༄༅། །གངས་ཅན་གྱི་དཔལ་ནཱ་ལནྡཱ་ཆེན་མོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གིས་གཡང་སྒྲུབ་ཆེན་མོ་ཚོགས་གནང་མཛད་པ།
ཕྱི་ལོ་ ༢༠༢༢ ཟླ་བ་ ༡༡ ཚེས་ ༢༤ ནས་ཚེས་༢༦ བར་ བློ་གླིང་སྐབས་བཅུ་བདུན་པའི་ཕྱག་མཛོད་རྣམས་ཀྱིས་ཐུགས་འགན་གཙོ་བོར་བཞེས་ཏེ་མགོན་དཀར་ཡིད་བཞིན་འཁོར་ལོའི་གཡང་སྒྲུབ་དང་། རྒྱལ་པོ་ཆེན་པོ་རྣམ་སྲས། ཛམ་བྷ་ལ་ཆེན་མོ་བཅས་ཀྱི་གཡང་སྒྲུབ་ཆེན་མོ་བཅས་འཚོགས་བཞིན་པ་དང་། གོང་ཁག་གསུམ་གྱི་གཡང་གི་གཏེར་བུམ་བཅས་སྒྲུབ་རྒྱུ། གཡང་སྒྲུབ་ཆེན་མོ་ཚོགས་མཁན་ཡང་དབུ་བཞུགས་འབྲས་བློ་གླིང་མཁན་ཟུར་སྐྱབས་རྗེ་འབྲས་སྤུངས་ཁྲི་པ་རིན་པོ་ཆེ་རྗེ་བཙུན་དཀོན་མཆོག་དཔག་བསམ་མཆོག་དང་། ཀེའུ་ཚང་རིན་པོ་ཆེ། ཟངས་འབུམ་མཆོག་སྤྲུལ་རིན་པོ་ཆེ། གྲ་སྨད་རིན་པོ་ཆེ། བ་ར་རིན་པོ་ཆེ་སོགས་བླ་སྤྲུལ་དགེ་བཤེས་ཐོན་ཟིན་རྣམས་དང་། ཁམས་ཚན་རེ་ནས་བཀའ་རབ་འབྱམས་དགེ་བའི་བཤེས་གཉེན་གཅིག་རེའམ་གཉིས་གསུམ་རེ་བཅས་བརྒྱ་ཕྲག་མ་ཟིན་ཙམ་ཡོད་ཅིང་། གཡང་སྒྲུབ་ཀྱི་ཆོ་གའི་ནང་གསལ་ལྟར་གཡང་སྒྲུབ་སྐབས་གཡང་འབོད་སོགས་ཀྱང་གནང་ཡོད།
སྤྱིར་གཡང་ཞེས་པ་ནི། དངོས་པོའི་ནང་གི་མི་ངོམས་པའི་ནུས་པའི་གྲུབ་ཆའམ་ཡང་སྙིང་བཅུད་ལ་གོ །སྐབས་འགར་ལོངས་སྤྱོད་ཟས་ནོར་དངོས་གྲུབ་སོགས་ཚུར་ལེན་པའི་དོན་ལ་གོ་བའང་ཡོད་དེ། དེ་འདྲའི་དངོས་པོ་ཞིག་ཚུར་རང་ཕྱོགས་ལ་བཀུག་པའམ་བླན་པའི་དོན་ལ་‘གཡང་བླན་’ནམ་‘གཡང་ལྡོན་’ཞེས་འབོད་ཀྱི་ཡོད།
