ཕྱི་ལོ་༢༠༡༩ལོའི་ཟླ་༩ཚེས་༡༥ནས་དབུ་ཚུགས་ཏེ་བློ་གླིང་ཆོས་རིག་འཛིན་སྐྱོང་སློབ་གྲྭའི་ཚོགས་ཁང་དུ་འཇམ་མགོན་བླ་མ་ཙོང་ཁ་པ་ཆེན་པོ་མཆོག་དགོངས་པ་གཞན་དོན་དུ་གཤེགས་ནས་མི་ལོ་ཧྲིལ་པོ་ལོ་དྲུག་བརྒྱ་འཁོར་བའི་བཀའ་དྲིན་རྗེས་དྲན་ཟབ་སྦྱོང་གནང་བ།
༄༅། །ཆོས་སྡེ་ཆེན་པོ་དཔལ་ནཱ་ལནྡཱ་གཉིས་པ་གྲགས་པ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་དང་བློ་གསལ་གླིང་ཆོས་རིག་འཛིན་སྐྱོང་གི་སློབ་གྲྭ་ཐུན་མོང་ནས་འཇམ་མགོན་བླ་མ་ཙོང་ཁ་པ་ཆེན་པོ་མཆོག་དགོངས་པ་གཞན་དོན་དུ་གཤེགས་ནས་མི་ལོ་ཧྲིལ་པོ་ལོ་དྲུག་བརྒྱ་འཁོར་བའི་བཀའ་དྲིན་རྗེས་དྲན་ཞུས།
དེ་ཡང་ཁམས་གསུམ་འགྲོ་བའི་བླ་མ་ཤར་རྒྱལ་བ་ཙོང་ཁ་པ་ཆེན་པོ་མཆོག་དགོངས་པ་གཞན་དོན་དུ་གཤེགས་ནས་མི་ལོ་ཧྲིལ་པོ་དྲུག་བརྒྱ་འཁོར་བའི་བཀའ་དྲིན་རྗེས་དྲན་སླད། དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་དང་བློ་གསལ་གླིང་ཆོས་རིག་འཛིན་སྐྱོང་སློབ་གྲྭ་ཐུན་མོང་ནས་གནས་དེང་རིག་པའི་ཟབ་སྦྱོང་ཞིག་གོ་སྒྲིག་བྱས་ཡོད།
བོད་རྒྱལ་ལོ་༢༡༤༦ཟླ་བ་༧ཚེས༡༦དང་། ཕྱི་ལོ་༢༠༡༩ལོའི་ཟླ་༩ཚེས་༡༥ནས་དབུ་ཚུགས་ཏེ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་ཆོས་རིག་འཛིན་སྐྱོང་སློབ་གྲྭའི་ཚོགས་ཁང་དུ་ཟབ་སྦྱོང་གནང་།རང་རེའི་ཆོས་རིག་འཛིན་སྐྱོང་སློབ་གྲྭ་འདིའི་ནང་བདུན་ཕྲག་བཞི་ལྷག་ཙམ་གྱི་རིང་ས་གནས་ཁག་མང་པོ་ནས་མཁས་དབང་དང་སློབ་དཔོན་བཅས་བཅུ་གསུམ་ཐམ་པ་གདན་ཞུས་ཐོག་སློབ་མ་རྣམས་ལ་གསབ་ཁྲིད་གནང་ཡོད།
བོད་ཡིག་ཟབ་སྦྱོང་དང་འབྲེལ་བའི་སློབ་དཔོན་དང་བརྗོད་གཞི་ནི། རིམ་བཞིན་ཝཱ་ཎཱའི་མཐོ་སློབ་སློབ་དགེ་བེ་རི་དགེ་བཤེས་འཇིགས་མེད་དབང་རྒྱལ་མཆོག ། བློ་གླིང་ཏྲེ་ཧོར་དགེ་བཤེས་ཟླ་བ་ཚེ་རིང་མཆོག་། སྒོ་མང་དགེ་བཤེས་དགེ་འདུན་རྒྱ་མཚོ་མཆོག་། སེར་བྱེས་ཏྲེ་ཧོར་དགེ་བཤེས་བསོད་ནམས་དབང་ལྡན་མཆོག ། བློ་གླིང་སློབ་དགེ་ལྡན་མ་ཟླབ་བཟང་པོ་མཆོག ། སློབ་དགེ་ལྷག་པ་ཚེ་རིང་མཆོག ། ས་རཱ་མཐོ་སློབ་སློབ་དགེ་རྡོ་རྗེ་རྒྱལ་མཚན་མཆོག་སོགས་ཀྱིས་རིམ་བཞིན་སྙན་ངག་སྤྱི་བཤད་དང་། གཞུང་ཆེན་ཉམས་ཞིབ་གནང་ཐབས་སྐོར་དང་། རྟགས་འཇུག་གི་དཀའ་གནད་སྐོར། གློག་ཀླད་ཀྱི་ཤེས་བྱ་སྤྱི་དང་བྱེ་བྲག་གི་སྐོར།ནུབ་ཕྱོགས་ཀྱི་སེམས་ཁམས་རིག་པ་དང་འབྲེལ་ནས་སློབ་ཚན་ཁྲིད་ཐབས་བཅས་ཀྱི་སྐོར་ཟབ་སྦྱོང་གནང་ཡོད།
