༄༅།། བོད་གངས་ཅན་གྱི་དཔལ་ནཱ་ལནྡཱ་གཉིས་པ་ཆོས་སྡེ་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོ་དབུ་འཛུགས་གནང་བ།
བོད་རྒྱལ་ལོ་ ༢༡༥༠ ཟླ་བ་ ༦ པའི་ཚེས་ ༡༦ དང་། ཕྱི་ལོ་ ༢༠༢༣ ཟླ་ ༨ ཚེས་ ༢ རེས་གཟའ་ལྷག་པ་ཉིན་གངས་ཅན་གྱི་དཔལ་ནཱ་ལནྡཱ་གཉིས་པ་ཆོས་སྡེ་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོ་དབུ་འཛུགས་གནང་ཡོད་ཅིང་། དེ་ཡང་སྔར་སྲོལ་བཞིན་འདི་ལོའི་ལོ་འཁོར་རྒྱུགས་སྤྲོད་དུ་དངོས་སུ་ཞུགས་དགོས་པའི་སློབ་གཉེར་བ་ཉམ་ཐག་ནད་པ་དང་གྲྭ་ཚང་གི་ལས་སྣེ་འཁེལ་བ་འགའ་རེ་མ་གཏོགས་སློབ་གཉེར་བ་ཞལ་གྲངས་༼༩༢༩༽ལོ་འཁོར་རྒྱུགས་སྤྲོད་དུ་ཞུགས་ཡོད། དེ་རིང་ནས་བཟུང་ཉིན་གསུམ་རིང་ཞོགས་ཆུ་ཚོད་༨ པ་ནས་༡༡ དང་། ཉིན་རྒྱབ་ཆུ་ཚོད་ ༢ པ་ནས་ ༥ པའི་བར་བློ་རྒྱུགས་བླང་རྒྱུ། ནམ་རྒྱུན་བློ་རྒྱུགས་ལེན་མཁན་མི་གཉིས་རེ་ཡིན་ཡང་ད་ལོར་བློ་རྒྱུགས་ལེན་མཁན་དགེ་འདུན་པ་ཞལ་གྲངས་གསུམ་རེས་བླང་དགོས་པ་གནང་ཡོད། སྐྱོར་རྒྱུགས་གྲུབ་ནས་རྩོད་རྒྱུགས་དང་དེ་ནས་བྲིས་རྒྱུགས་བཅས་རིམ་བཞིན་སྤྲོད་དགོས། རྒྱུགས་སྤྲོད་ཀྱི་དུས་ཡུན་རིང་ལྟ་རྟོག་བྱེད་མཁན་འདི་ལོའི་རྒྱུགས་ཞིབ་ལྷན་ཁང་གི་རྒྱུན་ལས་རྣམ་པ་དང་། དགེ་བསྐོས་དང་ཆབ་རིལ། གྲྭ་ཚང་གི་ཁང་ཚན་ཉེར་ལྔའི་ཁང་རྒན་རྣམས་ཀྱང་ངེས་པར་དུ་ལྟ་རྟོག་དགོས་པ་ནི་སྔ་སྲོལ་བཞིན་གནས་པར་བྱས་ཡོད། དེ་བཞིན་དུ་འཛིན་སྐྱོང་ཕྱག་མཛོད་ཁང་དང་རྒྱུགས་སྤྲོད་ཚོགས་ཆུང་ནས་རྒྱུགས་སྤྲོད་སྐབས་སུ་འགྲོ་གྲོན་ཅི་དགོས་ཀྱི་ཐད་ལ་དགོས་མཁོ་དང་འཚམ་པའི་མཉམ་རུབ་གནང་བ་སོགས། མདོར་ན་གྲྭ་ཚང་གི་སྐྱབས་རྗེ་མཁན་རིན་པོ་ཆེ་མཆོག་གིས་དབུས་རྟགས་རིགས་འཛིན་གྲྭའི་བར་ཀྱི་དགེ་འདུན་པ་ཚོས་རྒྱུགས་སྤྲོད་ལ་ལུས་ངག་ཡིད་གསུམ་གྱིས་རང་འགན་རང་འཁྱེར་གྱིས་རྒྱུགས་སྤྲོད་ཀྱི་བྱ་བ་འབད་བཞིན་བཅས་སོ།།
