༄༅། །གངས་ཅན་གྱི་དཔལ་ནཱ་ལནྡཱ་ཆེན་མོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོའི་གྲུབ་འབྲས་གསལ་བསྒྲགས་དང་གཟེངས་བསྟོད་གནང་བའི་མཛད་སྒོ་ཚོགས་གནང་བ།
ཕྱི་ལོ་ ༢༠༢༢ ཟླ་བ་ ༡༠ ཚེས་ ༡༦ ཉིན་གྱི་དགོང་དྲོར་བློ་གླིང་གཙུག་ལག་ཁང་དུ་༧སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག་དབུ་བཞུགས་ཐོག །བླ་མ་གཞུང་ལེན་པ་དགེ་བཤེས་ཆོས་འཕེལ་མཆོག ། ཁྲིམས་བདག་དགེ་བསྐོས་དགེ་བཤེས་ཐུབ་བསྟན་ལྷུན་འགྲུབ་མཆོག །བློ་གླིང་རྒྱུགས་སྤྲོད་ཚོགས་ཆུང་གི་ཚོགས་གཙོ་དགེ་བཤེས་རྣམ་རྒྱལ་གཙོས་ཚོགས་མི་ཡོངས་དང་། ཕྱག་མཛོད་ཁྲི་པ་དགེ་བཤེས་འཇམ་དབྱངས་ཕྱུག་གཙོས་ཕྱག་མཛོད་རྣམ་པ། སློབ་གཉེར་བ་འདུས་མང་ལྷན་འཛོམས་ཐོག་སློབ་གཉེར་བ་སོ་སོའི་ལོ་འཁོར་གཅིག་གི་རྩོད་རྒྱུགས་དང་། བློ་རྒྱུགས། བྲིས་རྒྱུགས་སོགས་འཛིན་གྲྭ་སོ་སོར་རྩེ་ཕུད་དང་གཉིས་གསུམ་དང་། ཨང་དང་གཉིས་སོགས་ལ་བྱ་དགའ་གཟེངས་བསྟོད་སོགས་སྩལ་ཡོད། དེ་བཞིན་ཚན་རིག་ཁང་གིས་སྐད་ཡིག་འཛིན་གྲྭ་དང་། ཚན་རིག་འཛིན་གྲྭ་བཅས་ལ་རྩེ་ཕུད་དང་གཉིས་གསུམ་དང་། ཨང་དང་གཉིས་སོགས་ལ་བྱ་དགའ་གཟེངས་བསྟོད་སྩལ་གནང་མཛད་ཡོད། གྲུབ་འབྲས་གསལ་བསྒྲགས་ཀྱི་བྱ་དགའ་གཟེངས་བསྟོད་ཀྱི་མཛད་སྒོ་ཐོག་མཁན་རིན་པོ་རྗེ་བཙུན་བློ་བཟང་བསམ་གཏན་མཆོག་གིས་འདས་མ་ད་གསུམ་གྱི་སློབ་གཉེར་གནང་ཕྱོགས་ཐད་བཀའ་སློབ་ལམ་སྟོན་གནང་བ་དང་། བློ་གླིང་རྒྱུགས་སྤྲོད་ཚོགས་ཆུང་གི་ཚོགས་གཙོ་དགེ་བཤེས་རྣམ་རྒྱལ་མཆོག་གིས་ལོ་འདིའི་རྒྱུགས་སྤྲོད་གནང་ཕྱོགས་དང་འབྲེལ་བའི་གསུང་བཤད་དང་། སློབ་གཉེར་བ་སོ་སོའི་རྒྱུགས་སྤྲོད་གྲུབ་འབྲས་གསལ་བསྒྲགས་དང་བྱ་དགའ་གཟེངས་བསྟོད་གནང་ཡོད། ལོ་འདིར་འཛིན་གྲྭ་སོ་སོ་ནས་རྒྱུགས་ཞུགས་པ་མཛོད་གཉིས་པར་ཞལ་གྲངས་༡༠༢ ། མཛོད་དང་པོར་༩༢ ། འདུལ་བ་ལས་གཞི་ལ་ ༨༥ ། འདུལ་བ་སྤང་ལྟུང་ལ་ ༥༨ ། འདུལ་བ་ལྔ་ཕྲུགས་ལ་ ༥༡ ། དབུ་མ་བདག་འགོག་ལ་ ༡༠༤ ། དབུ་མ་བདེན་གཉིས་ལ་ ༨༥ ། དབུ་མ་སེམས་བསྐྱེད་ལ་ ༤༠ ། སྐབས་ལྔ་པར་ ༥༤ ། སྐབས་བཞི་པར་ ༢༩ ། བསམ་གཟུགས་ལ་ ༣༧ ། དགེ་འདུན་ཉི་ཤུ་ལ་༢༡ ། ཕར་ཕྱིན་སེམས་བསྐྱེད་ལ་ ༧༤ ། དྲང་ངེས་ལ་ ༤༡ ། གཞུང་གསར་ལ་ ༣༡ ། རྟགས་རིགས་ལ་ ༥༠ བཅས་ཁྱོན་བསྡོམས་ཞལ་གྲངས་ ༩༥༤ དང་། དེའི་ཁར་གསང་སྔགས་རྒྱུགས་སྤྲོད་པ་དགེ་བཤེས་ཞལ་གྲངས་ ༧༢ བཅས་ཁྱོན་རྒྱུགས་ཞུགས་པ་ཆིག་སྟོང་ལྷག་མཉམ་ཞུགས་གནང་ཐུབ་ཡོད།
