༄༅། །དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་འདུས་མང་གིས་མཁན་རབས་བརྒྱད་ཅུ་པ་སྐྱབས་རྗེ་བློ་གླིང་མཁན་ཟུར་རིན་པོ་ཆེ་རྗེ་བཙུན་བློ་བཟང་ཡེ་ཤེས་དཔལ་བཟང་པོ་མཆོག་དགོངས་པར་རྫོགས་པའི་འདས་མཆོད་ཚོགས་པ། 

ཕྱི་ལོ་ ༢༠༢༢ ཟླ་བ་ ༡༠ ཕྱི་ཚེས་ ༥ དགོང་དྲོ་ཕྱག་ཚོད་ ༧ པ་ཙམ་ལ་མཁན་ཟུར་བླ་བྲང་གི་གཟིམ་ཤག་ཏུ་འདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་ཕྱིར་རེ་ཞིག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པའི་ཡིད་སྐྱོའི་གནས་ཚུལ་བྱུང་བར། དཔལ་ལྡན་འབྲས་སྤུངས་མཁས་མང་བློ་གསལ་གླིང་གྲྭ་ཚང་གི་མཁན་བླ་འདུས་སྤྱི་ཡོངས་ནས་གདུང་ཤུགས་དྲག་པོས་མྱ་ངན་གུས་འདུད་ཞུས་པ་དང་།
དེ་ནས་མཁན་ཟུར་བླ་བྲང་དང་འབྲས་བློ་གླིང་སྤོམ་ར་ཁམས་ཚན་དུ་བུ་སློབ་རྣམས་ཀྱིས་རྒྱན་འཇུག་སོགས་སྐྱོར་སྦྱོང་གནང་བ་དང་། ཕྱི་ཉིན་སྒོ་བློ་གྲྭ་ཚང་གཉིས་ཀྱིས་འདུས་མང་གིས་འབྲས་སྤུངས་ཚོགས་ཆེན་དུ་མངོན་རྟོགས་རྒྱན་སྐྱོར་བརྡ་གནང་། དགོང་དྲོར་གྲྭ་ཚང་རང་གིས་མཁན་པོ་མཁན་ཟུར་དང་གནས་བརྟན་བགྲེས་པ་གང་ཞིག་སྐུ་གཤེགས་ཚེ་གནང་སྲོལ་ཡོད་པ་ལྟར་འབྲས་བློ་གླིང་འདུས་མང་གིས་དབུ་མ་འཇུག་པ་སོགས་སྐྱོར་སྦྱོང་གནང་བ་དང་། གྲྭ་ཚང་གིས་དགེ་འདུན་རེར་སྐུ་ཡོན་ཧིན་སྒོར་བརྒྱ་རེ་འབུལ་བ་དང་། བླ་བྲང་དང་ཕྱིར་སྡོད་བུ་སློབ་རྣམས་ཀྱིས་ཀྱང་སྐུ་ཡོན་བཅས་ཀྱི་བསྙེན་བཀུར་ཞུས།
འཇམ་མགོན་བསྟན་པའི་གསལ་བྱེད་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་གི་གདན་རབས་བརྒྱད་ཅུ་པ་སྐྱབས་རྗེ་མཁན་ཟུར་རིན་པོ་ཆེ་རྗེ་བཙུན་བློ་བཟང་ཡེ་ཤེས་དཔལ་བཟང་པོ་མཆོག་ནི་ཕྱི་ལོ་ ༡༩༣༩ ལོར་བོད་ཁམས་རྒྱལ་ཐང་དུ་ཡབ་ཉི་པད་དགྲ་ལྷ་དང་། ཡུམ་བདེ་སྐྱིད་མཚོ་མོ་གཉིས་ཀྱི་སྲས་སུ་སྐུ་འཁྲུངས། ཕྱི་ལོ་ ༡༩༤༦ ལོར་དགུང་ལོ་བདུན་ལ་ཕེབས་སྐབས་རྒྱལ་ཐང་དགའ་ལྡན་སུམ་རྩེན་གླིང་གི་ཆོས་སྒོར་ཞུགས་ཏེ་སྐྱབས་རྗེ་ཟངས་འབུམ་རིན་པོ་ཆེ་རྗེ་བཙུན་ངག་དབང་བློ་བཟང་བསྟན་འཛིན་རྒྱ་མཚོ་མཆོག་གི་དྲུང་དུ་དགེ་ཚུལ་གྱི་སྡོམ་པ་བཞེས་ནས་བོད་ཡིག་དང་ཆོས་སྤྱོད་སོགས་ལ་སློབ་གཉེར་མཛད།
ཕྱི་ལོ་ ༡༩༥༥ ལོར་དགུང་ལོ་བཅུ་དྲུག་ལ་ཕེབས་སྐབས་དཔལ་ནཱ་ལེནྡྲ་གཉིས་པར་གྲགས་པའི་ཆོས་སྡེ་ཆེན་པོ་དཔལ་ལྡན་འབྲས་དཀར་སྤུངས་པའི་ཡ་གྱལ་མཁས་མང་བློ་གསལ་གླིང་གི་ཆོས་སྒོར་ཞུགས་ཏེ་མཁས་ཞིང་གྲུབ་པའི་དབང་ཕྱུག་མདོ་སྔགས་གཞུང་ལུགས་རབ་འབྱམས་སྨྲ་བ་ཡོངས་ཀྱི་དགེ་བའི་བཤེས་གཉེན་ཆེན་པོ་སྤོམ་ར་ཁྲི་ཆེན་རྡོ་རྗེ་འཆང་རྗེ་བཙུན་ཡེ་ཤེས་དོན་འགྲུབ་དཔལ་བཟང་པོ་མཆོག་དང་། ཡོངས་ཀྱི་དགེ་བའི་བཤེས་གཉེན་ཆེན་པོ་ཕ་ར་མཁན་ཟུར་རིན་པོ་ཆེ་རྒན་པདྨ་རྒྱལ་མཚན་མཆོག། ཤག་སྐོར་མཁན་རིན་པོ་ཆེ་རྒན་ཉི་མ་རྒྱལ་མཚན་སོགས་བཤེས་གཉེན་དུ་མའི་དྲུང་དུ་གཞུང་ཆེན་མོར་ཐོས་བསམ་སྒོམ་པ་ཚུལ་བཞིན་གནང། ཕྱི་ལོ་ ༡༩༥༩ ལོར་རྒྱ་གར་དུ་ཕེབས་ནས་སྦག་ས་དང་མོན་གྷོ་བཅས་སུ་སློབ་གཉེར་མུ་མཐུད་གནང་། ཕྱི་ལོ་ ༡༩༦༤ ལོར་རྡ་ས་ཕོ་བྲང་རྙིང་པའི་ནང་༸གོང་ས་༸སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་སྐུ་མདུན་དུ་བསྙེན་རྫོགས་ཀྱི་སྡོམ་པ་བཞེས། ཕྱི་ལོ་ ༡༩༧༧ ནས་ལོ་གསུམ་རིང་གྲྭ་ཚང་རིན་པོ་ཆེའི་ཕྱག་མཛོད་ཀྱི་ཐུགས་འགན་བཞེས།
ཕྱི་ལོ་ ༡༩༨༥ ལོར་དགེ་ལྡན་གཙུག་ལག་སློབ་གཉེར་ཁང་དུ་ཞུགས་ཏེ། ཕྱི་ལོ་ ༡༩༩༠ ལོར་ཝ་རཱ་ན་སིར་དུས་འཁོར་དབང་ཆེན་སྐབས་༸གོང་ས་༸སྐྱབས་མགོན་ཆེན་པོ་མཆོག་གི་སྤྱན་སྔར་གཞུང་ཆེན་ཀ་པོད་ལྔའི་བགྲོ་གླེང་གནང་སྟེ་དགེ་བཤེས་ལྷ་རམས་པའི་མཚན་གནས་བཞེས། ཁོང་གི་སྔོན་ནས་ད་བར་སློབ་མ་རྣམས་ལ་ཕྱག་དཔེ་ཁྲིད་གནང་མཛད། ཕྱི་ལོ་ ༡༩༩༥ ལོ་དཔལ་ལྡན་འབྲས་དཀར་སྤུངས་པའི་ཚོགས་ཆེན་ཞལ་ངོ་དང་མཁས་མང་བློ་གསལ་བྱེ་བའི་གླིང་གྲྭ་ཚང་གི་དགེ་བསྐོས་གཅིག་ལྕོགས་ལོ་གཅིག་ཐུགས་འགན་བཞེས་ཏེ་ཆོས་ཁྲིམས་དང་སློབ་གཉེར་བཅས་ལ་དག་ཐེར་ལེགས་པ་མཛད།
ཕྱི་ལོ་ ༢༠༠༨ ལོར་སྐྱབས་རྗེ་མཁན་རིན་པོ་ཆེ་རྟོགས་ལྡན་སྤྲུལ་སྐུ་གྲགས་པ་བློ་བཟང་བསྟན་པའི་རྒྱལ་མཚན་མཆོག་གིས་བླ་མ་གཞུང་ལས་པ་བསྐོ་བཞག་གནང་བ་བཞིན་ལོ་ངོ་བདུན་རིང་གཞུང་ལས་པའི་ཐུགས་འགན་བཞེས། ཕྱི་ལོ་ ༢༠༡༣ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་ལྡན་མཁས་མང་བློ་གསལ་གླིང་གི་ཆོས་སྲིད་གཉིས་ཀྱི་དབུ་འཁྲིད་སྐྱབས་རྗེ་མཁན་རིན་པོ་ཆེའི་ཕྱག་རྟགས་རིན་པོ་ཆེ་སྤྱི་བོའི་རྒྱན་དུ་བསྩལ་བ་བཞིན། མཁན་པོའི་མཛད་འགན་དུས་ཡུན་ལོ་ངོ་དྲུག་རིང་གྲྭ་ཚང་གི་ཕྱག་སྲོལ་བཟང་པོ་ཉམས་པ་སོར་ཆུད་དང་མི་ཉམས་གོང་འཕེལ་མཛད། མདོར་ན་སྐུ་ཚེ་ཧྲིལ་པོ་བསྟན་པའི་བྱ་བ་ཁོ་ནས་དུས་འདའ་བར་མཛད་པའི་རླབས་ཆེན་གྱི་མཛད་འཕྲིན་རྒྱ་ཆེར་བསྐྱངས་པ་དག་ལ་དད་གུས་ཆེན་པོས་ཡི་རངས་བསྔགས་བརྗོད་ཞུ་རྒྱུ་དང་། དམ་པ་གང་གི་མཛད་འཕྲིན་དེ་དག་རྗེས་སུ་དྲན་ཞིང་རླབས་ཆེན་ཟག་མེད་ཐུགས་ཀྱི་དགོངས་པ་ཟབ་མོ་རྣམས་ཡོངས་སུ་རྫོགས་ཏེ་སླར་ཡང་བསྟན་འགྲོའི་མགོན་དཔུང་དམ་པར་མཁས་བཙུན་བཟང་གསུམ་ལྡན་པའི་ཡང་སྲིད་འཁྲུལ་བྲལ་མྱུར་དུ་བྱོན་ནས་གོང་མའི་རྣམ་ཐར་གཙང་མ་བདག་གིར་བཞེས་ཐུབ་པའི་སྨོན་འདུན་ཤུགས་དྲག་ཞུ།