༄༅། །རྒྱལ་སྤྱིའི་དགེ་ལྡན་ལྷན་ཚོགས་ཀྱི་བཀའ་ཁྱབ་འོག །འཛམ་གླིང་ཞི་བདེའི་དེད་དཔོན་ཆེན་པོ་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཚེ་སྒྲུབ་དང་། རླབས་ཆེན་བཞེད་དགོངས་མཐའ་དག་འགྲུབ་པའི་སླད་དྲང་ངེས་ལེགས་བཤད་སྙིང་པོ་དག་སྒྲོག་གནང་བ།

ཕྱི་ལོ་ ༢༠༢༢ ཟླ་བ་༡༢ ཚེས་༠༧ ཉིན་ལྷ་དང་བཅས་པའི་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོ། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག འཛམ་གླིང་ཞི་བདེའི་དེད་དཔོན་ཆེན་པོ་༸སྤྱི་ནོར་༸གོང་ས་སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་བསྟན་འགྲོའི་མགོན་དཔུང་དམ་པར་སྐུ་ཚེ་བསྐལ་བརྒྱར་བརྟན་ཅིང་རླབས་ཆེན་གྱི་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ་སོགས་ཀྱི་ཆེད་དུ་དམིགས་སྐུ་ཚེའི་ཚེ་སྒྲུབ་ཀྱི་ཆེད་དུ་རེས་གཟའ་ལྷག་པ་༸ སྐུའི་བླ་གཟའ་ཉིན་རྒྱལ་སྤྱིའི་དགེ་ལྡན་ལྷན་ཚོགས་ཀྱི་བཀའ་ཁྱབ་འོག །རི་བོ་དགེ་ལྡན་པའི་དགོན་སྡེ་ཡོངས་ཀྱིས་ཉིན་བརྒྱ་དུས་གཅིག་ལ་རྗེ་བླ་མ་ཙོང་ཁ་པ་ཆེན་པོའི་གསུང་དྲང་ངེས་ལེགས་བཤད་སྙིང་པོ་གསུང་འདོན་གནང་ཡོད་པ་བཞིན།
འབྲས་སྤུངས་བློ་གསལ་གླིང་གྲྭ་ཚང་གི་སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག་དབུ་བཞུགས་ཐོག དབུ་ཆོས་གསུམ་དང་བླ་སྤྲུལ་དགེ་བཤེས་རྣམ་པ། འདུས་མང་བཅས་ནས་རྗེའི་གསུང་དྲང་ངེས་ལེགས་བཤད་སྙིང་པོ་གསུང་འདོན་དང་། རྩ་བའི་བླ་མའི་གཟུགས་སྔགས། ཚེ་གཟུངས་སོགས་གསོག་སྒྲུབ་ཞུས་པ་དང་། ཁང་ཚན་ཉེར་ལྔའི་འདུས་མང་ནས་ཀྱང་ཁང་ཚན་སོ་སོའི་ནང་རྗེའི་གསུང་དྲང་ངེས་ལེགས་བཤད་སྙིང་པོ་སྔ་དགུང་ཕྱི་གསུམ་ལ་ཐེངས་གསུམ་གྱི་རིང་རྗེའི་གསུང་དྲང་ངེས་ལེགས་བཤད་སྙིང་པོ་དག་སྒྲོག་ཞུས་པས་དགེ་བའི་རྩ་བའི་མཐུ་ལ་བརྟེན་ནས་བདག་ཅག་མགོན་དཔུང་དུ་སྐུ་ཚེ་མི་ཤིགས་གཞོམ་གཞིག་བྲལ་བའི་སངས་རྒྱས་ཚེ་མཐའ་ཡས་པའི་ངོ་བོར་བརྟན་པ་དང་། བསྟན་པ་དང་འགྲོ་བའི་དོན་རླབས་ཆེན་བཞེད་དགོངས་མཐའ་དག་ལྷུན་གྱིས་འགྲུབ་སྟེ་སྐྱེ་བ་ནས་ཚེ་རབས་ཐམས་ཅད་དུ་འབྲལ་བ་མེད་པར་རྗེས་སུ་གཟུང་དུ་གསོལ།