གཡང་འགུག་གི་ཆོ་ག་བྱ་བ་འདི་ནི། དད་མོས་ཀྱིས་གཞིར་བྱས་པས་རང་གཞན་གང་ལ་ཕན་གནོད་ཀྱི་ནུས་པ་འདོན་ཐབས་ཤིག་ཡིན། དེ་ཡང་རྒྱ་ཆེ་ཆུང་ཅི་རིགས་ཡོད། ཆུང་བ་ལའང་ཚིགས་བཅད་འགའ་ཙམ་སྒོ་ནས་སྔགས་རེ་བཟླས་པའམ་གླུད་གཟུགས་ཆུང་ངུ་རེ་བསྔོས་པས་ཡང་ཆོག་པ་ཡོད། དེ་ཡང་ཕན་གནོད་ལ་མཚོན་ན། ཕན་པ་ནི་རང་ལ་ལྟོས་ཏེ་གཤམ་དུ་འཆད་འགྱུར་གྱི་གཡང་འགུག་གི་ཆོ་ག་ལྟ་བུ་ཡིན་ལ། གནོད་པ་ནི་རང་ལ་གནོད་པའི་ཕ་རོལ་པོ་ལ་ལྟོས་ཏེ་བསད་པ་དང་མནན་པའི་ཆོ་ག་ལྟ་བུའོ། །
གཡང་འགུག་གི་རིག་གནས་ནི་ལོ་རབས་འདི་ནས་འགོ་བཙུགས་པ་ཞེས་བརྗོད་ཐབས་བྲལ་ནའང་ཞང་ཞུང་བོན་ཀྱི་སྐབས་ནས་དར་བ་བཤད་སྲོལ་མཆིས། རྗེ་གཉའ་ཁྲི་བཙན་པོའི་སྐུ་དུས་ནས་ཀྱང་གཡང་འགུག་གི་རིག་གནས་ཡོད་པ་མ་ཟད་བོད་ཡུལ་དུ་དར་ཁྱབ་ཀྱང་ཆེ་བ་ཡོད་པར་གྲགས།
གཡང་འགུག་གི་ཆོ་ག་ཞེས་པ་ནི། དངོས་པོ་སྤྱི་ཡི་འབྱུང་ཁམས་ཀྱི་ནུས་སྟོབས་རྒུད་པ་རྣམས་གསོ་བ་དང་། ཉམས་པ་རྣམས་བསྐྱེད་པ་དང་། ཆད་པ་རྣམས་བསྲིང་བ་དང་། འཁྱམས་པ་རྣམས་འགུགས་པའམ་བླན་པའི་ནུས་པ་འདོན་ཐབས་ཀྱི་ཆོག་གཞུང་རྣམས་ལ་ཟེར། ཆོ་ག་དེ་ནི་དམངས་ཁྲོད་ཀྱི་འཚོ་བའི་ཁྲོད་དུ་དགོན་པ་གྲྭ་ཚང་ངམ་ཁྱིམ་ཚང་སོ་སོར་གཡང་སྒྲུབ་ཚོགས་སྲོལ་མཆིས། ཚོགས་དུས་འབྲུ་རིགས་བསྡུ་བའི་སྐབས་དང་། ཡར་ངོའི་དུས། ཚེས་བཅོ་ལྔ་དང་གཟའ་སྤེན་པ་ལ་གཡང་འགུག་གི་ཆོ་ག་ངེས་པར་སྤེལ་ན་བཟང་བར་བརྩི། འདིར་གཡང་འབོད་ཅེས་པ་གཡང་འགུག་ཆོ་གའི་སྐབས་སུ་ཚིག་དོན་དེ་ལྡན་རྣམས་ལ་བརྗོད་པ་ལས་དམིགས་བསལ་གཡང་འགུགས་ཀྱི་ཆོ་གའི་རྗེས་བྱའི་སྐབས་སུ་ཕྱོགས་བཞིའི་གཡང་འབོད་ཞེས་པ་ལེའུ་ཟུར་ལ་ཡོད་པ་དེ་འདྲ་ཁོ་ན་ལ་བརྗོད་ཀྱི་མེད་པ་ཤེས་དགོས།
