༄༅། །དཔལ་ལྡན་འབྲས་སྤུངས་བློ་གསལ་གླིང་སྒོམ་སྒྲུབ་དང་ཚན་རིག་ལྟེ་གནས་ཁང་དུ་དབྱར་ཁའི་ཚན་རིག་ཟབ་སྦྱོང་འཚོགས་པ།

དེ་རིང་སྟེ་སླར་ཡང་ཕྱི་ལོ་ ༢༠༢༢ ཟླ་བ་ ༥ པའི་ཚེས་ ༦ ཉིན་གྱི་ཕྱི་དྲོར་རྒྱ་གར་ལྷོ་ཕྱོགས་དཔལ་ནཱ་ལནྡཱ་གཉིས་པ་དཔལ་ལྡན་འབྲས་སྤུངས་བློ་གསལ་གླིང་སྒོམ་སྒྲུབ་དང་ཚན་རིག་ལྟེ་གནས་ཁང་དུ་ལོ་ལྟར་དབྱར་ཁ་དང་དགུན་ཁའི་ཟབ་སྦྱོང་ཐེངས་གཉིས་རེ་ཡོད་པ་ལྟར། ལོ་འདིའི་དབྱར་ཁའི་ཚན་རིག་ཟབ་སྦྱོང་ཐེངས་དང་པོ་དབུ་ཚུགས་ཡོད། འདིའི་ཐོག་སྐུ་མགྲོན་གཙོ་བོ་དགེ་ལྡན་རྒྱལ་སྤྱིའི་ལྷན་ཚོགས་ཀྱི་ངེས་སྟོན་པ་སྒོ་མང་མཁན་ཟུར་རིན་པོ་ཆེ་བློ་བཟང་རྒྱལ་མཚན་མཆོག་དང་། དགེ་ལྡན་རྒྱལ་སྤྱིའི་ལྷན་ཚོགས་ཀྱི་དྲུང་ཆེ་གཞོན་པ་བློ་གླིང་མཁན་རིན་པོ་ཆེ་བློ་བཟང་བསམ་གཏན་མཆོག ། ཨ་རི་ཨེ་མོ་རིའི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་མཁས་དབང་ལོ་ཙཱ་བ་དགེ་བཤེས་བློ་བཟང་བསྟན་འཛིན་མཆོག་བཅས་གདན་ཞུས་གནང་བ་དང་། ཁོང་རྣམས་ཀྱིས་ཚན་རིག་ཟབ་སྦྱོང་གི་སྐོར་ལ་བཀའ་སློབ་སྩལ། སྐབས་འདིའི་ཚན་རིག་ཟབ་སྦྱོང་གི་སློབ་མ་གདན་ས་ཆེན་པོ་གསུམ་གྱི་གྲྭ་ཚང་དྲུག་དང་། ར་སྟོད། བཀྲ་ཤིས་ལྷུན་པོ་བཅས་ཀྱི་དགེ་འདུན་པ་ཚན་རིག་གོ་རྟོགས་མཐོན་པོ་ཡོད་པ། ཚན་རིག་ཐོག་ཆེད་ལས་པ་དང་རྩེ་ཕུད་གྲས། ཚན་རིག་དགེ་རྒན་བཅས་དགེ་འདུན་པ་བརྒྱ་ལྷག་མཉམ་ཞུགས་གནང་ཡོད། ཚན་རིག་ཟབ་སྦྱོང་ཐོག་དགེ་རྒན་དང་སློབ་ཕྲུག་མི་སྐྱ་འགའ་ཡང་མཉམ་ཞུགས་གནང་ཡོད། དེ་བཞིན་ཚེས་༩ ནས་བཙུན་མའི་དགོན་སྡེ་ཁག་ནས་བཙུན་མ་བརྒྱ་ལྷག་མཉམ་ཞུགས་གནང་རྒྱུ་ཡིན་པ་དང་། ད་ལྟའི་སྦྱང་བྱ་གཙོ་བོ་ནི་དངོས་རྫས་བརྟག་དཔྱད་དང་། སེམས་ཁམས་རིག་པའི་སྐོར་ཡིན་ཞིང་། འཛིན་གྲྭ་ཁག་གཉིས་སུ་བགོས་ཏེ་དགེ་འདུན་པ་རྣམས་ཁག་གཅིག་དང་། བཙུན་མ་རྣམས་ཁག་གཅིག་བཅས་ཕྱོགས་གཉིས་སུ་འཚོགས་རྒྱུ་ཡིན་པ་རེད།