༄༅།། བོད་གངས་ཅན་གྱི་དཔལ་ནཱ་ལནྡཱ་གཉིས་པ་ཆོས་སྡེ་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོའི་རྩོད་རྒྱུགས་དབུ་འཛུགས་གནང་བ།
བོད་རྒྱལ་ལོ་ ༢༡༥༠ ཟླ་བ་ ༦ པའི་ཚེས་ ༢༢ དང་། ཕྱི་ལོ་ ༢༠༢༣ ཟླ་ ༨ ཚེས་ ༨ རེས་གཟའ་མིག་དམར་ཉིན་གངས་ཅན་གྱི་དཔལ་ནཱ་ལནྡཱ་གཉིས་པ་ཆོས་སྡེ་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོའི་རྩོད་རྒྱུགས་དབུ་འཛུགས་གནང་ཡོད་ཅིང་། དེ་ཡང་སྔར་སྲོལ་བཞིན་འདི་ལོའི་ལོ་འཁོར་རྒྱུགས་སྤྲོད་དུ་དངོས་སུ་ཞུགས་དགོས་པའི་སློབ་གཉེར་བ་ཉམ་ཐག་ནད་པ་དང་གྲྭ་ཚང་གི་ལས་སྣེ་འཁེལ་བ་འགའ་རེ་མ་གཏོགས་སློབ་གཉེར་བ་ཞལ་གྲངས་༼༩༢༩༽ལོ་འཁོར་རྒྱུགས་སྤྲོད་དུ་ཞུགས་ཡོད། དེ་རིང་ནས་བཟུང་ཉིན་བཞི་རིང་ཞོགས་པ་ཆུ་ཚོད་༨ པ་ནས་༡༡ དང་། ཉིན་རྒྱབ་ཆུ་ཚོད་ ༢ པ་ནས་ ༥ པའི་བར། དགོང་མོའི་ཆུ་ཚོད་ ༦ པ་ནས་༩ པའི་རྩོད་རྒྱུགས་བླང་རྒྱུ་ཡིན་པ་དང་། རྒྱུགས་སྤྲོད་མཁན་གྲྭ་ཚང་གི་འཛིན་གྲྭ་ ༡༦ ཡོད་པ་རྣམས་རྩོད་རྒྱུགས་འཛིན་གྲྭ་གཉིས་རེ་བྱས་ཁག་བརྒྱད་ལ་བགོས་ཡོད། ཚོགས་ཡུན་རེ་ལ་འཛིན་གྲྭ་རེ་ནས་ཞལ་གྲངས་ ༡༢ རེས་རྒྱུགས་སྤྲོད་ཐུབ་ཀྱི་ཡོད་པ་དང་། ཚོགས་ཡུལ་གསུམ་ནས་ཉིན་མ་གཅིག་ལ་ཞལ་གྲངས་༣༦ གིས་རྒྱུགས་སྤྲོད་ཐུབ་ཀྱི་ཡོད། རྒྱུགས་སྤྲོད་ཁག་ ༨ ནས་བསྡོམས་ ༢༢༨ འགྲོ་ཡི་ཡོད། ཉིན་ ༤ ནང་རྩོད་རྒྱུགས་གྲུབ་འགྲོ་བ་དང་། རྟགས་རིགས་ལ་རྩོད་ལན་གཉིས་ལ་དུས་ཡུན་སྐར་མ་༡༠ ཙམ་དང་། གཞན་རྣམས་ལ་སྐར་མ་༡༥ རེ་ཡིན། རྒྱུགས་སྤྲོད་ཀྱི་དུས་ཡུན་རིང་ལྟ་རྟོག་བྱེད་མཁན་འདི་ལོའི་རྒྱུགས་ཞིབ་ལྷན་ཁང་གི་རྒྱུན་ལས་རྣམ་པ་དང་། དགེ་བསྐོས་དང་ཆབ་རིལ། གྲྭ་ཚང་གི་ཁང་ཚན་ཉེར་ལྔའི་ཁང་རྒན་རྣམས་ཀྱང་ངེས་པར་དུ་ལྟ་རྟོག་དགོས་པ་ནི་སྔ་སྲོལ་བཞིན་གནས་པར་བྱས་ཡོད།
