༄༅། །བོད་རྒྱལ་ལོ་༢༡༤༩ ལོའི་ཟླ་བཞི་པ་ས་ག་ཟླ་བ་དང་འབྲེལ་ཏེ་སྒྲོལ་དཀར་ཡིད་བཞིན་འཁོར་ལོའི་སྒོ་ནས་ཚེ་སྒྲུབ་ཆེན་མོ་འཚོགས་པ།

༄༅། །བོད་རྒྱལ་ལོ་༢༡༤༩ ལོའི་ཟླ་བཞི་པ་ས་ག་ཟླ་བ་དང་འབྲེལ་ཏེ་སྒྲོལ་དཀར་ཡིད་བཞིན་འཁོར་ལོའི་སྒོ་ནས་ཚེ་སྒྲུབ་ཆེན་མོ་འཚོགས་པ། གངས་ཅན་གྱི་དཔལ་ནཱ་ལནྡཱ་ཆེན་མོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་འདུས་མང་གིས་ས་ག་ཟླ་བའི་ཚེས་༨ ནས་ཚེས་༡༥ བར་ལོ་བསྟར་ཆགས་སུ་ཚོགས་བཞིན་པ་ལྟར་ལོ་འདིར་ཡང་ས་ག་ཟླ་བའི་ནང་གཙོ་བོ་རང་ཅག་རྣམས་ཀྱི་འདི་དང་ཕྱི་མའི་སྐྱབས་གནས་འཛམ་གླིང་ཞི་བདེའི་དེད་དཔོན་བོད་འབངས་ཡོངས་ཀྱི་མགོན་སྐྱབས་བླ་ན་མཆིས་པ་ཆེན་པོ་༸སྤྱི་ནོར་༸གོང་ས་སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་རྗེ་བཙུན་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་དབུས་རིས་མེད་བསྟན་འཛིན་གྱི་སྐྱེས་ཆེན་རྣམས་སྐུ་ཚེ་བརྟན་ཅིང་རླབས་ཆེན་བཞེད་དགོངས་མཐའ་དག་ལྷུན་གྱིས་འགྲུབ་པ་དང་། གྲྭ་ཚང་གི་༸སྐྱབས་རྗེ་དགའ་ལྡན་ཁྲི་ཟུར་རིན་པོ་ཆེ་རི་རྫོང་སྲས་རྗེ་བཙུན་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་དཔལ་བཟང་པོ་྄མཆོག་དང་།༸ སྐྱབས་རྗེ་ཤར་པ་ཆོས་རྗེ་རིན་པོ་ཆེ་བློ་བཟང་རྡོ་རྗེ་དཔལ་བཟང་པོ་མཆོག ། ༸སྐྱབས་རྗེ་གླིང་མཆོག་སྤྲུལ་རིན་པོ་དབུས་མཁན་བླ་འདུས་མང་ཡོངས་ཀྱི་ཐོས་བསམ་སྒོམ་གསུམ་སོགས་བསླབ་གསུམ་ཉམས་བཞེས་ཀྱི་བྱ་བ་རྣམས་གེགས་མེད་ལམ་ལྷོང་དང་། རྣམ་དཀར་ཆོས་སྤྱོད་ཀྱི་བྱ་བ་རྣམས་དབྱར་གྱི་མཚོ་ཆེན་ལྟར་རྒྱས་ཤིང་། ཕྱོགས་བཅུའི་དགེ་འདུན་གྱི་སྡེ་རྣམས་ཐུགས་མཐུན་ཁྲིམས་གཙང་བའི་སྒོ་ནས་ལུང་སྡེ་སྣོད་གསུམ་གྱི་འཆད་ཉན་དང་ལམ་བསླབ་པ་གསུམ་གྱི་ཉམས་ལེན་འཕེལ་ཞིང་ཕ་རོལ་མི་དང་མི་མིན་གྱི་བསམ་སྦྱོར་ངན་པའི་རིགས་ཞི་ནས་རྟག་ཏུ་ཆོས་ཀྱི་བསམ་པ་དང་མི་འབྲལ་བ་དང་། འཛམ་གླིང་ས་སྒང་རིལ་པོ་འདིའི་ཐོག་ཏུ་མུ་གེ་དམག་འཁྲུག་མི་ཡོང་ཞིང་ཆར་ཆུ་དུས་འབབ་ལོ་ཕྱུགས་རྟག་ལེགས་ཡོང་སྟེ་ཞི་བདེའི་དཔལ་ཡོན་ལ་རྟག་ཏུ་ལོངས་སྤྱོད་རྒྱུ་ཡོང་བ་དང་། བོད་བསྟན་སྲིད་མི་རིགས་ཀྱི་ཆབ་དཔལ་རིག་གསུམ་མཐའ་དག་རྒྱས་ཤིང་གཞིས་བྱེས་མཉམ་འཛོམས་དགའ་སྟོན་གྱི་ཉི་མ་མྱུར་དུ་འཆར་བ་དང་། གྲྭ་ཚང་ལ་སྔ་ཕྱི་བར་གསུམ་དུ་སྦྱིན་བདག་གནང་བའི་འབྲེལ་ཡོད་འདས་གསོན་ཡོངས་ཀྱི་ཆེད་ས་ག་ཟླ་བའི་ཚེས་༨ ནས་ ༡༥ བར་སྔ་དྲོར་འཕགས་མ་སྒྲོལ་མ་ཡིད་བཞིན་འཁོར་ལོའི་སྒོ་ནས་ཚེ་སྒྲུབ་དང་། རྒྱལ་བའི་བཀའ་འགྱུར་རིན་པོ་ཆེ་དག་སྒྲོག །སྒྲོལ་ཆོག་དང་འབྲེལ་བའི་སྒྲོལ་མ་འབུམ་ཐེར་བཅས་གསལ་བསྒྲགས་ནང་གསལ་ལྟར་ཞབས་རིམ་ཁག་སྒྲུབ་བཞིན་པ་བཅས།