༄༅། །རིགས་བརྒྱའི་ཁྱབ་བདག་འཁོར་ལོའི་མགོན་པོ་མཁན་ཟུར་བཀའ་འགྱུར་བ་སྐྱབས་རྗེ་བྲག་གཡབ་རྟོགས་ལྡན་རིན་པོ་ཆེ་མཆོག་གིས་རྗེ་ཡབ་སྲས་གསུམ་གྱི་གསུང་འབུམ་ལྗགས་ལུང་གནང་གྲུབ་སྟེ་གཏང་རག་མཎྜལ་འབུལ་བཞེས་མཛད་པ།
ཁྱབ་བདག་བཀའ་འགྱུར་བ་འབྲས་བློ་གླིང་མཁན་ཟུར་རིན་པོ་ཆེ་སྐྱབས་རྗེ་རྟོགས་ལྡན་རིན་པོ་ཆེ་རྗེ་བཙུན་གྲགས་པ་བློ་བཟང་བསྟན་པའི་རྒྱལ་མཚན་དཔལ་བཟང་མཆོག་གིས་ཕྱི་ལོ་༢༠༡༧ ལོར་རྗེ་ཙོང་ཁ་པ་ཡབ་སྲས་གསུམ་གྱི་གསུང་འབུམ་གྱི་ལྗགས་ལུང་གནང་རྒྱུའི་དབུ་འཛུགས་གནང་།
གསུང་ཆོས་ཐེངས་དང་པོ་ཕྱི་ལོ་༢༠༡༧ ཟླ་༤ ཚེས་ ༡༣ ནས་ཚེས་༢༧ བར།
གསུང་ཆོས་ཐེངས་གཉིས་པ་ཕྱི་ལོ་༢༠༡༨། ལོའི་ཟླ་ ༡༠ ཚེས་ ༢༡ ནས་ཟླ་བ་༡༡ པའི་༢༡ བར།
གསུང་ཆོས་ཐེངས་གསུམ་པ་ཕྱི་ལོ་༢༠༡༩ ལོའི་ཟླ་བ་ ༡༡ ཚེས་ ༨ ནས་ཟླ་བ་༡༡ ཚེས་ ༢༧ བར།
གསུང་ཆོས་ཐེངས་བཞི་པ་ཕྱི་ལོ་༢༠༢༢ ཟླ་བ་ ༡༠ ཚེས་༡༦ ནས་ཚེས་༢༧ བར་ཉིན་རྒྱབ་ཆུ་ཚོད་ ༢ ནས་ ༥ པའི་བར་དང་། ཚེས་༢༨ ནས་ཕྱི་ཟླ་ ༡༡ ཚེས་༩ བར་སྔ་དྲོ་ ཆུ་ཚོད་ ༨ ནས་ ༡༡ དང་ཕྱེད་བར། ཉིན་རྒྱབ་ཆུ་ཚོད་ ༢ པ་ནས་༥ དང་ཕྱེད་བར། ཚེས་ ༡༠ ཉིན་རྒྱབ་ཆུ་ཚོད་༡།༣༠ ནས་༥།༣༠ བར། ཚེས་༡༩ མཁས་གྲུབ་རྗེའི་གསུང་འབུམ་ལྗགས་ལུང་གནང་གྲུབ།
གསུང་ཆོས་གནང་ཡུལ་རྒྱ་གར་ལྷོ་ཕྱོགས་མོན་གྷོ་ས་གནས་སུ་རྟེན་གཞི་བྱས་པའི་འབྲས་སྤུངས་བློ་གསལ་གླིང་གི་གཙུག་ལག་ཁང་།
ཐེངས་འདིའི་གསུང་ཆོས་གོ་སྒྲིག་པའམ་སྦྱིན་བདག་གཙོ་བོ་འབྲས་སྤུངས་བློ་གསལ་གླིང་གྲྭ་ཚང་། བློ་གླིང་སྤྲུལ་སྐུ་ལྷན་ཚོགས། དགེ་ལྡན་ཕ་ཆོས་བུ་ཆོས་གཅེས་སྐྱོང་ཁང་། སྒ་པ་རྣམ་སྲས་ཚང་བཅས་ཡིན། གསུང་ཆོས་ཞུ་མཁན་ཡང་གྲྭ་ཚང་སྒོ་བློ་གཉིས་ཀྱི་མཁན་རིན་པོ་ཆེ་རྣམ་གཉིས་དང་། ཀུན་བདེ་གླིང་རིན་པོ་ཆེ། དགའ་བྱང་གསེར་ཀོང་རྡོ་རྗེ་འཆང་། དགེ་ལྡན་ཕ་ཆོས་བུ་ཆོས་གཅེས་སྐྱོང་ཁང་གི་དབུ་འཛིན་སླེ་ལུང་རིན་པོ་ཆེ་དབུས་གདན་ས་གྲྭ་ཚང་ཁག་གི་བླ་སྤྲུལ་དུ་མ་དང་། གདན་ས་ཆེན་པོ་གསུམ་དང་བཀྲ་ཤིས་ལྷུན་པོ། རྭ་སྟོད་སོགས་ནས་དགེ་བཤེས་དང་དགེ་འདུན་པ་བཙུན་མ་བཅས་ཆིག་སྟོང་ལྔ་བརྒྱ་ལྷག་གསུང་ཆོས་ཞུ་མཁན་འདུ་འཛོམས་བྱུང་ཡོད།
