༄༅། །གངས་ཅན་གྱི་དཔལ་ནཱལནྡཱ་གཉིས་པ་དཔལ་ལྡན་འབྲས་དཀར་སྤུངས་པའི་ལྷ་མི་ཡོངས་ཀྱིས་ཇི་ལྟར་གསོལ་བ་བཏབ་པ་ལྟར་གངས་ཅན་འགྲོ་བའི་སྐྱབས་གཅིག་༧ སྤྱི་ནོར་༧ གོང་ས་ ༧ སྐྱབས་མགོན་རྒྱལ་དབང་ཐམས་ཅད་མཁྱེན་པ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་དཔལ་བཟང་པོ་མཆོག་དཔལ་ལྡན་འབྲས་སྤུངས་པའི་ཁྲི་པའི་མཚན་གནས་བཞེས་རྒྱུའི་བཀའ་བཞེས་བཟང་པོ་ཐོབ།
༄༅། །གངས་ཅན་གྱི་དཔལ་ནཱལནྡཱ་གཉིས་པ་དཔལ་ལྡན་འབྲས་དཀར་སྤུངས་པའི་ལྷ་མི་ཡོངས་ཀྱིས་ཇི་ལྟར་གསོལ་བ་བཏབ་པ་ལྟར་གངས་ཅན་འགྲོ་བའི་སྐྱབས་གཅིག་༧ སྤྱི་ནོར་༧ གོང་ས་ ༧ སྐྱབས་མགོན་རྒྱལ་དབང་ཐམས་ཅད་མཁྱེན་པ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་དཔལ་བཟང་པོ་མཆོག་དཔལ་ལྡན་འབྲས་སྤུངས་པའི་ཁྲི་པའི་མཚན་གནས་བཞེས་རྒྱུའི་བཀའ་བཞེས་བཟང་པོ་ཐོབ། དཔལ་ལྡན་འབྲས་དཀར་སྤུངས་པའི་ཁྲི་པ་རིན་པོ་ཆེ་བློ་གླིང་རྗེ་བཙུན་དཀོན་མཆོག་དཔག་བསམ་མཆོག་དང་། འབྲས་སྤུངས་ཁྲི་ཟུར་རིན་པོ་ཆེ་སྒོ་མང་རྗེ་བཙུན་བློ་བཟང་བསྟན་པ་མཆོག །འབྲས་བློ་གླིང་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག ། འབྲས་སྒོ་མང་མཁན་རིན་པོ་ཆེ་རྗེ་བཙུན་འཇིགས་མེད་རྒྱ་མཚོ་མཆོག །འབྲས་སྤུངས་བླ་སྤྱིའི་ཕྱག་མཛོད་དགེ་བཤེས་ཡོན་ཏན་ཕུན་ཚོགས་མཆོག་བཅས་གཙོ་བོར་༧ སྤྱི་ནོར་༧ གོང་ས་སྐྱབས་མགོན་མཆོག་མཇལ་བཅར་སྙན་གསན་སླད་འབྲས་སྤུངས་ནས་རྡ་སར་ཕེབས་ཏེ་རྣམ་རྒྱལ་གྲྭ་ཚང་དུ་བཞུགས་མུས་ངང་༧ སྤྱི་ནོར་༧ གོང་ས་སྐྱབས་མགོན་ཆེན་པོ་མཇལ་ཁ་མ་ཞུ་བའི་སྔོན་ཕྱི་ལོ་༢༠༢༢ ལོའི་ཟླ་བ་ ༥ ཚེས་ ༢༢ ཉིན་བོད་བསྟན་པ་ཆབ་སྲིད་སྤྱི་དང་། དཔལ་ལྡན་འབྲས་དཀར་སྤུངས་པའི་སྐོར་རྡ་ས་གནས་ཆུང་སྒྲ་དབྱངས་གླིང་དུ་༸རྒྱལ་བའི་བསྟན་སྲུང་སྤྲུལ་པའི་ཆོས་སྐྱོང་རྡོ་རྗེ་གྲགས་ལྡན་རྩལ་ཆེན་པོ་སྤྱན་འདྲེན་ཞུས་ཏེ་ཐུགས་དམ་ས་བོན་འབུལ་བ་ལྟར་ལུང་བསྟན་གནང་ཡོད།
