༄༅། །དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གྲྭ་ཚང་དུ་ཞྭ་སེར་བསྟན་པའི་གཙུག་རྒྱན་འཇམ་མགོན་༸རྒྱལ་བ་གཉིས་པའི་གདུང་འཚོབ་དགའ་ལྡན་ཁྲི་ཐོག་ ༡༠༥ པ་༸རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་དགའ་ལྡན་གསེར་ཁྲི་མངའ་གསོལ་གྱི་རྟེན་འབྲེལ་མཛད་སྒོ་གནང་བ།
དེ་ཡང་༸རྒྱལ་བ་ལྷ་ལས་བབས་པའི་དུས་ཚིགས་ཁྱད་པར་ཅན། བོད་རྒྱལ་ལོ་ ༢༡༥༡ ཟླ་ ༩ ཚེས་ ༢༢ ཕྱི་ལོ་ ༢༠༢༤ ཟླ་ ༡༡ ཚེས་ ༢༢ རེས་གཟའ་པ་སངས་ཞོགས་པར་འཇམ་མགོན་བསྟན་པའི་སྣང་བྱེད༸སྐྱབས་རྗེ་་ཤར་པ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག བྷེང་ལོར་ནས་འབྲས་སྤུངས་ཚུལ་ཁང་ཁམས་ཚན་གཟིམ་ཤག་ཏུ་ཆིབས་བསྒྱུར་གནང་ཡོད། སྐབས་དེར་འབྲས་སྤུངས་ཁྲི་པ་རིན་པོ་ཆེ་མཆོག་དང་། གྲྭ་ཚང་གི་༸སྐྱབས་རྗེ་མཁན་རིན་པོ་ཆེ་མཆོག དབུ་ཆོས་རྣམ་པ། བཀའ་རབ་འབྱམས་དགེ་བའི་བཤེས་གཉེན་རྣམ་པ། འདུས་ཚོགས་མང་དང་བཅས་པས་ཕེབས་བསུ་གཟབ་རྒྱས་ཞུས།
ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བ་གཉིས་པའི་གདུང་འཚོབ་དགའ་ལྡན་ཁྲི་ཐོག་ ༡༠༥ པའི་ཁྲི་འདོན་གསེར་ཁྲིར་མངའ་གསོལ་གྱི་ཆེད་རིགས་དང་དཀྱིལ་འཁོར་རྒྱ་མཚོའི་ཁྱབ་བདག་འཁོར་ལོའི་མགོན་པོ་མཚུངས་མེད་དཔལ་ལྡན་བླ་མ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་འབྲས་སྤུངས་ཚུལ་ཁང་ཁང་ཚན་ནས་འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་དུ་ཆིབས་བསྒྱུར་བཀའ་དྲིན་མཛད་སྐབས་མོན་གྷོ་གཞིས་གྲོང་དྲུག་པའི་སྐལ་བཟང་ལྷ་ཁང་དུ་དགའ་ལྡན་ཕུ་ཁང་ཁང་ཚན་ནས་ཕེབས་བསུའི་སྒྲ་སྒྲིག་དང་། མོན་གྷོ་ཁུལ་གྱི་ས་ཚུགས་གཉིས་པར་དགའ་ལྡན་ཤར་རྩེ་གྲྭ་ཚང་ནས་ཕེབས་བསུའི་གྲ་སྒྲིག །མོན་གྷོ་བརྩེ་ཆེན་མདོ་སྔགས་ཆོས་གླིང་གྲྭ་ཚང་དུ་དགའ་ལྡན་ཚོགས་ཆེན་ནས་ཕེབས་བསུའི་གྲ་སྒྲིག་བཅས་དང་། གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ་ཕེབས་འབྱོར་གྱི་མཚམས་ནས་སྒོ་ཆེན་གྱི་མདུན་ནས་སྐུ་ཕྱག་ཕུལ་ཅིང་ཐུགས་སྨོན་དང་འབྲེལ་ནས་མཆོད་འབྲས་ཐོར་ཕུལ་གནང་། གྲུབ་མཚམས་ནས་ཤར་བྱང་གྲྭ་ཚང་གཉིས་ཀྱི་དགེ་འདུན་འདུས་མང་ནས་དུང་རྒྱ་སྤོས་སྣེ་དབུ་གདུགས་དང་བཅས་གསེར་སྦྲེང་གི་དགའ་ལྡན་ཕུ་ཁང་ཁང་ཚན་དུ་ཕེབས་བསུ་དང་འདི་གར་གནད་ཡོད་ལས་སྣེ་རྣམ་པའི་དབུས་འདུས་ཚོགས་ནས་ཕེབས་སྟོན་གྱི་མཛད་སྒོ་དང་ཚོགས་ལངས་བཅས་བཞེངས།
ཕྱི་ལོ་ ༢༠༢༤ ཟླ་ ༡༡ ཚེས་ ༢༦ གཟའ་སྐར་འཕྲོད་སྦྱོར་དགེ་བའི་ཉིན། ཞྭ་སེར་བསྟན་པའི་གཙུག་རྒྱན་༸འཇམ་མགོན་རྒྱལ་བ་གཉིས་པའི་གདུང་འཚོབ་དགའ་ལྡན་ཁྲི་ཆེན་རྡོ་རྗེ་འཆང་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་འཇམ་མགོན་རྒྱལ་བ་གཉིས་པའི་མི་འཇིགས་སེང་གེ་ཁྲིར་དབང་བསྐུར་བའི་ཁྲི་འདོན་སྐལ་བཟང་དུས་ཀྱི་དགའ་སྟོན་གྱི་ཉིན་མོའི་མཛད་སྒོ་དངོས་གཞིར། ཞོགས་པ་ཆུ་ཚོད་དྲུག་པའི་ཐོག་སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་དགའ་ལྡན་ཕུ་ཁང་ཁང་ཚན་ནས་དབུས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྐུ་ངོ་སྤེན་པ་ཚེ་རིང་མཆོག་དང་། དགའ་ལྡན་ཕོ་བྲང་གི་སྐུ་ཚབ་ཡང་སྟེང་རིན་པོ་ཆེ། དཔལ་སྐྱ་སྒྲོལ་མ་ཕོ་བྲང་གི་སྐུ་ཚབ། ཁྲིམས་ཞིབ་པ་གཞན་བསྟན་འཛིན་ལུང་རྟོགས་ལགས། ཤར་བྱང་གྲྭ་ཚང་གཉིས་ཀྱི་སྐྱབས་གནས་མཁན་རིན་པོ་ཆེ་རྣམ་པ་གཉིས་ཀྱི་དབུས་གདན་གསུམ་གྲྭ་ཚང་དྲུག་དང་རྫོང་དཀར་ཆོས་སྡེ། བཀྲ་ཤིས་ལྷུན་པོ། རྭ་སྟོད་གྲྭ་ཚང་གཙོས་ཆོས་བརྒྱུད་རིས་མེད་ཀྱི་དགོན་སྡེ་ཁག་གི་མཁན་ལས་ཟུར་རྣམ་པ། བོད་མི་མང་སྤྱི་འཐུས་རྣམ་པ་ཁག་ཅིག ལྷོ་སྤྱི་སྐུ་ངོ་། ལྡི་ལི་དོན་གཅོད་ཁང་གི་དྲུང་ཆེ། མོན་གྷོ་ས་གནས་འགོ་འཛིན། དབུས་ཆུ་བཞི་སྒང་དྲུག་གི་རྒྱུན་ལས། དགོན་སྡེ་གྲྭ་ཚང་སོ་སོའི་འཐུས་མི་སྐུ་ཚབ་རྣམ་པ། གཞན་ཡང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་འཐུས་མི་རྣམ་པ་བཅས་ནས་དུང་རྒྱ་སྤོས་སྣེ་དབུ་གདུགས་དང་བཅས་གསེར་སྦྲེང་ཐོག་དགའ་ལྡན་ཚོགས་ཆེན་དུ་གདན་ཞུས་དང་། ཕེབས་མཚམས་ནས་སྐུ་ཕྱག་དང་ཐུགས་སྨོན་མཚམས་སྦྱར་གྱིས་མཆོད་འབྲས་ཐོར་ཕུལ་གྱི་རྟེན་གཙོ་ཁག་ལ་སྙན་ཤལ་དང་སྣང་གསལ་མར་མེ་ཞལ་ཁ་ཕྱེ་གནང་མཛད། དེ་ནས་མི་གཇིགས་གདོང་ལྔའི་གཏེགས་པའི་གསེར་གྱི་ཁྲི་འཕང་མཐོན་པོར་གཞུགས་གསོལ་མཛད་ནས་ཚོགས་ཆེན་དབུ་མཛད་ནས་དཔལ་ལྡན་ཡོན་ཏན་དབུ་བསྐུལ་གྱི་གསེར་ཁྲི་མངའ་གསོལ་གྱི་ཁྲི་འདོན་མཛད་སྒོ་དངོས་གཞི་ཚོགས་གནང་ཡོད།
ཕྱི་ལོ་ ༢༠༢༤ ཟླ་ ༡༡ ཚེས་ ༢༧ གཟའ་སྐར་ཕུན་སུམ་ཚོགས་པའི་འཕྲོད་སྦྱོར་དང་བསྟུན་རི་བོ་དགེ་ལྡན་པའི་ཆོས་བརྒྱུད་འཛིན་པའི་ལྷ་སྡེ་མི་སྡེ་ཡོངས་ནས་འཇམ་མགོན་རྒྱལ་བའི་གདུང་འཚོབ་སྐྱབས་རྗེ་དགའ་ལྡན་ཁྲི་རིན་པོ་ཆེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་དང་། ཞྭ་སེར་བསྟན་པའི་གཙུག་རྒྱན་སྐྱབས་རྗེ་དགའ་ལྡན་ཁྲི་ཟུར་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་རྣམ་གཉིས་རྗེ་བླ་མ་ཙོང་ཁ་པ་ཆེན་པོའི་དཀའ་བ་བརྒྱ་ཕྲག་དུ་མའི་སྒོ་ནས་དག་ཐེར་ལེགས་པར་མཛད་པའི་མདོ་སྔགས་ཟུང་འབྲེེལ་གྱི་བསྟན་པ་གསེར་གྱི་ཡང་ཞུན་ལྟ་བུ་འདི་ཉིད་ཕྱོགས་དུས་གནས་སྐབས་ཐམས་ཅད་དུ་གོང་ནས་གོང་དུ་འཕེལ་བ་དང་བདག་སོགས་རྗེས་སུ་འཇུག་པའི་གདུལ་བྱ་ཐམས་ཅད་ཀྱི་མགོན་དཔུང་དམ་པར་སྐུ་ཚེ་མི་གཤིགས་རྡོ་རྗེ་ཁམས་སུ་བརྟན་པ་དང་རླབས་ཆེན་ཐུགས་ཀྱི་བཞེད་པ་མཐའ་དག་འབད་མེད་ལྷུན་གྱིས་འགྲུབ་ཕྱིར་ཤར་རྩེ་མཁན་རིན་པོ་ཆེ་བྱང་ཆུབ་སངས་རྒྱས་མཆོག་ནས་སློབ་དཔོན་མཛད་དེ་བླ་མ་མཆོད་པའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་གནང་།
