༄།།ཁྱབ་བདག་འཁོར་ལོའི་མགོན་པོ། ངེས་དོན་གྱི་སེམས་པ་ཆེན་པོ། འབྲོམ་སྟོན་རྒྱལ་བའི་འབྱུང་གནས་སྐུ་དངོས། སྦས་པའི་རྣལ་འབྱོར་པ་ཆེན་པོ། དགེ་ལྡན་སྙན་བརྒྱུད་ཀྱི་མན་ངག་ནོར་བུའི་བང་མཛོད་ཆེན་པོ་༧སྐྱབས་རྗེ་ར་སྟོད་སྐྱོང་བླ་རིན་པོ་ཆེ་མཆོག་དེ་རིང་བོད་ཟླ་གསུམ་པའི་བོད་ཚེས་ཉི་ཤུ་བཞི་(24-05-2022)ཉིན་དགོངས་པ་མྱ་ངན་ལས་འདས་ཚུལ་བསྟན་པའི་གནས་ཚུལ་ཐོས་པར་བློ་ཕམ་ཚད་མེད་བྱུང་།

དེ་ཡང་༸སྐྱབས་རྗེ་སྐྱོང་བླ་རིན་པོ་ཆེ་ནི། བོད་མདོ་ཁམས་བྲག་གཡབ་ཏུ་སྤྱི་ལོ་ ༡༩༢༣ ལོར་འཁྲུངས་པ་དང་། དགུང་ལོ་ ༥ ལ་ཕེབས་སྐབས་༧རྒྱལ་བ་སྐུ་ཕྲེང་བཅུ་གསུམ་པ་ཆེན་པོས་སྐྱོང་བླ་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་མཛད་ཅིང་། ཁོང་དགུང་ལོ་དྲུག་ལ་བཞེས་སྐབས་རབ་ཏུ་བྱུང་ནས་ར་སྟོད་གྲྭ་ཚང་དུ་ཆོས་ཞུགས་གནང་བའི་རྗེས་རིམ་བཞིན་གཞུང་ཆེན་སློབ་གཉེར་གནང་སྟེ་ཁོང་དགུང་ལོ་ཉེར་གཉིས་ཙམ་ལ་ཕེབས་སྐབས་དགེ་བཤེས་ལྷ་རམས་པའི་མཚན་གནས་བཞེས། དེ་རྗེས་གསང་ཆེན་བསྟན་པའི་འབྱུང་གནས་དམ་པ་དཔལ་ལྡན་རྒྱུད་སྟོད་ལ་སྔགས་ཀྱི་སློབ་གཉེར་གནང་བ་དང རྒྱུད་པ་གྲྭ་ཚང་གི་དགེ་བསྐོས་མཛད་འགན་བཞེས་གནང་། བོད་ནང་དུས་འགྱུར་བྱུང་སྐབས་ཁོང་རྒྱ་གར་དུ་ཕེབས་རྗེས། ཡོ་རོབ་དང་དེ་ནས་ཨ་རིའི་ནང་ཕེབས་ཏེ་ཕྱི་ལོ་ ༡༩༦༨ ལོར་ཨ་རིའི་ནིའུ་ཡོག་ཏུ་བཞུགས་ནས་ཕྱི་ལོ་ ༡༩༧༥ ལོར་རིན་པོ་ཆེ་མཆོག་གིས་ནང་ཆོས་སློབ་གཉེར་བྱ་སའི་བོད་ཀྱི་བསྟི་གནས་ཞེས་པ་ཞིག་གསར་འཛུགས་དང་ཆབས་ཅིག་དེ་གར་ལོ་ངོ་ ༣༠ ལྷག་གི་རིང་ཁོང་ནས་བསྟི་གནས་དེའི་འགན་འཛིན་དང་སློབ་ཁྲིད་གནང་མཁན་གྱི་གཙོ་འགན་བཞེས་ཤིང་། རིན་པོ་ཆེ་མཆོག་ནས་མོན་གྷོ་འདོད་དགུ་གླིང་ར་སྟོད་གྲྭ་ཚང་གི་འཛིན་སྐྱོང་གི་ཐད། ད་བར་མཐུན་འགྱུར་གནང་མུས་ཡིན་འདུག ། ༸རྒྱལ་བའི་ཡོངས་འཛིན་རྣམ་གཉིས་སོགས་ཚད་ལྡན་བཤེས་གཉེན་དམ་པ་དུ་མའི་དྲུང་ནས་དབང་ལུང་མན་ངག་བསམ་གྱིས་མི་ཁྱབ་པ་གསན་བཞེས་མཛད་ཅིང་། རིན་པོ་ཆེ་མཆོག་ནི་མདོ་སྔགས་བརྡ་སྤྲོད་རིག་གནས་དང་བཅས་པར་མཁས་ཤིང་དབང་ལུང་མན་ངག་གི་མཛོད་འཛིན་ལྟ་བུ་ཞིག་ཡིན་ཡང་། ཁེངས་དྲེགས་ཀྱི་རྣམ་པ་ཡེ་མི་མཛད་པར་བླ་མ་ཉམ་ཆུང་ཚུལ་མཐུན་རྣམ་ཀུན་ཐུགས་དམ་ཉམས་བཞེས་ཁོ་ནར་ཐུགས་འགྲུས་མཛད་ཅིང་། གདན་ས་རྭ་སྟོད་གྲྭ་ཚང་དང་བཀྲས་ལྷུན་སོགས་སུ་དབང་ལུང་མན་གང་མང་པོ་འཆད་སྤེལ་མཛད་པ་སོགས་བསྟན་པའི་ཞབས་འདེགས་བླ་ན་མེད་པ་ཞིག་མཛད་པ་། ད་ལན་བོད་ལུགས་ལྟར་དགུང་གྲངས་བརྒྱ་ཐམ་པར་བཞེས་ནའང་སྙུན་གཞི་གང་ཡང་མེད་པར་དགོངས་པ་རྫོགས་པའི་ཚུལ་མཛད་པ་དང་རིན་པོ་ཆེ་གང་ཉིད་དགོངས་པ་རྣམས་འགྲུབ་པའི་ཆེད་དུ་མཆོག་གསུམ་རྒྱལ་བ་རྒྱ་མཚོར་སྨོན་ལམ་ཞུ།།

གསར་འཕྲིན།