ཕྱི་ལོ་༢༠༢༢ ལོའི་ཟླ་ ༥ ཚེས་ ༢༦ གཟའ་སྐར་འཕྲོད་སྦྱོར་དགེ་བའི་ཉིན་ལྷར་བཅས་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་གཅིག་པུ་འཕགས་མཆོག་འཇིག་རྟེན་དབང་ཕྱུག་འཛམ་གླིང་ཞི་བདེའི་དེད་དཔོན་ཆེན་པོ་༸གོང་ས་ལྷ་མིའི་རྣམ་འདྲེན་ྋསྐྱབས་མགོན་ྋརྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་གོང་གསལ་དཔལ་ལྡན་འབྲས་དཀར་སྤུངས་པའི་ཁྲི་རིན་པོ་ཆེ་མཆོག་དང་། འབྲས་སྤུངས་ཁྲི་ཟུར་རིན་པོ་ཆེ་མཆོག །སྒོ་བློ་གྲྭ་ཚང་གཉིས་ཀྱི་མཁན་རིན་པོ་ཆེ་རྣམ་པ་གཉིས། འབྲས་སྤུངས་བླ་སྤྱིའི་ཕྱག་མཛོད་བཅས་བཞུགས་སྒར་༸རྒྱལ་བའི་ཕོ་བྲང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཇལ་ཁ་བཀའ་དྲིན་སྩོལ་གནང་མཛད་སྐབས་དཔལ་ལྡན་འབྲས་དཀར་སྤུངས་པའི་འདུས་མང་ལ་ཡུན་རིང་ནས་མངོན་འདོད་ཡོད་པ་བཞིན་དཔལ་ལྡན་འབྲས་དཀར་སྤུངས་པའི་ལྷ་མི་ཟུང་ནས་ཇི་ལྟར་གསོལ་བ་བཏབ་པ་ལྟར། རྗེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ཆེན་པོ་མཆོག་གི་གསེར་གྱི་ཁྲི་འཕང་མཐོན་པོ་མངལ་གསོལ་རྒྱུའི་ཞལ་བཞེས་དང་འབྲས་སྤུངས་ཁྲི་པའི་མཚན་གནས་བཞེས་རྒྱུའི་བཀའ་བཞེས་བཟང་པོ་དང་ཐུགས་དགྱེས་ཚོར་ཆེན་པོས་ཞལ་བཞེས་སྤྱི་བོའི་མཛེས་རྒྱན་དུ་ཕེབས་ཤིང་། རིང་མིན་རྗེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ཆེན་པོའི་བཞུགས་ཁྲིར་མངའ་གསོལ་རྒྱུའི་ཞལ་བཞེས་བཟང་པོ་ལེགས་པར་ཐོབ་པའི་ཞབས་ཀྱི་ཆུ་སྐྱེས་འདབ་སྟོང་གསེར་གྱི་འཁོར་ལོ་དཔལ་ལྡན་འབྲས་དཀར་སྤུངས་པ་རུ་ཆིབས་ཁ་བསྒྱུར་རྒྱུའི་དུས་བཟང་གི་ཉིན་ཞིག་འཆར་རྒྱུ་ཞལ་བཞེས་གནང་ཡོད་པས་དཔལ་ལྡན་འབྲས་དཀར་སྤུངས་པའི་འདུས་མང་ཡོངས་དང་ལྷག་པར་འདི་གའི་གྲྭ་ཚང་གི་མཁན་བླ་འདུས་མང་ཡོངས་དད་གུས་སྤྲོ་གསུམ་རབ་དུ་བརྟས་ཤིང་། ༸ མགོན་པོ་གང་ཉིད་བདག་ཅག་བསྟན་འགྲོའི་མགོན་དཔུང་དམ་པར་༸སྐུ་ཚེ་བསྐལ་བརྒྱར་བརྟན་ཅིང་རླབས་ཆེན་བཞེད་དགོངས་མཐའ་དག་འབད་མེད་ལྷུན་གྱིས་འགྲུབ་ཏེ་སྐྱེ་བ་ནས་ཚེ་རབས་ཀུན་ཏུ་མ་ཡིས་བུ་ལྟར་རྗེས་སུ་འཛིན་པའི་སྙིང་ནས་སྨོན་འདུན་ཤུགས་དྲག་ཞུ།
