེས་དང་སློབ་གཉེར་བ་རྣམས་རྒན་ཞོན་གོ་རིམ་བཞིན་དུ་རྟགས་གསལ་རེ་གཏོང་གནང་དགོས།
ལོ་འདིར་དགེ་བཤེས་ལྷ་རམས་པ་ཉི་ཤུ་རྩ་བདུན་དང་།ཚོགས་རམས་པ་དྲུག་བཅས་ཁྱོན་དགེ་བཤེས་དམ་འཇོག་པ་༣༣ཐམ་པ་ཡོད།ནམ་རྒྱུན་ལྟར་ན་དགེ་བཤེས་ཀྱི་དམ་བཅའ་དགུན་ཆོས་ཆེན་མོའི་ནང་དུ་བཞག་སྲོལ་ཡོད་ཀྱང་ལོ་འདིར་སྐབས་དེར་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ནས་གནས་མཆོག་རྡོ་རྗེ་གདན་དུ་གསུང་ཆོས་དང་སྐབས་ཁེལ་བར་བརྟེན་དགེ་བཤེས་དམ་འཇོག་སྔར་བསྣུར་བྱས།རིམ་བཞིན་སྔ་དགོང་གཉིས་སུ་དགེ་བཤེས་དམ་བཅའ་བ་གཉིས་རེ་བྱས་ཏེ་ཉིན་རེར་དགེ་བཤེས་བཞི་རེས་དམ་བཅའ་འཇོག་གི་ཡོད།དམ་བཅའ་འཇོག་མཁན་རིམ་བཞིན་ལྷ་རམས་པ་གུ་གེ་དགེ་བཤེས་ཐུབ་བསྟན་ཚེ་རིང་།ཕུ་དགེ་བཤེས་ཐུབ་བསྟན་ཉི་མ།ཕུ་ཁང་དགེ་བཤེས་ཚེ་རིང་བཀྲ་ཤིས།ཏྲེ་ཧོར་དགེ་བཤེས་དཔག་བསམ་དོན་འགྲུབ།ཏྲེ་ཧོར་དགེ་བཤེས་ཡེ་ཤེས་པདྨ།ཏྲེ་ཧོར་དགེ་བཤེས་དབང་ཕྱུག་རབ་བརྟན།ཀླུ་འཁྱིལ་དགེ་བཤེས་ཡེ་ཤེས་ཐབས་མཁས།ཏྲེ་ཧོར་དགེ་བཤེས་ཐུབ་བསྟན་ཟླ་བ།ཀླུ་འཁྱིལ་དགེ་བཤེས་དཔའ་ཆེན་རྡོ་རྗེ།རྒྱ་དགེ་བཤེས་བློ་བཟང་དཔལ་ལྡན།ཏྲེ་ཧོར་དགེ་བཤེས་བློ་བཟང་ཚེ་རིང་།ཏྲེ་ཧོར་དགེ་བཤེས་བསོད་ནམས་དོན་འགྲུབ།གླིང་དགེ་བཤེས་ཐུབ་བསྟན་དབང་གྲགས།ཏྲེ་ཧོར་དགེ་བཤེས་ཚེ་རིང་འབྲུག་གྲགས།ཏྲེ་ཧོར་དགེ་བཤེས་བྱམས་པ་དབང་ཕྱུག།ལྷོ་པ་དགེ་བཤེས་ངག་དབང་རྣམ་གྲོལ།ཏྲེ་ཧོར་དགེ་བཤེས་ཤེས་རབ་དབང་ཕྱུག།ཕུ་ཁང་དགེ་བཤེས་བློ་བཟང་ལུང་རྟོགས།ཉག་རེ་དགེ་བཤེས་ཚེ་རིང་དོན་འགྲུབ།རྩེད་ཐང་དགེ་བཤེས་ཕུན་ཚོགས་བསྟན་འཕེལ།གོ་བོ་དགེ་བཤེས་བློ་བཟང་རྒྱ་མཚོ།གཙང་པ་དགེ་བཤེས་བློ་བཟང་སྦྱིན་པ།སྤོམ་ར་དགེ་བཤེས་འཕྲིན་ལས་ཟླ་བ།ཏྲེ་ཧོར་དགེ་བཤེས་པདྨ་ཚེ་དབང་།ཉག་རེ་དགེ་བཤེས་ཚེ་དབང་རྡོ་རྗེ།ཉག་རེ་དགེ་བཤེསབཀྲ་ཤིས་ལྷ་རྒྱལ།རྩེད་ཐང་དགེ་བཤེས་བསྟན་འཛིན་སྙན་གྲགས་བཅས་དགེ་བཤེས་ལྷ་རམས་པ་ཉི་ཤུ་རྩ་བདུན་དང་།ཚོགས་རམས་པ་ཡང་རིམ་བཞིན་ཏྲེ་ཧོར་དགེ་བཤེས་རིན་ཆེན་དར་རྒྱས།ཀླུ་འཁྱིལ་དགེ་བཤེས་བློ་བཟང་བཟོད་པ།ཏྲེ་ཧོར་དགེ་བཤེས་བློ་བཟང་དཔལ་ལྡན།ཕ་ར་དགེ་བཤེས་ཚེ་རིང་དབང་ཕྱུག།རོང་པོ་དགེ་བཤེས་འཇམ་དབྱངས་བསྟན་འཛིན།རོང་པོ་དགེ་བཤེས་དཀོན་མཆོག་དར་རྒྱས་ཚོགས་རམས་པའི་དམ་འཇོག་གནང་།
