༄༅། །འབྲས་སྤུངས་བློ་གསལ་གླིང་སྤྲུལ་སྐུ་ལྷན་ཚོགས་དང་སླེ་ལུང་དགེ་རྩ་ཚོགས་པ་ཟུང་འབྲེལ་ཐོག་དགོན་པའི་ཉེ་འཁོར་རྒྱ་གར་ཡུལ་མི་ཉམ་ཐག་རྣམས་ལ་གོས་སྦྱིན་འབུལ་བ།

ཕྱི་ལོ་༢༠༢༢ ཟླ་བ་ ༡༡ ཚེས་ ༧ ཉིན་འབྲས་སྤུངས་བློ་གསལ་གླིང་སྤྲུལ་སྐུ་ལྷན་ཚོགས་དང་སླེ་ལུང་དགེ་རྩ་ཚོགས་པ་གཉིས་ཟུང་འབྲེལ་ཐོག་དགོན་པའི་ཉེ་འཁོར་རྒྱ་གར་ཡུལ་མི་ཉམ་ཐག་རྣམས་ལ་གོས་སྦྱིན་ཕུལ་ཡོད། བློ་གླིང་སྤྲུལ་སྐུ་ལྷན་ཚོགས་ཀྱི་ཚོགས་གཙོ་ཕ་ར་ཤག་སྐོར་མཁན་སྤྲུལ་བསྟན་འཛིན་ཕུལ་བྱུང་མཆོག་དང་ཕྱག་རོགས་སྤྲུལ་སྐུ་གཉིས། སླེ་ལུང་དགེ་རྩ་ཚོགས་པའི་ཚོགས་གཙོ་སླེ་ལུང་རིན་པོ་ཆེ་བསྟན་འཛིན་ཕུན་ཚོགས་བློ་ལྡན་མཆོག །བློ་གླིང་གྲྭ་ཚང་གི་ཕྱག་མཛོད་ཁྲི་པ་འཇམ་དབྱངས་དབང་ཕྱུག་མཆོག །གཞིས་གྲོང་བཞི་པ་པོ་ཏ་ལ་ཚོགས་པའི་ཚོགས་མི་བཅས་གོས་བྱིན་སར་ཆེད་ཕེབས་གནང་ཡོད། མཁས་མང་བློ་གསལ་གླིང་གྲྭ་ཚང་དང་གཞིས་གྲོང་བཞི་པ་པོ་ཏ་ལ་ཚོགས་པ་གཉིས་ཀྱིས་འབྲེལ་ཡོད་སྡེ་ཚན་དཔོན་རིགས་ཁག་ལ་ཞུས་པ་དང་རོགས་རམ་གནང་སྟེ་འབྲས་སྤུངས་དགོན་པའི་ཉེ་འཁོར་དུ་ཡོད་པའི་རྒྱ་གར་གྲོང་གསེབ་༡༽ ན་ཏྲི་ཀ་ཏྲི ༢༽ ཀན་གདའ་ཀཏྲེ་ཀ་རི ༣༽ ཧོ་ལི་ཧོ་ཏྲ། ༤༽ རྦ་ས་པུར། ༥༽ ར་མ་པུར། བཅས་ལ་གྱོན་གོས་དོ་པོ་བདུན་ཅུ་ལྷག་རླངས་འཁོར་ནང་དབོར་ཏེ་གོས་ཀྱི་སྦྱིན་པ་རྒྱ་ཆེར་གནང་ཡོད། ཁྱིམ་ཚང་སོ་སོར་ཕོ་མོ་གང་ཡོད་ཕོ་ལ་བུ་ཡི་གོས་དང་མོ་ལ་མོ་ཡི་གོས་བཅས་སྦྱིན་ཡོད་པས་མི་མང་རྣམས་ཧ་ཅང་དགའ་ཚོར་ཆེན་པོ་བྱུང་ཡོད་པ་བཅས་སོ།།