བཀའ་དྲིན་རྗེས་དྲན་དང་འབྲེལ་བའི་བརྟན་བཞུགས་འབུལ་བ།
ཕྱི་ལོ༢༠༢༠ཟླ་བ་༢ཚེས་༡༩རེས་གཟའ་ལྷག་པ་གཟའ་སྐར་འཕྲོད་སྦྱོར་དགེ་བའི་ཉིན་གྱི་སྔ་དྲོར་ཆུ་ཚོད༨ཐོག་བཀའ་དྲིན་རྗེས་དྲན་དང་འབྲེལ་བའི་བརྟན་བཞུགས་དབུ་འཛུགས་གནང་།
དེ་ཡང་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་འདི་ཉིད་ལ་བཀའ་དྲིན་གྱི་ཁུར་ཤིན་ཏུ་ལྕི་ཞིང་།ཉག་ང་ཉམ་ཕྲ་བའི་དུས་དེར་༧སྤྱི་ནོར་༧གོང་ས་སྐྱབས་མགོན་༧རྒྱལ་དབང་ཐམས་ཅད་མཁྱེན་པའི་བཀའ་སློབ་ལམ་སྟོན་འོག་དབུ་འོག་དཔུང་འདེགས་དང་ཕྱར་བ་གྲུ་འདེགས་ཀྱིས་བོད་སྤྱིའི་བསྟན་པ་ཆབ་སྲིད་ཀྱི་བདེ་རྩ་དང་ཆོས་དང་རིག་གཞུང་སྐད་ཡིག་བཅས་ལ་གཟེངས་སུ་ཐོན་པའི་སྐྱེས་ཆེན་དམ་པ་འགྲན་ཟླ་དང་བྲལ་བ་ཇི་སྙེད་ཅིག་བྱུང་ཡོད་པ་དང་།ལྷག་པར་གྲྭ་ཚང་འདི་ཉིད་ཐོག་མར་མོན་གྷོ་གཞིས་ཆགས་སུ་སྤོས་སྐབས་དགེ་འདུན་པ་སུམ་བརྒྱ་མ་ཟིན་ཙམ་ཡོད་ཀྱང་ད་སྐབས་ཞལ་བཞུགས་པ་སྐུ་བགྲེས་པ་ཞལ་གྲངས་ལྔ་བཅུ་ང་གྲངས་ལས་འཚོ་བཞུགས་མེད་ཅིང་། ཁོང་རྣམས་ནི་གྲྭ་ཚང་རིན་པོ་ཆེ་འདི་ཉིད་མུ་གེའི་ནང་ནས་གསོ་མཁན་དང་ལྷག་པའི་ནང་དུ་རུམ་མཁན་ཆོས་དང་ཟང་ཟིང་གང་ཐད་ནས་མི་སྨོན་རང་སྐྱིད་དུ་བསྐྲུན་མཁན་ཁྱིམ་ཚང་གཅིག་གི་ཕ་མ་ལྟ་བུ་ཡིན་སྟབས་བཀའ་དྲིན་ལ་ངོ་ཤེས་པ་དང་གདམས་ངག་གི་དོན་རྟོགས་ནས་དྲིན་ཅན་ལ་དྲིན་བཟོའི་སླད་བརྟན་བཞུགས་དང་འབྲེལ་བའི་བཀའ་དྲིན་རྗེས་དྲན་གྱི་བྱ་བ་འདི་ཉིད་འབྲས་བློ་གླིང་གྲྭ་ཚང་གིས་གོ་སྒྲིག་དང་དབུ་ཚུགས་པ་གནང་།
བརྟན་བཞུགས་འབུལ་ཡུལ་ཡང་འཕགས་མཆོག་མིག་མི་འཛུམ་པའི་རིགས་ཀྱི་ཅོད་པན་འཆང་བ་ཞྭ་སེར་བསྟན་པའི་གཙུག་རྒྱན་༧འཇམ་མགོན་རྒྱལ་བའི་རྒྱལ་ཚབ་༧སྐྱབས་རྗེ་དགའ་ལྡན་ཁྲི་ཟུར་རིན་པོ་ཆེ་རྗེ་བཙུན་རི་རྫོང་སྲས་སྤྲུལ་ཐུབ་བསྟན་ཉི་མ་དཔལ་བཟང་པོ་མཆོག་དང་།༸སྐྱབས་རྗེ་ཤར་པ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག།སྐྱབས་རྗེ་བློ་གླིང་མཁན་ཟུར་རིན་པོ་ཆེ་ཁྱབ་བདག་བཀའ་འགྱུར་བ་རྗེ་བཙུན་རྟོགས་ལྡན་སྤྲུལ་སྐུ་བློ་བཟང་བསྟན་པའི་རྒྱལ་མཚན་དཔལ་བཟང་པོ་མཆོག།སྐྱབས་རྗེ་རྒྱུད་སྨད་མཁན་ཟུར་རིན་པོ་ཆེ་རྗེ་བཙུན་མཐུ་སྟོབས་མགོན་པོ་དཔལ་བཟང་པོ་མཆོག།སྐྱབས་རྗེ་བློ་གླིང་མཁན་ཟུར་རིན་པོ་ཆེ་རྗེ་བཙུན་དཀོན་མཆོག་དཔག་བསམ་