༄༅། །དཔལ་ལྡན་འབྲས་སྤུངས་བློ་གསལ་གླིང་གཙུག་ལག་ཁང་དུ་ཁྱབ་བདག་བཀའ་འགྱུར་བ་སྐྱབས་རྗེ་བྲག་གཡབ་རྟོགས་ལྡན་རིན་པོ་ཆེས་གསུང་ཆོས་བཀའ་དྲིན་སྩོལ་གནང་མཛད་བཞིན་པ།
ཕྱི་ལོ་ ༢༠༢༢ ཟླ་ ༡༠ ཚེས་༡༦ ཉིན་རྒྱབ་རྒྱ་གར་ལྷོ་ཕྱོགས་མོན་གྷོ་ས་གནས་སུ་རྟེན་གཞི་བྱས་པའི་འབྲས་སྤུངས་བློ་གསལ་གླིང་གི་གཙུག་ལག་ཁང་དུ་དཔལ་ལྡན་སྟོད་རྒྱུད་པ་དང་རྭ་སྟོད། བློ་གསལ་གླིང་བཅས་ཀྱི་མཁན་ཟུར་ཁྱབ་བདག་བཀའ་འགྱུར་བ་ཆེན་པོ་སྐྱབས་རྗེ་བྲག་གཡབ་རྟོགས་ལྡན་རིན་པོ་ཆེ་རྗེ་བཙུན་གྲགས་པ་བློ་བཟང་བསྟན་པའི་རྒྱལ་མཚན་དཔལ་བཟང་པོ་མཆོག་གིས་རྗེ་ཡབ་སྲས་གསུམ་གྱི་གསུང་འབུམ་སྔ་མོའི་འཕྲོ་མཁས་གྲུབ་དགེ་ལེགས་དཔལ་བཟང་གི་གསུང་འབུམ་གྱི་ལྗགས་ལུང་དབུ་འཛུགས་གནང་ཡོད།
ཐེངས་འདིའི་གསུང་ཆོས་གོ་སྒྲིག་པའམ་སྦྱིན་བདག་འབྲས་སྤུངས་བློ་གསལ་གླིང་གྲྭ་ཚང་། བློ་གླིང་སྤྲུལ་སྐུ་ལྷན་ཚོགས། དགེ་ལྡན་ཕ་ཆོས་བུ་ཆོས་གཅེས་སྐྱོང་ཁང་། སྒ་པ་རྣམ་སྲས་ཚང་བཅས་ཡིན། གསུང་ཆོས་ཞུ་མཁན་ཡང་གྲྭ་ཚང་སྒོ་བློ་གཉིས་ཀྱི་མཁན་རིན་པོ་ཆེ་རྣམ་གཉིས་དང་། ཀུན་བདེ་གླིང་རིན་པོ་ཆེ། དགའ་བྱང་གསེར་ཀོང་རྡོ་རྗེ་འཆང་་དབུས་གྲྭ་ཚང་ཁག་གི་བླ་སྤྲུལ་དུ་མ་དང་། དགེ་བཤེས་དང་དགེ་འདུན་པ་བཙུན་མ་བཅས་ཆིག་སྟོང་ལྔ་བརྒྱ་ལྷག་གསུང་ཆོས་ཞུ་མཁན་འདུ་འཛོམས་གནང་ཡོད། གསུང་ཆོས་ཀྱི་དུས་ཡུན་ཡང་། ཕྱི་ལོ་༢༠༢༢ ཟླ་བ་ ༡༠ ཚེས་༡༦
