༄༅། །དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་མེ་སུ་ཀོ་ཆོས་ཚོགས་ནས་ཐུགས་རྗེ་ལེགས་གསོལ་འབུལ་བཞེས་མཛད་པ།

ཕྱི་ལོ་༢༠༢༢ ལོའི་ཟླ་ ༡༢ ཚེས་ ༢ རེས་གཟའ་པ་སངས་ཉིན་འཛིན་སྐྱོང་ཕྱག་མཛོད་རྣམས་ཀྱིས་ཐུགས་འགན་བཞེས་ཏེ་བློ་གླིང་གཙུག་ལག་ཁང་གི་འོག་ཁང་གསོལ་ཚིགས་ཁང་དུ་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་འདི་ཉིད་ཕྱི་དཔལ་འབྱོར་དང་ནང་བཤད་སྒྲུབ་ཀྱི་བྱ་བ་རྣམས་ཉག་ང་ཉག་ཕྲ་བའི་དུས་དེར་སྤྱིར་སངས་རྒྱས་ཀྱི་བསྟན་པ་རིན་པོ་ཆེ་དང་སྒོས་གྲྭ་ཚང་འདི་ཉིད་ཉམས་པར་སོར་ཆུད་དང་མི་ཉམས་དར་རྒྱས་ཡོང་སླད་ལྷད་མེད་པའི་ལྷག་བསམ་དང་རླབས་ཆེ་བའི་ཐུགས་བསྐྱེད་ཆེན་པོས་ཉམས་པ་སླར་གསོ་དང་མི་ཉམས་གོང་འཕེལ་ཐོག་མཛད་རྗེས་རླབས་ཆེན་བསྐྲུན་པའི་བཀའ་དྲིན་མཚུངས་ཟླ་མ་མཆིས་པ་སྦག་ས་ནས་ཕེབས་པའི་གནས་བརྟན་བགྲེས་པ་དགེ་བའི་བཤེས་གཉེན་རྣམས་དང་། གདན་ས་རང་ལ་བཞུགས་ཏེ་ཉིན་མཚན་ཁོར་མོ་ཡུག་ཏུ་གསར་བུ་སློབ་གཉེར་བ་རྣམས་ཀྱི་སླད་སྐུ་ངལ་ཁྱད་དུ་བསད་ངལ་དུ་ལེན་སངས་རྒྱས་ཀྱི་བསྟན་པ་རིན་པོ་ཆེ་ལ་བཤད་སྒྲུབ་ལས་གསུམ་གྱི་སྒོ་ནས་མཛད་རྗེས་རླབས་པོ་ཆེ་འཇོག་གནང་མཛད་པ་དགེ་བའི་བཤེས་ཆེན་པོ་དཔེ་ཁྲིད་དགེ་རྒན་རྣམས་ལ་ཐུགས་རྗེ་བཀའ་དྲིན་ལེགས་གསོལ་མཚོན་བྱེད་དུ་ཉིན་གུང་བཞེས་ལག་གཟབ་རྒྱས་དང་ཐུགས་རྗེ་ལེགས་གསོལ་ཤོག་ཆག་དད་མཇལ་དར་བཅས་འབུལ་ལམ་ཞུས་ཡོད། ཉིན་འདིར་བཞེས་ལག་སར་ཕེབས་ཐུབ་པ་དང་ཕེབས་ཐུབ་པ་བཅས་ཁྱོན་གནས་བརྟན་བགྲེས་པ་ཞལ་གྲངས་སུམ་ཅུ་ཙམ་ཞལ་བཞུགས་ཡོད།