༢༠༠༥ ལོར་གསར་དུ་བཞེགས་མགོ་ཚུགས་ཏེ་༢༠༠༧ ལོར་ལེགས་པར་གྲུབ་པའི་གཙུག་ལག་ཁང་དགེ་འདུན་པ་ལྔ་སྟོང་ཙམ་ཤོང་བའི་བརྗེད་ཉམས་ཅན་འདི་ཉིད་ཀྱི་ནང་གི་རྟེན་གཙོ་ནི། དབུས་སུ་བཞུགས་སུ་གསོལ་བའི་གསེར་ཟོངས་ལས་བྱས་པའི་སྟོན་པ་བཅོམ་ལྡན་འདས་མཉམ་མེད་ཤཱཀྱའི་སེང་གེའི་སྐུ་བརྙན་ཐོག་ཚད་མ་གཅིག དེའི་མདུན་དུ་བཞུགས་སུ་གསོལ་བའི་རྒྱུ་གསེར་ཟངས་ལས་གྲུབ་པའི་རྗེ་ཡབ་སྲས་གསུམ།
དེའི་གཡས་སུ་རྒྱུ་གསེར་ཟངས་ལས་ གྲུབ་པའི་མདོ་སྔགས་རབ་འབྱམས་སྨྲ་བ་པཎ་ཆེན་བསོད་ནམས་གྲགས་པའི་སྐུ་བརྙན། དེའི་གཡས་སུ་རྒྱུ་དེ་མཚུངས་ཀྱི་དཔལ་མར་མེ་མཛད་པ་དཱི་པཾ་ཀ་ར་ཤྲཱི་ཛྙཱ་ནའི་སྐུ་བརྙན་དང་། དེའི་གཡས་སུ་འཇིགས་པ་བརྒྱད་སྐྱོབ་འཕགས་མ སྒྲོལ་མའི་སྐུ་བརྙན། གཡོན་དུ་རྒྱུ་གསེར་ཟངས་ལས་བྱས་པའི་འཇམ་དབྱངས་དགའ་བློའི་སྐུ་བརྙན། ཡོངས་འཛིན་གླིང་སྤྲུལ་རྡོ་རྗེ་འཆང་གི་སྐུ་བརྙན། དེའི་གཡོན་དུ་རྒྱུ་དེ་མཚུངས་ཀྱི་འཕགས་པ་སྤྱན་རས་གཟིགས་ཀྱི་སྣང་བརྙན་བཅས་བཞུགས་པ་ལགས་སོ། །གཙུག་ལག་ཁང་གསར་པའི་མགོན་ཁང་དུ་སྨན་འདམ་ལས་གྲུབ་པའི་འཇིགས་བྱེད་ལྷ་བཅུ་གསུམ་དང་། འདོད་ཁམས་བདག་མོའི་སྐུ་བརྙན། རྒྱུ་གསེར་ཟངས་ལས་གྲུབ་པའི་མགོན་པོ་ཞལ་བཞི་པའི་སྐུ་བརྙན་བཅས་བཞུགས་སུ་གསོལ་ཡོད།