སྔོན་ཆད་དེ་ལྟར་ལོ་གཅིག་ལ་ལྷ་རམས་པ་མང་པོ་ཞིག་བྱུང་མྱོང་མེད་པ་དང་།མཁས་མང་བློ་གསལ་གླིང་གི་ལོ་རྒྱུས་ཐོག་ལོ་འདིར་ལྷ་རམས་དགེ་བཤེས་གཏོང་མཁན་མང་ཤོས་ཡིན་པ་མ་ཟད།གདན་ས་གྲྭ་ཚང་གཞན་ནས་ཀྱང་མང་ཤོས་ཆགས་ཡོད།ལོ་རྗེས་མར་ཡང་ལྷ་རམས་དགེ་བཤེས་གཏོང་མཁན་ཉི་ཤུ་རྩ་དྲུག་ཡོད།གདན་ས་ཁག་གི་དགེ་བཤེས་དང་ལྷག་པར་དུ་ལྷ་རམས་པ་གཏོང་བ་ལ་ལོ་མང་པོའི་རིང་རྒྱལ་བའི་བཀའ་མདོ་རྒྱུད་སྤྱི་དང་།དེ་དག་གི་དགོངས་འགྲེལ་རྒྱ་བོད་མཁས་པའི་བརྩམས་པའི་བསྟན་བཅོས་ཁག་ལ་ལུས་ཀྱི་དཀའ་སྡུག།ངག་གི་སྐྱོར་སྦྱོང་།ཡིད་ཀྱི་བསམ་བཞིགས་ཀྱི་ལམ་ནས་རྣམ་དཔྱོད་དང་བློ་གྲོས།བརྩོན་འགྲུས་ཡོད་ཚད་ཀྱིས་གྲྭ་ཚང་སོ་སོར་ལོ་ངོ་བཅུ་བདུན་ཡན་མན་བྲིས་སྐྱོར་རྩོད་གསུམ་གྱིས་རྒྱུགས་སྤྲོད་མཐར་ཕྱིན་རྗེས།གདན་ས་གཞན་ཁག་དང་ལྷན་དུ་ལོ་ངོ་ཧྲིལ་པོ་དྲུག་གི་རིང་གཞུང་ཆེན་པོད་ལྔ་དང་།རྒྱལ་རབས་ལོ་རྒྱུས།ཆོས་འབྱུང་།བོད་ཀྱི་བརྡ་སྤྲོད་ཁག།སྙན་ངག་སོགས་བྲིས་རྩོད་ཀྱི་ལམ་ནས་བཀའ་རམས་ལོ་གཉིས།སློབ་དཔོན་ལོ་གཉིས།ལྷ་རམས་ལོ་གཉིས་བཅས་ལོ་དྲུག་ལ་རྒྱུགས་སྤྲོད་བྱས་ཏེ་ལྷ་རམས་པ་དགེ་བཤེས་ཀྱི་མཚན་སྙན་བཞེས་པ་ཞིག་ཡིན།དང་པོར་གྲྭ་ཚང་དུ་དགུན་ཆོས་ཆེན་ཆེན་མོའི་ནང་དམ་བཅའ་འཇོག་གནང་བ་དང་།མཚན་ཕུད་དམ་བཅའ།ཁམས་ཚན་དམ་བཅའ།དེ་ནས་སྨོན་ལམ་ཆེན་མོའི་ནང་གདན་གསུམ་དགེ་བཤེས་ལྷ་རམས་པ་རྣམས་དང་ལྷན་དུ་ལྷ་ལྷན་སྨོན་ལམ་ཆེན་མོའི་དམ་བཅའ་བཅས་འཇོག་གནང་བ་དང་དགེ་བཤེས་ལྷ་རམས་པའི་མཚན་སྙན་གྱི་ཅོད་པན་བཞེས་པ་ཡིན་ནོ།།སྔོན་དུ་དགེ་བཤེས་སོ་སོ་གྲྭ་ཚང་གི་དམ་བཅའ་ཆེན་མོ་གྲུབ་པ་དང་ཉིན་དེར་རང་ཤག་གམ་ཁང་ཚན་བཅས་སུ་འབྲེལ་ཡོད་འཛིན་གྲོགས་དང་ཁམས་ཚན་གྱི་གྲྭ་མང་གིས་རྟེན་འབྲེལ་གྱི་མཇལ་དར་གཏོང་སྲོལ་མཆིས་ཀྱང་དེང་སྟབས་བདེ་སླད་ཕྱི་ཉིན་ནམ་ཡང་ན་གཟའ་ཚེས་ཡག་པ་ཞིག་ལ་དགེ་བཤེས་རྣམས་ཀྱིས་བླ་མ་དགེ་བའི་བཤེས་གཉེན་རྣམས་ལ་མཇལ་ཁ་ཞུ་བ་དང་།དགེ་བཤེས་རྣམས་ལ་ཉིན་གཅིག་ལ་དུས་གཅིག་ལ་རྟེན་འབྲེལ་གྱི་མཇལ་དར་འབུལ་སྲོལ་མཆིས་སོ།།
ལོ་འདིའི་དགེ་བཤེས་རྣམས་བསྟན་པ་དང་འགྲོ་བའི་དོན་དུ་སྐུ་ཚེ་མཛད་དགོངས་འཕེལ་ཞིང་། མཛད་འཕྲིན་རྒྱས་པ་དང་། ཐུགས་ཀྱི་བཞེད་པ་མཐའ་དག་ལྷུན་གྱིས་འགྲུབ་པའི་བཀྲ་ཤིས་སྨོན་འདུན་ཞུ།། །།
