༄༅། །གངས་ཅན་གྱི་དཔལ་ནཱ་ལནྡཱ་ཆེན་མོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གི་འདོན་བཟང་སྐད་བཟང་རྣམས་ཀྱིས་འདོན་རྟ་དབྱངས་ཚོགས་གནང་བ།
ཕྱི་ལོ་༢༠༢༢ ལོའི་ཟླ་བ་ ༡༠ ཚེས་ ༦ ནས་ཚེས་ ༩ བར་ཉིན་བཞི་རིང་མཁས་མང་བློ་གསལ་གླིང་གི་འདོན་བཟང་སྐད་བཟང་རྣམས་ཀྱིས་རྟ་སྦྱངས་སམ་དབྱངས་སྦྱངས་འཚོགས་གནང་ཡོད། མཁས་མང་བློ་གླིང་གྲྭ་ཚང་གི་དབུ་མཛད་ཆེན་མོ་གོ་བོ་དགེ་བཤེས་ཨ་དགའ་མཆོག་གིས་གཙོ་བོར་འགན་བཞེས་པའི་ཐོག་འདོན་བཟང་སྐད་བཟང་བརྒྱ་ལྷག་གིས་གྲྭ་ཚང་གི་འདོན་རྟ་དབྱངས་ཀྱི་ཁོངས་སུ་ཐུན་མོང་མ་ཡིན་པའི་ཆོས་ར་དང་ཚོགས་སུ་འདོན་སྲོལ་ཡོད་པའི་ཆོད་སྤྱོད་ཁག་གི་རྟ་ཆེན་དང་བར་རྟའི་རིགས་དང་། གྲྭ་ཚང་གི་གཏོར་འབུལ་རྟ་ཆེན། ཚོགས་ཆེན་གྱི་གཏོར་འབུལ་རྟ་ཆེན། བླ་མ་མཆོད་པའི་ཚོགས་རྟ་རྒྱས་པ་སོགས་དང་། གཞན་ཉིན་ཆོས་དང་སྐུ་རིམ། གྲྭ་ཇ་བཅས་ཀྱི་སྐབས་གསུང་དགོས་པའི་ཚོགས་འདོན་རིགས་སྔར་གྱི་ཕྱག་སྲོལ་བཟང་པོ་ཡོད་པ་དག་ཉམས་པ་སོར་ཆུད་དང་མི་ཉམས་གོང་འཕེལ་སླད་སྔ་དྲོར་ཆུ་ཚོད་༨ དང་ཕྱེད་ཀ་ནས་ཆུ་ཚོད་ ༡༡ བར དང་། ཉིན་རྒྱབ་༢ དང་ཕྱེད་ནས་ ༥ པའི་བར། དགོང་མོར་ཆུ་ཚོད་༧ པ་ནས་༩ པའི་བར་འཚོགས་ཏེ་རྟ་སྦྱོང་གནང་བ་དང་།
གནའ་སྔ་མོར་དབྱར་གྱི་ཆོས་མཚམས་ཆེན་མོའི་སྐབས་དབྱངས་སྦྱོང་ཚོགས་ཀྱི་ཡོད་ཀྱང་། དེང་སྐབས་ཆོས་མཚམས་ཆེན་མོའི་སྐབས་ལོ་འཁོར་རྒྱུགས་སྤྲོད་འཁེལ་བས་དབྱངས་སྦྱོང་དེ་སྟོན་ཆོས་ཆེན་མོའི་ནང་ཚོགས་ཀྱི་ཡོད། དབྱངས་སྦྱོང་སྐབས་ཞོགས་པར་ནམ་རྒྱུན་གྲྭ་ཇའི་རྣམ་པའི་ཐོག་ནས་ཆོས་སྤྱོད་ཁག་གི་རྟ་ཆེན་དང་བར་རྟ་འཐེན་པ་དང་། ཞོགས་ཚོགས་གྲོལ་རྗེས་སྐད་བཟང་བ་དང་འདོན་བཟང་བ་འཛིན་གྲྭ་རྒན་གཞོན་བཞིན་བཞུགས་ཏེ་ཚོགས་ཐེངས་རྗེས་མ་རྣམས་སུ་འདོན་བཟང་སྐད་བཟང་གསར་པ་རྣམས་ཀྱིས་རྒན་པ་རྣམས་ཀྱི་དྲུང་དུ་འདོན་པ་འདོན་སྟངས་དང་དབྱངས་རྟ་འཐེན་ཚུལ་སྦྱོང་དགོས།
དགོང་མོར་ཆུ་ཚོད་བདུན་པ་ལ་ཉིན་རེ་བཞིན་སྐུ་རིམ་དུ་འདོན་རྟ་དབྱངས་རེས་མོས་དང་། ཉིན་གྲྭ་ཚང་གི་གཏོར་འབུལ་རྟ་ཆེན། ཉིན་གཅིག་ཚོགས་ཆེན་གྱི་གཏོར་འབུལ་རྟ་ཆེན། གསར་ཞུགས་པ་རྣམས་གང་སྦྱངས་རྒྱུགས་བཞེས་ཀྱང་གནང་དགོས། མཆོད་འབུལ་གྱི་དགོང་མོར་བླ་མ་མཆོད་པའི་ཚོགས་འབུལ་བ་དང་འབྲེལ་ཚོགས་རྟ་རྒྱས་པ་གཏོང་གནང་མཛད་དེ་རྟ་སྦྱངས་ཚོགས་རྒྱུ་གྲོལ་ཡོད།