བོད་རྒྱལ་ལོ་ ༢༡༥༡ ཟླ་ ༩ ཚེས་ ༢༨ ཕྱི་ལོ་༢༠༢༤ ཟླ་ ༡༡ ཚེས་ ༢༨ གཟའ་སྐར་འཕྲོད་སྦྱོར་དགེ་བའི་ཉིན། འཇམ་མགོན་རྒྱལ་བའི་གདུང་འཚོབ་དགའ་ལྡན་ཁྲི་ཆེན་རྡོ་རྗེ་འཆང་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་དུ་མི་འཇིགས་གདོང་ལྔའི་གཏེགས་པའི་གསེར་གྱི་ཁྲི་འཕང་མཐོན་པོར་ཞབས་ཟུང་གསེར་གྱི་འཁོར་ལོ་རེ་ཁ་མངོན་པར་བཀོད་པའི་གསེར་ཁྲི་མངའ་གསོལ་གྱི་མཛད་སྒོ་ལེགས་པར་བསྐྱངས་ཏེ་འབྲས་སྤུངས་བློ་གསལ་གླིང་གྲྭ་ཚང་གི་གཙུག་ལག་ཁང་དུ་ཆིབས་བསྒྱུར་བཀའ་དྲིན་མཛད་སྐབས་འབྲས་སྤུངས་ཁྲི་པ་རིན་པོ་ཆེ་མཆོག་དང་། མཁན་རིན་པོ་ཆེ་མཆོག་གི་དབུས་དབུ་ཆོས་རྣམ་པ་དང་། བླ་སྤྲུལ། དགེ་བའི་བཤེས་གཉེན་རྣམ་པ་དང་། འདུས་ཚོགས་དམངས་དང་བཅས་པའི་གསེར་སྦྲེང་ཐོག་དུང་བརྒྱ་སྤོས་སྣེ་དབུ་གདུགས་དང་བཅས་བསུ་མ་ཞུས་ཏེ་ཁྲི་ཆེན་རྡོ་རྗེ་འཆང་ཆེན་པོ་མཆོག་སྐུ་ཚེ་ཡུན་དུ་བརྟན་པ་དང་། རླབས་ཆེན་ཐུགས་བཞེད་ལྷུན་གྲུབ་ཡོང་བ་སོགས་ཀྱི་རྟེན་འབྲེལ་ལེགས་ཚོགས་རྒྱས་པའི་ཕྱིར་མཎྜལ་རྟེན་གསུམ་འདེགས་འབུལ་དང་ཞལ་འདོན་གནས་བཅུ་དང་། ཁྲི་རིན་པོ་མཆོག་གི་ཞབས་བརྟན་གསོལ་འདེབས་གསུང་གནང་། སྐུ་མགྲོན་རྣམས་ལ་ཉིན་གུང་གསོལ་ཚིགས་འབུལ་ལམ་ཞུས་ཏེ་མཛད་སྒོ་བཀྲ་ཤིས་པའི་ངང་གྲོལ།
མཛད་སྒོར་དམིགས་གསལ་སྐུ་མགྲོན། དབུས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྐུ་ངོ་སྤེན་པ་ཚེ་རིང་མཆོག་དང་། དཔལ་སྐྱ་པའི་སྒྲོལ་མ་ཕོ་བྲང་གི་སྐུ་ཚབ། ཁྲིམས་ཞིབ་པ་གཞན་བསྟན་འཛིན་ལུང་རྟོགས་ལགས། དགོན་སྡེ་གྲྭ་ཚང་ཁག་གི་མཁན་ལས་ཟུར་རྣམ་པ། བོད་མི་མང་སྤྱི་འཐུས་རྣམ་པ་ཁག་ཅིག ལྷོ་སྤྱི་སྐུ་ངོ་དོན་གཅོད། བྷེང་ལོར་སྨན་རྩིས་མཐོ་སློབ་ཁང་གི་འགན་འཛིན་སྨན་རམས་པ་རྡོ་རྗེ་རབ་བརྟན་ལགས། མོན་གྷོ་ས་གནས་གཞིས་ངོ་། དབུས་ཆུ་བཞི་སྒང་དྲུག་གི་རྒྱུན་ལས། དགོན་སྡེ་གྲྭ་ཚང་སོ་སོའི་འཐུས་མི་སྐུ་ཚབ་རྣམ་པ། གཞན་ཡང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་འཐུས་མི་རྣམ་པ་བཅས་མཉམ་བཞུགས་གནང་ཡོད།
ཕྱི་ལོ་༢༠༢༤ ཟླ་ ༡༡ ཚེས་ ༢༩ གཟའ་སྐར་འཕྲོད་སྦྱོར་དགེ་བའི་ཉིན། འབྲས་བློ་གླིང་ཚུལ་ཁང་ཁམས་ཚན་དུ་གོང་བཞིན་རྟེན་འབྲེལ་མཛད་སྒོ་གནང་ཡོད།