ཚེས་༢༠ སྔ་དྲོ་ཆུ་ཚོད་ ༨ པའི་ཐོག་ཁྱབ་བདག་བཀའ་འགྱུར་བ་སྐྱབས་རྗེ་འབྲས་བློ་གླིང་མཁན་ཟུར་རིན་པོ་ཆེ་རྗེ་བཙུན་གྲགས་པ་བློ་བཟང་བསྟན་པའི་རྒྱལ་མཚན་དཔལ་བཟང་མཆོག་ལ་རྗེ་ཡབ་སྲས་གསུམ་གྱི་གསུང་འབུམ་ལྗགས་ལུང་ལེགས་པར་གྲུབ་པའི་བཀའ་དྲིན་གཏང་རག་དང་སྐུ་ཚེ་ཞབས་པད་བསྐལ་བརྒྱར་བརྟན་སླད་བརྟན་བཞུགས་འབུལ་བར་ཡང་ཐོག་མར་བློ་གླིང་གྲྭ་ཚང་གི་དབུ་མཛད་ཆེན་མོ་དགེ་བཤེས་ཨ་དགའ་མཆོག་གིས་གནས་བཅུ་དང་འབྲེལ་བའི་ཁྲུས་གསོལ་དང་བླ་མཆོད་ཀྱི་ཚོགས་བཅས་དབུ་སྐུལ་གནང་སྟེ་བརྟན་བཞུགས་འབུལ་བར་གནང་།
འབྲས་བློ་གླིང་སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་དཔལ་བཟང་པོ་མཆོག་གིས་རྡོར་སློབ་གནང་སྟེ་བཀྲ་ཤིས་པའི་རྫས་བརྒྱད་དང་ན་བཟའ་སོགས་རིམ་གྱིས་འབུལ་ཏེ་བཀྲ་ཤིས་པའི་ཚིགས་བཅད་སོགས་གསུང་། བློ་གླིང་ཁྲིམས་བདག་དགེ་བསྐོས་དགེ་བཤེས་ཐུབ་བསྟན་ལྷུན་འགྲུབ་མཆོག་གིས་ལོ་བཞིའི་རིང་གི་གསུང་ཆོས་སྐབས་སུ་བྱུང་སོང་རྩིས་ཁྲ་ལྗགས་ཀློག་དང་། སྦྱིན་བདག་ཁག་དང་ལས་སྒྲུབ་པ་རྣམས་ལ་ཐུགས་རྗེ་ཆེ་ཞུའི་གསུང་བཤདགནང་། བརྟན་བཞུགས་སུ་གོང་ཞུས་བླ་སྤྲུལ་ཁག་དང་སྒོ་མང་ཁན་རིན་པོ་ཆེ་། ཤར་རྩེ་མཁན་རིན་པོ་ཆེ་བྱང་ཆུབ་སངས་རྒྱས་མཆོག ། བྱང་རྩེ་མཁན་རིན་པོ་ཆེ་བློ་བཟང་བསྟན་པ་མཆོག །རྭ་སྟོད་མཁན་རིན་པོ་ཆེ་ཐུབ་བསྟན་ལྷུན་འགྲུབ་མཆོག་དབུས་བཀའ་རབ་འབྱམས་དགེ་བའི་བཤེས་གཉེན་འདུས་པ་སྟོང་ཕྲག་གཉིས་ལྷག་འཛོམས་ཡོད། ཚོགས་སུ་བླ་མ་རིན་པོ་ཆེ་ལ་སྐུ་གསུང་ཐུགས་རྟེན་འབུལ་མཚོན་དང་བཅས་འདུས་ཚོགས་སུ་གསོལ་ཇ་གྲོ་མ་འབྲས་སིལ་དང་སྐུ་འགྱེད་ཚོགས་རྫས་སོགས་གཟབ་རྒྱས་འབུལ་ཏེ་ཆུ་ཚོད་༡༡ ཙམ་ལ་བརྟན་བཞུགས་ཆེན་མོ་གྲོལ་ཡོད།
