མཁས་མང་བློ་གསལ་གླིང་གྲྭ་ཚང་ནས་སྤྱི་སྒེར་ཀུན་ལ་དམིགས་ནས་ལོ་བསྟར་ཆགས་སུ་ཞབས་རིམ་སྒྲུབ་བཞིན་པ།
༄༅།།ཕྱི་ལོ་ ༢༠༢༢ ཟླ་བ་ ༤ ཚེས་ ༢༠ ནས་ ༢༤ བར རྒྱ་གར་ལྷོ་ཕྱོགས་དཔལ་ནཱ་ལནྡཱ་གཉིས་པ་དཔལ་ལྡན་འབྲས་སྤུངས་མཁས་མང་བློ་གསལ་གླིང་གྲྭ་ཚང་ནས་སྤྱི་སྒེར་ཀུན་ལ་དམིགས་ནས་ལོ་བསྟར་ཆགས་སུ་ཞབས་རིམ་སྒྲུབ་བཞིན་པ་ལྟར། ལོ་འདི་ལ་ཡང་དཔལ་ལྡན་འབྲས་སྤུངས་བློ་གསལ་གླིང་གཙུག་ལག་ཁང་དུ་༧སྐྱབས་རྗེ་བློ་གླིང་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་དཔལ་བཟང་པོ་མཆོག་དབུ་བཞུགས་ཐོག་དགེ་འདུན་པ་ཞལ་གྲངས་ཉིས་སྟོང་ལྷག་གིས་སྤྱིར་སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་པ་དང་། ལྷག་པར་རང་ཅག་རྣམས་ཀྱི་དཔྲལ་བའི་མིག་དང་ཁོག་པའི་སྙིང་ལྟ་བུ་འདི་དང་ཕྱི་མའི་རེ་ས་བླ་ན་མ་མཆིས་པ་ཆེན་པོ་༸སྤྱི་ནོར་༸ གོང་ས་༧སྐྱབས་མགོན་རྒྱལ་དབང་ཐམས་ཅད་མཁྱེན་པ་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་དཔལ་བཟང་པོ་མཆོག་དང་། རང་རེའི་གྲྭ་ཚང་གི་༧སྐྱབས་རྗེ་དགའ་ལྡན་ཁྲི་ཟུར་རིན་པོ་ཆེ་རྗེ་བཙུན་རི་རྫོང་སྲས་ཐུབ་བསྟན་ཉི་མ་དཔལ་བཟང་པོ་མཆོག །༧སྐྱབས་རྗེ་ཤར་པ་ཆོས་རྗེ་རིན་པོ་ཆེ་བློ་བཟང་རྡོ་རྗེ་དཔལ་བཟང་པོ་མཆོག །སྐྱབས་རྗེ་འབྲས་སྤུངས་ཁྲི་པ་རིན་པོ་ཆེ་རྗེ་བཙུན་དཀོན་མཆོག་དཔག་བསམ་དཔལ་བཟང་པོ་མཆོག་དབུས་མཁན་ལས་ཟུར་རྣམ་པ། རྒྱལ་སྲས་བླ་སྤྲུལ་ཁག ། གནས་བརྟན་བགྲེས་སོང་བཀའ་རབ་འབྱམས་དགེ་བའི་བཤེས་གཉེན། སློབ་གཉེར་གནང་བཞིན་པའི་དགེ་འདུན་འདུས་པ་རྒྱ་མཚོ་སོགས་རིས་མེད་བསྟན་འཛིན་གྱི་སྐྱེས་བུ་རྣམས་སྐུ་ཚེ་མཛད་དགོངས་འཕེལ་བ་དང་། ཕྱོགས་མཐའ་ཁག་ན་བཞུགས་པའི་གྲྭ་ཚང་གི་ཆོས་ཚོགས་ཁག་གི་དབུ་འཛིན་དང་ལས་བྱེད་པ། རྒྱ་བལ་སོགས་ཕྱོགས་མཐའ་ཁག་ལ་བཞུགས་པའི་གྲྭ་ཚང་གི་ལས་དོན་གཉེར་བའི་ལས་བྱེད་པ་ཡོངས་དང་། གཞན་ཡང་དགོན་སྡེ་དང་སློབ་གྲྭ། མང་ཚོགས་ཁག་ལ་མཛད་འཕྲིན་སྐྱོང་བཞིན་པའི་དགེ་བའི་བཤེས་གཉེན་རྣམ་པ། དད་འདུན་དང་ལྷག་བསམ་ཆེ་ཞིང་གཏོང་ཕོད་ཡངས་པའི་གྲྭ་ཚང་གི་འབྲེལ་ཡོད་སྦྱིན་བདག་ཁག་གི་བྱ་བ་མཐའ་དག་ལམ་ལྷོང་ཡོང་བ་སོགས་དང་། འཇིག་རྟེན་ཁམས་སུ་ནད་ཡམས་མུ་གེ་དམག་འཁྲུག་སོགས་བཀྲ་མི་ཤིས་པའི་མཚན་མ་ངན་པ་ཅི་མཆིས་པ་བདེ་བླག་ཏུ་ཞི་ནས་གཏན་འགྲོ་བ་རྣམས་ཀྱིས་ཕན་བདེའི་ལམ་བཟང་ལ་སྤྱོད་ཐུབ་པ་དང་། རིང་ནས་ཉིད་དུ་སྙིང་ལ་བརྣགས་པའི་བོད་ཀྱི་བདེན་མཐའ་མྱུར་དུ་གསལ་ཏེ་གཞིས་བྱེས་མཉམ་འཛོམས་ཡོང་བ་སོགས་ཀྱི་སླད་རྒྱལ་བའི་བཀའ་འགྱུར་རིན་པོ་ཆེ་དག་སྒྲོག །སྒྲོལ་ཆོག་དང་འབྲེལ་བའི་སྒྲོལ་མ་འབུམ་ཐེར། གནས་བརྟན་ཕྱག་མཆོད། དཔལ་མགོན་ཞལ་བཞི། དཔལ་ལྡན་ལྷ་མོ། རྡོ་རྗེ་གྲགས་ལྡན། དམ་ཅན་བཅས་ཀྱི་བསྐང་བཤགས་འབུམ་ཐེར་བཅས་ཉིན་ལྔ་རིང་ཞབས་རིམ་སྨིན་སྒྲུབ་བྱས།
