༄༅།། བོད་གངས་ཅན་གྱི་དཔལ་ནཱ་ལནྡཱ་གཉིས་པ་ཆོས་སྡེ་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོའི་བྲིས་རྒྱུགས་དབུ་འཛུགས་གནང་བ།
ཕྱི་ལོ་ ༢༠༢༢ ཟླ་ ༨ ཚེས་ ༢༠ རེས་གཟའ་མིག་དམར་ཉིན་གངས་ཅན་གྱི་དཔལ་ནཱ་ལནྡཱ་གཉིས་པ་ཆོས་སྡེ་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོའི་བྲིས་རྒྱུགས་དབུ་འཛུགས་གནང་ཡོད་ཅིང་། དེ་ཡང་སྔར་སྲོལ་བཞིན་འདི་ལོའི་ལོ་འཁོར་རྒྱུགས་སྤྲོད་དུ་དངོས་སུ་ཞུགས་དགོས་པའི་སློབ་གཉེར་བ་ཉམ་ཐག་ནད་པ་དང་གྲྭ་ཚང་གི་ལས་སྣེ་འཁེལ་བ་འགའ་རེ་མ་གཏོགས་སློབ་གཉེར་བ་ཞལ་གྲངས་༼༡༠༣༧༽ལོ་འཁོར་རྒྱུགས་སྤྲོད་དུ་ཞུགས་ཡོད། དེ་རིང་ནས་བཟུང་ཉིན་ལྔ་རིང་ཞོགས་ཆུ་ཚོད་༨ པར་དབུ་མ་འཛིན་གྲྭ་ཡན་འཛིན་གྲྭ་སོ་སོའི་ཀ་སྡེ་གཞུང་ཆེན་དབུ་མ་དང་འདུལ་མཛོད་བཅས་ཀྱི་སློབ་ཚན་བྲིས་རྒྱུགས་དང་། ཕར་ཕྱིན་དང་རྟགས་རིགས་འཛིན་གྲྭ་བཅས་ནས་ཀ་སྡེའི་སློབ་ཚན་ཕར་ཕྱིན་དང་རྟགས་རིགས་བཅས་བྲིས་རྒྱུགས་འབུལ་རྒྱུ། ཁ་སྡེ་དངུལ་ཆུའི་ཡབ་སྲས་ཀྱི་སུམ་རྟགས་དང་། དག་ཡིག་ངག་སྒྲོན། བསྟན་དར་ལྷ་རམས་པའི་ཡི་གེའི་བཤད་པ་མཁས་པའི་ཁ་རྒྱན། ཐུའུ་བཀྭན་གྲུབ་མཐའ། རྒྱལ་དབང་ལྔ་པ་ཆེན་པོའི་སྙན་དངགས་དང་། རྗེ་ཙོང་ཁ་པ་ཆེན་པོའི་མི་དབང་རྟོགས་བརྗོད་དང་རྟག་ཏུ་ངུའི་རྟོགས་བརྗོད་བཅས་བྲིས་རྒྱུགས་ཁག་འབུལ་རྒྱུ། ཉིན་རྒྱབ་ཆུ་ཚོད་ ༢ ནས་བྲིས་རྒྱུགས་འབུལ་རྒྱུ་བཅས་ཡིན་པ་རེད། གྲྭ་ཚང་གི་སྐྱོར་རྒྱུགས་དང་། བྲིས་རྒྱུགས། རྩོད་རྒྱུགས་བཅས་ཀྱི་དུས་ཡུན་རིང་ལྟ་རྟོག་བྱེད་མཁན་འདི་ལོའི་རྒྱུགས་ཞིབ་ལྷན་ཁང་གི་རྒྱུན་ལས་རྣམ་པ་དང་། དགེ་བསྐོས་དང་ཆབ་རིལ། གྲྭ་ཚང་གི་ཁང་ཚན་ཉེར་ལྔའི་ཁང་རྒན་རྣམས་ཀྱང་ངེས་པར་དུ་ལྟ་རྟོག་དགོས་པ་ནི་སྔ་སྲོལ་བཞིན་གནས་པར་བྱས་ཡོད། དེ་བཞིན་དུ་འཛིན་སྐྱོང་ཕྱག་མཛོད་ཁང་དང་རྒྱུགས་སྤྲོད་ཚོགས་ཆུང་ནས་རྒྱུགས་སྤྲོད་སྐབས་སུ་འགྲོ་གྲོན་ཅི་དགོས་ཀྱི་ཐད་ལ་དགོས་མཁོ་དང་འཚམ་པའི་མཉམ་རུབ་གནང་བ་སོགས། མདོར་ན་གྲྭ་ཚང་གི་སྐྱབས་རྗེ་མཁན་རིན་པོ་ཆེ་མཆོག་གིས་དབུས་རྟགས་རིགས་འཛིན་གྲྭའི་བར་ཀྱི་དགེ་འདུན་པ་ཚོས་རྒྱུགས་སྤྲོད་ལ་ལུས་ངག་ཡིད་གསུམ་གྱིས་རང་འགན་རང་འཁྱེར་གྱིས་རྒྱུགས་སྤྲོད་ཀྱི་བྱ་བ་འབད་བཞིན་བཅས་སོ།།
