༄༅། །རིགས་དང་དཀྱིལ་འཁོར་རྒྱ་མཚོའི་མངའ་བདག་གྲུབ་དབང་སྟག་ཕུ་རྡོ་རྗེ་འཆང་གཏེར་ཆེན་པདྨ་བཛྲའི་སྐྱེ་སྤྲུལ་སྟག་ཕུ་སྤྲུལ་སྐུ་བསྟན་འཛིན་ཆོས་ཀྱི་དབང་ཕྱུག་མཆོག་དཔལ་ལྡན་འབྲས་སྤུངས་ཆོས་སྡེ་ཆེན་མོར་ཆོས་ཞུགས་གནང་བ།

རིགས་དང་དཀྱིལ་འཁོར་རྒྱ་མཚོའི་མངའ་བདག་འཕགས་མཆོག་འཇིག་རྟེན་དབང་ཕྱུག་ཕྱག་ན་པདྨོའི་རྣམ་འཕྲུལ་ཁྱབ་བདག་སྟག་ཕུ་བ་ཆེན་པོ་ཞེས་མཚན་ཡོངས་སུ་གྲགས་པ་འདི་ཉིད་སྔོན་ཚེ་སངས་རྒྱས་འོད་སྲུང་སྐབས་ནས་སྐྱེས་རབས་ཀྱི་ཕྲེང་བ་བཟུང་ཞིང་། སྟག་ཕུ་སྐུ་རབས་སྔོན་མ་ནི་རྗེ་བླ་མ་ཙོང་ཁ་པའི་དངོས་སློབ་ཁྲི་སྟེང་མཛེས་པའི་བླ་ཆེན་བཞིའི་ཡ་གྱལ་ཀཽ་ཤི་དཔལ་ལྡན་དོན་འགྲུབ། དགའ་ལྡན་ཁྲི་ཐོག་ཉི་ཤུ་པ་སྟག་ཕུ་བ་ཀཽ་ཤི་ངག་དབང་ཆོས་གྲགས་བཟང་པོ། སྟག་ཕུ་རྡོ་རྗེ་འཆང་ངམ་གཏེར་ཆེན་པདྨ་བཛྲ་སོགས་བསྟན་པ་འཛིན་པའི་གཙུག་གི་རྒྱན་དུ་གྱུར་ཅིང་གསང་གསུམ་གྱི་མཛད་འཕྲིན་ངོ་མཚར་རྨད་དུ་བྱུང་བའི་མཚན་སྙན་ཆེ་བ་ཤ་སྟག་ཕེབས་པར་སྣང་། གྲུབ་དབང་སྟག་ཕུ་རྡོ་རྗེ་འཆང་སྐུ་ཕྲེང་དགུ་པ་རྗེ་བཙུན་ངག་དབང་བློ་བཟང་བསྟན་འཛིན་ཆོས་ཀྱི་ཉི་མའི་སྐྱེ་ཕྲེང་བཅུ་པ་མཆོག་སྤྲུལ་སྟག་ཕུ་བསྟན་འཛིན་ཆོས་ཀྱི་དབང་ཕྱུག་མཆོག །ཕྱི་ལོ་ ༢༠༢༢ སྤྱི་ཟླ་ ༥་པའི་ཚེས་༤ ཉིན་གངས་ཅན་གྱི་དཔལ་ནཱ་ལནྡཱ་གཉིས་པ་ཆོས་སྡེ་ཆེན་པོ་དཔལ་ལྡན་འབྲས་སྤུངས་ཚོགས་ཆེན་སྤྲུལ་སྐུ་ཆེ་ཁག་གདན་ཐོབ་ཐོག་ཆོས་ཞུགས་གནང་ཡོད། དེ་ཡང་ཐོག་མར་འབྲས་སྤུངས་ཚོགས་ཆེན་ཡང་སྟེང་ནས་མང་ཇའི་ཆབ་སྐད་སྐྱོན་ནས་བྱིན་རླབས་གནང་བ་དང་། དབུ་མཛད་ཀྱིས་ཞལ་འདོན་སྐུལ། གྲྭ་མང་རྣམས་ཚོགས་ཞུགས་གྲུབ་མཚམས་འབྲས་སྤུངས་ཚོགས་ཆེན་ཁྲི་པ་རིན་པོ་ཆེ་རྗེ་བཙུན་དཀོན་མཆོག་དཔག་བསམ་མཆོག་དང་། བློ་གླིང་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག །སྒོ་མང་མཁན་རིན་པོ་ཆེ་རྗེ་བཙུན་འཇིགས་མེད་རྒྱ་མཚོ་མཆོག །འབྲས་སྤུངས་ཚོགས་ཆེན་ཞལ་ངོ་རྣམ་པ་གཉིས། སྟག་ཕུ་མཆོག་སྤྲུལ་རིན་པོ་ཆེ་བསྟན་འཛིན་ཆོས་ཀྱི་དབང་ཕྱུག །འབྲས་སྤུངས་བླ་སྤྱིའི་ཕྱག་མཛོད། ལྷོ་པ་ཁམས་ཚན་རྒན། ཀོང་པོ་ཁམས་ཚན་རྒན་དང་ནགས་ཤོད་སྡེ་དགོན་གྱི་སྐུ་ཚབ་ཡབ་ཡུམ་ནང་མི་སྤུན་མཆེད་སོགས་ཀྱིས་ ༧ རྒྱལ་བའི་གཟིམས་ཆུང་འབྲས་སྤུངས་དགའ་ལྡན་ཕོ་བྲང་ནས་༧ རྒྱལ་བའི་སྐུ་པར་མཐོང་གྲོལ་རིན་པོ་ཆེར་སྤོས་སྣེ་དར་དཀར་དང་བཅས་གདན་ཞུས་གནང་སྟེ་ཚོགས་ཆེན་འདུ་ཁང་ནང་གི་༧ རྒྱལ་བའི་བཞུགས་ཁྲི་སྟེང་དུ་བཞུགས་སུ་གསོལ་བ་དང་། སྟག་ཕུ་མཆོག་སྤྲུལ་རིན་པོ་ཆེས་༧ རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་དང་། སྟོན་པ་ཐུབ་པའི་དབང་པོ་གཙོས་རྟེན་གསུམ་རྣམས་དང་སྲུང་མ་ཁང་ལ་མཇལ་དར་འབུལ་བ་དང། སྤྱན་འདྲེན་པ་རྣམས་ཀྱང་བཞུགས་གྲལ་སོ་སོར་འཁོད། སྟག་ཕུ་བླ་བྲང་ནས་དགེ་འདུན་པ་རྣམས་ལ་གསོལ་ཇ་བཞེས་བག་སྐུ་འགྱེད་བཅས་ཀྱིས་བསྙེན་བཀུར་གྱ་ནོམ་པར་བྱས་ཏེ་མང་ཇ་གྲོལ་བ་དང་། སྟག་ཕུ་མཆོག་སྤྲུལ་རིན་པོ་ཆེ་མཁས་མང་བློ་གསལ་བྱེ་བའི་གླིང་གི་ཆོས་རར་གདན་ཞུས་གནང་གྲུབ་མཚམས། གྲྭ་ཚངགི་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག་ལས། བསྡུས་གྲྭའི་དབུ་ནས། ཕྱོགསབཅུའི་རྒྱལ་ཀུན་འདུས་པའི་ངོ་བོ་ནི།། ཞེས་སོགས་ལན་གསུམ་རེ་སྐྱོར་སྦྱོང་གནང་སྟེ་བརྩི་བཞག་གསན། དེ་ནས་བསྡུས་གྲྭ་འཛིན་གྲྭ་རྣམས་ཀྱི་དབུས་སུ་དམ་བཅར་བཞུགས། དགའ་ལྡན་ཁྲི་ཐོག་བརྒྱ་པ་མཆོག་གི་ཡང་སྤྲུལ་རིན་པོ་ཆེ་དང་། ཏྲེ་ཧོར་མཁན་སྤྲུལ་བསྟན་འཛིན་རྣམ་གྲོལ་རིན་པོ་ཆེ་དང་། སྤང་དགོན་མཆོག་སྤྲུལ་བསྟན་འཛིན་ཆོས་ཀྱི་རྒྱལ་མཚན་བཅས་ནས་རྟགས་བསལ་གཏོང་གནང་བ་ལ་ལན་འདེབས་གནང་སྟེ་གྲུབ་མཚམས་ཆོས་ར་ལས་ཕྱིར་ཕེབས ། དེ་ནས་རིན་པོ་ཆེ་དང་ཡབ་ཡུམ་སྐུ་འཁོར་ལྷན་རྒྱས་རྣམས་གྲྭ་ཚང་གི་རབ་གསལ་ཐོག་ཁར་ཕེབས་ཤིང་རྒྱལ་བའི་སྐུ་དཔར་མཐོང་གྲོལ་རིན་པོ་ཆེ་ཚོགས་དབུས་སུ་གདན་དྲངས་ཏེ་རིན་པོ་ཆེའི་མཎྜལ་རྟེན་གསུམ་འབུལ་གནང་མཛད་ནས་ཚོགས་ལ་བཞུགས་གནང་མཛད། གྲྭ་མང་ལ་ཞལ་ལག་ཕུལ་མཚམས་ཕྱག་མཛོད་དང་ཡབ་ཡུམ་སྐུ་འཁོར་དང་ལྷོ་པ་ཁམས་ཚན་རྒན་དང་ཀོང་པོ་ཁམས་ཚན་རྒན་སོགས་ཀྱིས་སྤོས་སྣེ་དྲངས་ཏེ་ཚོགས་དབུས་སུ་སྤོས་བསྐོར་དང་གྲྭ་མང་ལ་སྐུ་འགྱེད་དང་མཇལ་དར་སོགས་འབུལ་གནང་མཛད། ཚོགས་གྲོལ་བ་དང་རིན་པོ་ཆེ་དང་སྐུ་འཁོར་རྣམས་ལྷོ་པ་ཁམས་ཚན་གྱི་ཐོག་ཁར་རིན་པོ་ཆེའི་གཟིམ་ཆུང་ནང་དུ་ཕེབས་ནས་ནགས་ཤོད་སྡེ་དགོན་གྱི་སྐུ་ཚབ་རྣམས་པས་རྟེན་སུམ་འདེགས་འབུལ་གྲོལ་བ་དང་། དེ་ནས་ལྷོ་པ་ཁམས་ཚན་གྱི་སྤྱི་རྒན་དང་ཁམས་ཚན་རྒན་གཉིས་ཀྱི་ཆོས་གོས་དང་རྩེ་ཞྭ་མནབས་ནས་སྤོས་སྣེ་དྲངས་ཏེ་རིན་པོ་ཆེ་ལྷོ་པ་ཁམས་ཚན་གྱི་ཚོམས་ནང་དུ་གདན་འདྲེན་ཞུས། རིན་པོ་ཆེས་རྒྱལ་བའི་བཞུགས་ཁྲི་དང་རྟེན་གཙོ་ཁག་ལ་མཇལ་དར་ཕུལ་ནས་བཞུགས་ཁྲི་ལ་འཁོད། ལྷོ་པ་ཁམས་ཚན་རྒན་ནས་བཀྲ་ཤིས་མཇལ་དར་དང་མཎྜལ་རྟེན་གསུམ་སྣ་ཚོགས་རྡོ་རྗེའི་གདན་སོགས་ཕུལ་དེ་ནས་ཁམས་ཚན་ཉེར་བཞིའི་ཁམས་རྒན་རྣམས་དང་མཁན་ལས་ཟུར་རྒྱལ་སྲས་བླ་སྤྲུལ་ཁག་དང་དགེ་འདུན་དམངས་དང་ཕྱོགས་མཐའ་ཁག་ནས་ཕེབས་པའི་སྐུ་མགྲོན་ལྷག་པར་དུ་ནགས་ཤོད་དགོན་སྡེ་ཁག་གི་སྐུ་ཚབ་སོགས་ནས་བཀྲ་ཤིས་རྟེན་འབྲེལ་གྱི་མཇལ་དར་དང་སྐུ་གསུང་ཐུགས་རྟེན་ན་གཟའ་སྣེ་གསུམ་སོགས་འབུལ་ཚན་སྣ་ཚོགས་ཕུལ་ནས་ཉིན་དེར་མཛད་སྒོ་ལེགས་པར་གྲུབ་བོ།། ཕྱི་ཉིན་༢༠༢༢་༥་ཚེས་༥ཉིནཀོང་པོ་ཁམས་ཚན་འདུ་ཁང་དུ་མཆོག་སྤྲུལ་རིན་པོ་ཆེ་ཁྲིའི་སྟེང་དུ་བཞུགས་པ་དང་བཀའ་རབ་འབྱམས་དགེ་བའི་བཤེས་གཉེན་གནས་བརྟན་བགྲེས་སོང་རྣམས་དང་། བློ་གསལ་གླིང་དང་སྒོ་མང་ནས་ཕེབས་པའི་རྒྱལ་སྲས་བླ་སྤྲུལ་ཁག་དང་ཕྱག་མཛོད་དང་ཉེ་ལོགས་ཁམས་ཚན་འབྲེལ་ཡོད་དགེ་འདུན་པ་རྣམས་ཀྱིས་རྟེན་གསུམ་འདེགས་འབུལ་དང་མཇལ་དར་སོགས་འབུལ་ཟིན་མཚམས་བླ་སྤྲུལ་དང་དགེ་བའི་བཤེས་གཉེན་གྲྭ་ཚང་གི་ལས་བྱེད་ཆེ་ཕྲ་ཆུང་ཕྲ་ཀུན་ལ་བློ་གླིང་གཙུག་ལག་ཁང་གི་གསོལ་ཚིགས་ཁང་ནང་ཉིན་གུང་བཞེས་ལག་གཟབ་རྒྱས་ཤིག་ཕུལ་ཏེ་མཛད་སྒོ་གྲོལ་ཡོད །། སྟག་ཕུ་སྐུ་ཕྲེང་བཅུ་པ་བསྟན་འཛིན་ཆོས་ཀྱི་དབང་ཕྱུག་མཆོག་ནི། ཕྱི་ལོ་༢༠༠༨ ཟླ་༦ཚེས་༡༧ ཉིན་རྒྱ་གར་ཤར་ཕྱོགས་མོན་ཡུལ་གྱི་ཁོངས་སུ་གཏོགས་པ་འབུམ་སྡེ་ལ་བསྟན་འཛིན་སྒང་བཙན་བྱོལ་བོད་མིའི་གཞིས་གྲོང་དང་པོ་རུ།ཡབ་བློ་བཟང་དོན་གྲུབ་དང་ཡུམ་བློ་བཟང་ཆོས་སྒྲོན་གཉིས་ཀྱི་སྲས་སུ་སྐུ་འཁྲུངས། ཆུང་དུས་ཀྱི་མཚན་བསྟན་འཛིན་དཔལ་བཟང་ཞེས་གསོལ། ཕྱི་ལོ་༢༠༡༡ ཟླ་ ༡༠ཚེས་ ༡༢ ཉིན་༧ སྤྱི་ནོར་གོང་ས་སྐྱབས་མགོན་ཆེན་པོ་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཡེ་ཤེས་དབྱིངས་དཔྱད་ཀྱིས་གྲུབ་དབང་སྟག་ཕུ་རྡོ་རྗེ་འཆང་གི་ཡང་སྲིད་དུ་ངོས་འཛིན་མཛད། ༢༠༡༢ ཟླ་ ༡ ཚེས་༡༨ ཉིན་༧གོང་ས་མཆོག་གིས་གཙུག་ཕུད་འབུལ་བཞེས་གནང་ནས་མཚན་ལ་བསྟན་འཛིན་ཆོས་ཀྱི་དབང་ཕྱུག་ཅེས་བསྩལ། ༢༠༡༢ ཟླ་བ་༡ ཚེས་༣༡ ཉིན་འབྲས་སྤུངས་ལྷོ་པ་ཁམས་ཚན་དུ་ཞུགས། ༢༠༡༢ ཟླ་༢ ཚེས་༡༧ ཉིན་རྡ་ས་མེས་དབོན་དཔེ་སྟོན་སློབ་གྲྭར་ཞུགས། ༢༠༢༡ ཟླ་བ་༡༢ ཚེས་༢༩ ཉིན་འཛིན་རིམ་བདུན་པ་གྲུབ་ནས་རྒྱལ་བའི་མདོ་རྒྱུད་གཞུང་རྒྱ་མཚོར་གསན་བསམ་སློབ་གཉེར་གྱི་ཆེད་དུ་བཞུགས་སྒར་རྡ་ས་ནས་རྒྱ་གར་ལྷོ་ཕྱོགས་ཀྱི་གདན་ས་དཔལ་ལྡན་འབྲས་དཀར་སྤུངས་པའི་ཆོས་སྡེ་ཆེན་པོར་ཞབས་སོར་བཀོད། ༢༠༢༢ ཟླ་༤ཚེས་༡༤་ཉིན་༧གོང་ས༧སྐྱབས་མགོན་ཆེན་པོ་མཆོག་གིས་མཆོག་སྤྲུལ་རིན་པོ་ཆེའི་ཞབས་བརྟན་གསོལ་འདེབས་ལྗགས་རྩོམ་བཀའ་དྲིན་ཆེ་བ་གནང་། ཕྱི་ལོ་ ༢༠༢༢ ལོའི་ཟླ་ ༥ ཚེས་ གཟའ་སྐར་འཕྲོད་སྦྱོར་ཕུན་སུམ་ཚོགས་པའི་ཉིན་དཔལ་ལྡན་འབྲས་སྤུངས་ཚོགས་ཆེན་དང་། མཁས་མང་བློ་གསལ་བྱེ་བའི་གླིང་གྲྭ་ཚང་དུ་ཆོས་ཞུགས་གནང་ཡོད་པ་བཅས་ཀྱི་མཛད་རྣམ་མདོར་བསྡུས་སུ་བཀོད་པའོ།།