གཡང་མདའ། གཡང་གི་ཆོ་ག་སྒྲུབ་དུས་གཡང་མདའ་ཞེས་དར་མཚོན་སྣ་ལྔ་སྤྲས་པའི་མདའ་ཞིག་དགོས་པ་ནི། མདའ་དང་འཕང་གཉིས་ཕོ་མོ་གཉིས་ཀྱི་མཚོན་བྱེད་ཡིན་ཏེ། ཕོའི་ལག་ཆ་གཙོ་བོ་མདའ་དང་མོའི་ལག་ཆ་གཙོ་བོ་འཕང་ཡིན་པས། ཕོ་སྐྱེས་རྣམས་ཀྱིས་འཕང་མི་འཁེལ་བ་དང་། མོ་སྐྱེས་རྣམས་ཀྱིས་མདའ་བཟུང་ནས་ལས་མི་བྱེད་པ་རེད། མདའ་ཡི་རིགས་ལ། མཚོན་ཆའི་མདའ་དང་གཡང་མདའ། རྟེན་མདའ་དང་ཚེ་མདའ་སོགས་ཡོད།
གཡང་དར། གཡང་དར་ཞེས་པའི་དར་འདི་གཡང་མདའ་ལ་མེད་དུ་མི་རུང་བའི་རྫས་ཁྱད་པར་ཅན་ཞིག་ཏུ་བརྩི་བར་མ་ཟད། དར་དེ་ནི་སྤྱིར་དཀར་པོ་དྲི་མ་མེད་པ་སྲིད་དུ་རིང་བ་ཞིག་དགོས། ད་ལྟ་མང་ཆེ་བས་ཁ་བཏགས་དཀར་པོ་ཞིག་གི་སྣེ་མོ་གཅིག་གཡང་མདའི་རྩེ་ལ་འདོགས་པ་དང་། སྣེ་མོ་ཡ་གཅིག་དར་མཚོན་སྣ་ལྔ་དང་ལྷན་དུ་ཐུར་དུ་དཔྱངས་ཡོད་པ་ཞིག་རེད།
གཡང་རྟེན། གཡང་འབོད་བྱེད་སྐབས་གཡང་རྟེན་ནི་མེད་དུ་མི་རུང་ལ། རྟེན་ཞེས་པ་ནི་གཡང་ངམ་གཡང་གི་ལྷ་རྣམས་དེ་ལ་བརྟེན་ནས་དབབ་པའི་རྟེན་གཞིའམ་གནས་ཡུལ་ལྟ་བུ་ཞིག་ཏུ་གོ་བ་ཡིན། གཡང་རྟེན་ལ་དར་ཚོན་སྣ་ལྔ་དང་གཡང་སྒམ། རིན་ཆེན་སྣ་ལྔ་སོགས་ཅི་རིགས་ཡོད། ད་དུང་གཡང་སྒམ་ནང་དུ་གཡང་ཆོ་གའི་ནང་གསལ་བར་ལྟར་མཆོད་ཤོམ་སོགས་སྒྲིག་དགོས་པ་དང་། གཡང་ཁུག་ནང་དུ་ལོ་རེ་བཞིན་འབྲུ་རིགས་སྣ་ལྔ་དང་། གསེར་དངུལ་གཡུ་བྱུར་མུ་ཏིག་སོགས་རིན་པོ་ཆེ་རིགས་མི་འདྲ་བ། དངུལ་དངོས་སོགས་རིན་ཐང་ཅན་གྱི་ཅ་དངོས་མི་འདྲ་བ་ཁ་སྣོན་དུ་བླུགས་ཏེ་དར་ཚོན་སྣ་ལྔས་བཅིངས་པ་དང་མདུད་པ་བརྒྱབ་དགོས། ཉིན་མཐའ་མར་དེ་བཞིན་གཡང་སྒམ་ཁ་བརྒྱབ་སྐབས་དར་ཚོན་སྣ་ལྔས་བཅིངས་པ་དང་དམ་ཕྲུག་བརྒྱབ་ཏེ་བཀྲ་ཤིས་ཚིགས་བཅད་སོགས་ཀྱིས་མཐར་རྒྱན་བྱ་དགོས་སོ། །
