༄༅། །དཔལ་ལྡན་འབྲས་སྤུངས་མཁས་མང་བློ་གླིང་གྲྭ་ཚང་གིས་རྟགས་རིགས་འཛིན་གྲྭར་གསར་ཞུགས་པ་རྣམས་རྒྱུགས་སྤྲོད་ཀྱི་ལམ་ནས་རྟགས་རིགས་འཛིན་གྲྭ་གསར་བཟོ་གནང་བ།

ཕྱི་ལོ་༢༠༢༢ ལོའི་ཟླ་བ་ ༩ ཚེས་ ༡༣ ཉིན་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གྲྭ་ཚང་གི་སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག་དབུ་བཞུགས། བླ་མ་གཞུང་ལེན་པ་ཏྲེ་ཧོར་དགེ་བཤེས་ཡེ་ཤེས་ཆོས་འཕེལ་མཆོག །ཁྲིམས་བདག་དགེ་བསྐོས་ཕུ་ཁང་དགེ་བཤེས་ཐུབ་བསྟན་ལྷུན་འགྲུབ་མཆོག །བློ་གླིང་རྒྱུགས་སྤྲོད་ཚོགས་ཆུང་གི་ཚོགས་གཙོ་གཙང་པ་དགེ་བཤེས་རྣམ་རྒྱལ། བསྡུས་གྲྭ་འཛིན་གྲྭ་ནས་རྟགས་རིགས་འཛིན་གྲྭར་གསར་ཞུགས་པ་བཅས་གདན་འཛོམས་པའི་དབུས་སུ་སློབ་གཉེར་བ་རེ་ནས་རིགས་པའི་ལམ་ནས་རྟགས་བསལ་རེ་དང་ལན་རེ་བཏབ་ཟིན་རྗེས་སྐྱབས་རྗེ་མཁན་རིན་པོ་ཆེ་དབུས་གོང་བཞིས་བརྒྱ་ཆ་ཕུལ་ཏེ་ཕྱོགས་བསྡོམས་བྱས་ནས་བརྒྱ་ཆ་མཐོ་ཤོས་དེ་ལ་སྐྱབས་རྗེ་མཁན་རིན་པོ་ཆེ་མཆོག་གིས་སྐྱོར་དཔོན་གྱི་མིང་གནང་བ་དང་། དེ་ནས་རིམ་བཞིན་མིང་གཉིས་པ་ནས་བརྒྱད་པའི་བར་མིང་གནང་སྲོལ་ཡོད་པ་ལྟར་མིང་གནང་། ལོ་འདིའི་རྟགས་རིགས་འཛིན་གྲྭའི་སྐྱོར་དཔོན་ནི་ཕ་ར་བློ་བཟང་ཚེ་བརྟན། མིང་གཉིས་པ་ཏྲེ་ཧོར་མཁན་སྤྲུལ་བསྟན་འཛིན་རྣམ་གྲོལ། མིང་གཉིས་པ་དཔེ་ཐུབ་དཀོན་མཆོག་རང་གྲོལ། མིང་གསུམ་པ་ཕ་ར་ཚེ་རིང་བཀྲ་ཤིས། དེ་ནས་ལྷོ་པ་བློ་བཟང་དོན་ལྡན། ཀླུ་འཁྱིལ་བསྟན་འཛིན་འཕེལ་རྒྱས། གྲགས་པ་འཇམ་དཔལ་ཐོགས་མེད། ཕ་ར་ཉི་མ་དབང་འདུས། ཕ་ར་མ་ནི་བློ་བཟང་ཆེ་བ། ཕ་ར་མ་ནི་བཀྲ་ཤིས། ཕ་ར་ལེགས་བཤད་སངས་རྒྱས། དཔེ་ཐུབ་བསྟན་འཛིན་སེམས་མཆོག་བཅས་ལ་རིམ་བཞིན་མིང་གནང་། རྟགས་རིགས་འཛིན་གྲྭ་ལ་གསར་དུ་ཞུགས་མཁན་སློབ་གཉེར་བ་ཞལ་གྲངས་བདུན་ཅུ་དོན་གཅིག་ཡོད་ཅིང་། ཁོང་རྣམས་ལ་སྐྱབས་རྗེ་མཁན་རིན་པོ་ཆེ་མཆོག་གིས་སློབ་གཉེར་ལ་རྟིང་སྐུལ་གྱི་བཀའ་སློབ་རྒྱ་ཆེར་སྩལ་བ་དང་སྦྲགས་བསླབ་པ་སློབ་གཉེར་མཐར་སོན་ཡོང་སླད་ཞབས་རིམ་ཞིག་ཀྱང་བསྒྲུབ་དགོས་པའི་བཀའ་ཕེབས། རྟགས་རིགས་འཛིན་གྲྭ་གསར་བཟོ་དང་འབྲེལ་བའི་རྒྱུགས་སྤྲོད་ཁག་གི་འགན་འཁྱེར་མཁན་གཙོ་བོ་རྒྱུགས་སྤྲོད་ཚོགས་ཆུང་ཡིན་ཞིང་། ལོ་གཅིག་གི་རྒྱུགས་སྤྲོད་ཀྱི་བྱེད་སྒོ་གང་ཡོད་རྒྱུགས་སྤྲོད་ཚོགས་ཆུང་སུ་འཁེལ་ཡོད་ན་འགན་འཁྱེར་ནས་ལས་དོན་འཐུས་ཤོར་མེད་པར་གནང་དགོས།