༄༅། །གངས་ཅན་གྱི་དཔལ་ནཱལནྡཱ་གཉིས་པ་དཔལ་ལྡན་འབྲས་དཀར་སྤུངས་པའི་ཁྲི་པ་རིན་པོ་ཆེ་དབུས་གྲྭ་ཚང་ཁག་གི་མཁན་རིན་པོ་ཆེ། ཕྱག་མཛོད་ལས་སྣེ་ལྷན་རྒྱས་གནས་ཆུང་སྒྲ་དབྱངས་རྡོ་རྗེ་གླིང་དུ་གནས་ཆུང་ཆོས་རྒྱལ་ཆེན་པོ་སྤྱན་འདྲེན་ཞུས་པ།

དཔལ་ལྡན་འབྲས་དཀར་སྤུངས་པའི་ཁྲི་པ་རིན་པོ་ཆེ་བློ་གླིང་རྗེ་བཙུན་དཀོན་མཆོག་དཔག་བསམ་མཆོག་དང་། འབྲས་སྤུངས་ཁྲི་ཟུར་རིན་པོ་ཆེ་སྒོ་མང་རྗེ་བཙུན་བློ་བཟང་བསྟན་པ་མཆོག །འབྲས་བློ་གླིང་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག ། འབྲས་སྒོ་མང་མཁན་རིན་པོ་ཆེ་རྗེ་བཙུན་འཇིགས་མེད་རྒྱ་མཚོ་མཆོག །འབྲས་སྤུངས་བླ་སྤྱིའི་ཕྱག་མཛོད་དགེ་བཤེས་ཡོན་ཏན་ཕུན་ཚོགས་བཅས་གཙོ་བོར་༧ སྤྱི་ནོར་༧ གོང་ས་སྐྱབས་མགོན་མཆོག་མཇལ་བཅར་སྙན་གསན་སླད་འབྲས་སྤུངས་ནས་རྡ་སར་ཕེབས་ཏེ་རྣམ་རྒྱལ་གྲྭ་ཚང་དུ་བཞུགས་མུས་ངང་༧ སྤྱི་ནོར་༧ གོང་ས་སྐྱབས་མགོན་ཆེན་པོ་མཇལ་ཁ་མ་ཞུ་བའི་སྔོན་ཕྱི་ལོ་༢༠༢༢ ལོའི་ཟླ་བ་ ༥ ཚེས་ ༢༢ ཉིན་བོད་བསྟན་པ་ཆབ་སྲིད་སྤྱི་དང་། དཔལ་ལྡན་འབྲས་དཀར་སྤུངས་པའི་སྐོར་རྡ་ས་གནས་ཆུང་སྒྲ་དབྱངས་གླིང་དུ་༸རྒྱལ་བའི་བསྟན་སྲུང་སྤྲུལ་པའི་ཆོས་སྐྱོང་རྡོ་རྗེ་གྲགས་ལྡན་རྩལ་ཆེན་པོ་སྤྱན་འདྲེན་ཞུས་ཏེ་ཐུགས་དམ་ས་བོན་འབུལ་བ་ལྟར་ལུང་བསྟན་གནང་ཡོད།