དཔལ་བཟང་པོ་མཆོག།སྐྱབས་རྗེ་བློ་གླིང་མཁན་ཟུར་རིན་པོ་ཆེ་རྗེ་བཙུན་བློ་བཟང་ཡེ་ཤེས་དཔལ་བཟང་པོ་མཆོག།སྐྱབས་རྗེ་རྣམ་གྲྭ་མཁན་ཟུར་རིན་པོ་ཆེ་རྗེ་བཙུན་དབང་གྲགས་དཔལ་བཟང་པོ་མཆོག་དབུས་མཁན་ལས་ཟུར་རྣམ་པ།བཀའ་བློན་ཁྲི་ཟུར་༧སྐྱབས་རྗེ་མཁས་དབང་ཟམ་གདོང་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག།བཀའ་ཟུར་༧སྐྱབས་རྗེ་ཀིརྟི་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག།༧སྐྱབས་རྗེ་མཁས་དབང་རྡོ་འབུམ་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོགསྐྱབས་རྗེ་ལྷ་ལྡིང་རིན་པོ་ཆེ་རྗེ་བཙུན་བློ་བཟང་རྒྱ་མཚོ་དཔལ་བཟང་པོ་དབུས་ད་ལྟར་ཞལ་བཞུགས་ཡོད་པ་གནས་བརྟན་སྐུ་བགྲེས་པ་རྣམས་ཀྱི་བཀའ་དྲིན་རྗེས་དྲན་ཞུ་སླད་དཔལ་ལྡན་འབྲས་སྤུངས་མཁས་མང་བློ་གསལ་གླིང་གི་དབུ་བཞུགས༧སྐྱབས་རྗེ་མཁན་རི.ན་པོ་ཆེ་རྗེ་བཙུན་བློ་བཟང་བསམ་གཏན་དཔལ་བཟང་པོ་མཆོག་དང་།བླ་མ་གཞུང་ལེན་པ་དགེ་བཤེས་ཡེ་ཤེས་ཆོས་འཕེལ་མཆོག།དབུ་མཛད་དགེ་བཤེས་གཙུག་ལག་རྒྱ་མཚོ་བཅས་དབུ་ཆོས་རྣམ་གསུམ་དང་། ཁམས་ཚན་ཁག་གི་ཁམས་ཚན་རྒན་རྣམ་པ།སྤྱི་རྒན་བཅས་བཀའ་མདོ་རྒྱུད་གཞུང་ལུགས་རབ་འབྱམས་རྒྱ་མཚོའི་མངའ་བདག་སྐྱབས་གནས་འདུས་མང་བཅས་ཆོས་ཀྱི་དགའ་སྟོན་ལ་གདན་འཛོམས་ནས་བརྟན་བཞུགས་དབུ་འཛུགས་གནང་།
ཐོག་མར་དབུ་མཛད་ལགས་ཀྱིས་མདོ་ལུགས་དང་འབྲེལ་བའི་ཞལ་འདོན་དབུ་སྐུལ་དང་༧རྒྱལ་བའི་ཞབས་བརྟན་སོགས་ཞབས་བརྟན་གསོལ་འདེབས་ཁག་བཅས་རིམ་གསུང་བཞིན་གསོལ་ཇ་འབྲས་སིལ་འདེགས་འབུལ་དང་།མཎྜལ་རྟེན་གསུམ་འདེགས་འབུལ་སྐབས་དགའ་ལྡན་ཁྲི་ཟུར་རིན་པོ་ཆེ་དབུས་མཁན་ཟུར་སོགས་བརྟན་བཞུགས་བྱ་ཡུལ་རྣམས་ལ་ཚེ་དཔག་མེད་ཀྱི་སྐུ་དང་།གནས་བརྟན་སྐུ་བགྲེས་པ་རྣམས་ལ་ཚེ་ལྷ་རྣམ་གསུམ་གྱི་ཞལ་ཐང་རེ།རྟེན་དོད་དང་གསོལ་དོད་ཧིན་སྒོར་བཅས་འབུལ་ལམ་ཞུས་གནང་བ་དང་།དབུ་བཞུགས༧སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག་གིས་བཀའ་དྲིན་རྗེས་དྲན་གྱི་བརྟན་བཞུགས་དང་འབྲེལ་བའི་གསུང་བཤད་གནང་བ་དང་།འབྲས་བློ་གླིང་ཕྱག་མཛོད་ཁྲི་པ་དགེ་བཤེས་བློ་བཟང་ཟླ་བ་མཆོག་གིས་ཐུགས་རྗེ་ལེགས་གསོལ་དང་འབྲེལ་བའི་གསུང་བཤད་གནང་བ་དང་། བསྟན་འབར་མ་སོགས་གསུང་གནང་སྟེ་འདུས་ཚོགས་གྲོལ།