ནས་ཚེས་༢༧ བར་ཉིན་རྒྱབ་ཆུ་ཚོད་ ༢ ནས་ ༥ པའི་བར་དང་། ཚེས་༢༨ ནས་ཕྱི་ཟླ་ ༡༡ ཚེས་༩ བར་སྔ་དྲོ་ ཆུ་ཚོད་ ༨ ནས་ ༡༡ བར་དང་། ཉིན་རྒྱབ་ཆུ་ཚོད་ ༢ པ་ནས་༥ པའི་བར། ཚེས་ ༡༠ ཉིན་རྒྱབ་ཆུ་ཚོད་༢ ནས་༥ པའི་བར་ཡིན་པ་རེད། ཕྱི་ཕྱོགས་ནས་ཆོས་ཞུ་བ་རྣམས་ལ་གྲྭ་ཚང་གི་ལྟོ་ཚང་བཞེས་ལག་ཁང་ཚན་ཁུངས་སོ་སོ་ནས་ལེན་ཏེ་འབུལ་རྒྱུ་དང་། དེ་མིན་ཉེ་འཁྲིས་སུ་བཞུགས་པའི་དགའ་ལྡན་གྱི་དགེ་འདུན་པ་དང་བཙུན་མ་བཅས་ལ་ཉིན་གུང་བཞེས་ལག་བློ་གླིང་གཙུག་ལག་ཁང་གི་འོག་ཐོག་གསོལ་ཚིགས་ཁང་དུ་གོ་སྒྲིག་ཞུས་ཡོད་པ་བཅས།
ཁྱབ་བདག་བཀའ་འགྱུར་བ་འབྲས་བློ་གླིང་མཁན་ཟུར་སྐྱབས་རྗེ་རྟོགས་ལྡན་སྤྲུལ་སྐུ་རྗེ་བཙུན་གྲགས་པ་བློ་བཟང་བསྟན་པའི་རྒྱལ་མཚན་དཔལ་བཟང་མཆོག་ནི། བོད་རབ་བྱུང་༡༦ པའི་ཤིང་སྤྲེལ་ཕྱི་ལོ་༡༩༤༤ ལོར་མདོ་ཁམས་བྲག་གཡབ་མ་དགོན་ཉེ་ཕྱོགས་ཟི་ཟོར་ཡུལ་དུ་སྐུ་འཁྲུངས་ཤིང་། ཕྱི་ལོ་༡༩༥༩ ལོར་བོད་དུ་དུས་འགྱུར་བྱུང་བ་ལྟར་རྒྱ་གར་ལ་བཙན་བྱོལ་དུ་ཕེབས་ཏེ་སྦག་ས་ཆོས་སྒར་དུ་ལོ་ངོ་དགུ་ཙམ་བཞུགས་ཤིང་། དེ་རྗེས་རྒྱ་གར་ལྷོ་ཕྱོགས་མོན་གྷོ་ས་གནས་འབྲས་བློ་གླིང་གྲྭ་ཚང་དུ་གཞུང་ཆེན་ཁག་ལ་གསན་བསམ་མཐར་ཕྱིན་མཛད་དེ་དགེ་ལུགས་རྒྱུགས་སྤྲོད་ཕེབས་ནས། ཕྱི་ལོ༡༩༨༡ ལོར་དགེ་བཤེས་ལྷ་རམས་པ་ཨང་གཉིས་པའི་མཚན་རྟགས་བཞེས། དེ་ནས་རིམ་བཞིན་སྟག་ཚང་རྭ་བ་སྟོད་པ་དང་། རྒྱུད་སྟོད་གྲྭ་ཚང་། བློ་གླིང་གྲྭ་ཚང་བཅས་ཀྱི་མཁན་ཁྲི་ལས་ཟུར་ནས་སྤོང་བ་བསམ་གཏན་གྱི་རྣལ་འབྱོར་ལ་བརྩོན་ཞོར་གདུལ་བྱ་རྣམས་ལ་ཆོས་ཀྱི་འཁོར་ལོ་བསྐོར་བཞིན་བཞུགས་པ་འདིའོ།། རྣམ་ཐར་རྒྱས་པ་མཁས་མང་བློ་གསལ་གླིང་གི་འཕགས་བོད་ཆོས་འབྱུང་ཛམྦུའི་གསེར་གྱི་འཁྲི་ཤིང་ནང་གཟིགས་པར་ཞུ།
