༄༅། །གངས་ཅན་གྱི་དཔལ་ནཱ་ལནྡཱ་ཆེན་མོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གི་སློབ་གཉེར་བ་རྣམས་ཀྱིས་དཔྱིད་ཆོས་ཆེན་མོ་འཚོགས་བཞིན་པ།

ཕྱི་ལོ་༢༠༢༢ ལོའི་ཟླ་ ༥ ཚེས་ ༣ ཉིན་དཔལ་ལྡན་འབྲས་སྤུངས་མཁས་མང་བློ་གསལ་གླིང་དུ་ལོ་གཅིག་ལ་ཆོས་ཐོག་ཆེན་མོ་བརྒྱད་ཡོད་པ་ལས་ཆོས་ཐོག་གཉིས་པ་དཔྱིད་ཆོས་ཆེན་མོ་དབུ་ཚུགས་གནང་ཡོད། ཆོས་ཐོག་འདི་བོད་ཟླ་གསུམ་པའི་ཚེས་གསུམ་ལ་ཆོས་ར་ཡར་ཚོགས་དང་། དུས་ཡུན་ཟླ་ཆོས་ཡིན། ཟླ་ཆོས་འདིའི་ནང་༧ སྐྱབས་རྗེ་མཁན་རིན་པོ་རྗེ་བཙུན་བློ་བཟང་བསམ་གཏན་མཆོག་དབུ་བཞུགས་ཐོག་གཙོ་བོ་རྒྱལ་བའི་གཞུང་ཆེན་ཁག་གི་གནད་བསྡུས་པ་བཀའ་པོད་ལྔའི་གཞུང་ལུགས་ཁག་ལ་སློབ་གཉེར་གནང་བཞིན་པའི་སློབ་གཉེར་བ་རྟགས་རིགས་འཛིན་གྲྭ་གཅིག ། ཕར་ཕྱིན་འཛིན་གྲྭ་བདུན། དབུ་མ་འཛིན་གྲྭ་གསུམ། འདུལ་བ་འཛིན་གྲྭ་གསུམ། མཛོད་འཛིན་གྲྭ་གཉིས་བཅས་འཛིན་གྲྭ་ཁག་བཅུ་དྲུག་གིས་འཛིན་གྲྭ་འཐབ་དགོས། དེ་ཡང་འཛིན་གྲྭ་རེ་ནས་འོག་མ་ལ་ལན་གཅིག་རེ་དང་རྟགས་བསལ་རེ། འཛིན་གྲྭ་གོང་མ་ལ་ཡང་ལན་གཅིག་རེ་དང་རྟགས་བསལ་རེ་གཏོང་གནང་དགོས། དེང་སྐབས་འཛིན་གྲྭ་སོ་སོས་ལུང་དང་རིགས་པའི་བརྒྱན་ཏེ་རྩོད་པའི་ཚེ་རྟགས་བསལ་གཏོང་སྟངས་དང་ལན་འདེབས་སྟངས་གཞུང་ལུགས་ཀྱི་གོ་བ་ལེན་སྟངས། རྩོད་པ་དང་ལན་སོགས་ཀྱི་ཚེ་རིག་པ་རྣོ་མྱུར་དང༌། དོན་དང་ལྡན་མིན། ལུས་ཀྱི་སྟངས་ཀ ངག་གི་སྨྲ་སྟངས། ཐུགས་ཀྱི་འཁྱེར་སོ། སྒྱིད་ལུག་དང༌ང་རྒྱལ་མེད་པ། གཡོ་སྒྱུ་དང་རྫུན་ཚིག་མེད་ཅིང་གུས་པ་དང་ཀུན་སྤྱོད་བཟང་བའི་སྒོ་ནས་རྟགས་རིགས་འཛིན་གྲྭ་ནས་མཛོད་གཉིས་པའི་བར་འཛིན་གྲྭ་གོང་འོག་ཕན་ཚུན་བརྒལ་བརྟག་བགྱིས་ཏེ་ལུང་རིགས་གནམ་ལྕགས་ཀྱི་ཐོག་མདའ་འཕེན་ཏེ་ཕས་རྒོལ་ལོག་རྟོག་གི་བྲག་རི་འཇོམས་པའི་དུས་དེར་གཤེར་དཔང་བ་དགེ་བཤེས་བཞིས་འཛིན་གྲྭ་སོ་སོར་ཨང་གྲངས་ཕུལ་ཏེ་མཐར་འཛིན་གྲྭ་འཐབ་གྲུབ་མཚམས་ཨང་གྲངས་མཐོ་བ་རྣམས་ལ་རྩེད་ཕུད་དང་གཉིས་གསུམ་གྱི་གཟེངས་བསྟོད་ཀྱི་བྱ་དགའ་ཡང་འབུལ་གནང་མཛད་དགོས། འདི་གྲྭ་སའི་དཔེ་ཆ་བ་ཚོས་ལྟད་མོ་ཆེ་ཤོས་ཀྱི་དུས་ཤིག་བརྩི་ཡི་ཡོད། བོད་ཟླ་བཞི་པའི་ཚེས་གསུམ་ལ་མར་གྲོལ། དེ་ནས་ཆོས་མཚམས་ཉིན་བཅུ་གསུམ་ཡོད།