ཨིན་ཡིག་ཟབ་སྦྱོང་དང་འབྲེལ་བའི་སློབ་དཔོན་དང་བརྗོད་གཞི་ནི་གྲྭ་ཚང་གི་ཨིན་དྲུང་ཆེན་མོ་དགེ་བརྩོན་འགྲུས་མཆོག་།སློབ་དགེ་ཚེ་རིང་རྡོ་རྗེ་མཆོག།ཤེས་ཡོན་ལམ་སྟོན་པ་རྒན་འཇམ་དབྱངས་མཆོག།ཝར་ཎ་མཐོ་སློབ་སློབ་དཔོན་རྒན་བསྟན་འཛིན་བསྟན་སྐྱོང་མཆོག།རྒྱ་ཡིག་སློབ་དཔོན་ཕུ་ཁང་ཚེ་རིང་ཆོས་གྲགས་མཆོག།སློབ་དགེ་པདྨ་དབྱངས་ལགས་སོགས་ཀྱིས་ཨིན་ཇིའི་རྩོམ་ཡིག་འབྲི་ཐབས་དང་།ཡི་གེ་སྒྱུར་ཚུལ་སྤྱི་དང་།ཨིན་བོད་སྒྱུར་ཐབས་ཀྱི་སྐོར།རྒྱ་ཡིག་ཐོག་ནང་དོན་རིག་པའི་ཆོས་ཚིག་བསྒྱུར་ཐབས་གྱི་སྐོར།རྒྱ་ཡིག་རྨང་གཞི་དང་ཐ་སྙད་རིག་གནས་སོགས་ཟབ་ཁྲིད་བཅས་རྒྱས་པར་གནང་ཡོད།
སཱ་ར་མཐོ་སློབ་ཀྱི་སློབ་དཔོན་རྒན་རྡོ་རྗེ་རྒྱལ་མཚན་ལགས་ནས་སྒོ་མང་གྲྭ་ཚང་གི་སློབ་དགེ་དང་།ས་སྐྱ་གྲྭ་ཚང་གི་སློབ་དགེ་དང་།གཞིས་གྲོང་དྲུག་པའི་སམ་བྷོ་ཊའི་སློབ་དགེ་དང་།རང་རེའི་སློབ་གྲྭའི་སློབ་རྒན་བཅས་ལ་བདུན་ཕྲག་གཅིག་གི་རིིང་ལ་ནུབ་ཕྱོགས་ཀྱི་སེམས་ཁམས་རིག་པ་དང་འབྲེལ་ནས་སློབ་ཚན་ཁྲིད་ཐབས་ཞིབ་ཅིང་ཕྲ་བ་ཟབ་ཁྲིད་གནང་སྟེ་ཕྱི་ལོ་༢༠༡༩ཟླ་བ་༡༡ཚེས་༣རེས་གཟའ་ཉི་མའི་ཉིན་མཇུག་སྡོམ་མཛད་སྒོ་འཚོགས་ཡོད།
མཛད་སྒོའི་ཚོགས་མགོན་དུ་ཞྭ་སེར་བསྟན་པའི་གཙུག་རྒྱན་༧འཇམ་མགོན་རྒྱལ་བའི་རྒྱལ་ཚབ་༧ སྐྱབས་རྗེ་དགའ་ལྡན་ཁྲི་ཟུར་རིན་པོ་ཆེ་རྗེ་བཙུན་རི་རྫོང་སྲས་སྤྲུལ་ཐུབ་བསྟན་ཉི་མ་དཔལ་བཟང་པོ་མཆོག་དང་། བློ་གླིང་མཁན་ཟུར་རིན་པོ་ཆེ་རྗེ་བཙུན་དཀོན་མཆོག་དཔག་བསམ་དཔལ་བཟང་པོ་མཆོག་དང་།གཞན་ཡང་གྲྭ་ཚང་གི་དབུ་ཆོས་རྣམ་པ་གསུམ་དང་།དཔལ་ལྡན་སློབ་སྤྱི་མཆོག་གི་དབུས་དགེ་རྒན་རྣམ་པ་དང་སློབ་ཕྲུག་རྣམ་པ་ལྷན་འཛོམས་ཐོག་རིམ་བཞིན་དགའ་ལྡན་ཁྲི་ཟུར་རིན་པོ་ཆེ་མཆོག་དང་གྲྭ་ཚང་གི་མཁན་ཚབ་མཁན་ཟུར་རིན་པོ་ཆེ་རྗེ་བཙུན་དཀོན་མཆོག་དཔག་བསམ་མཆོག་གིས་ཟབ་སྦྱོང་སློབ་དཔོན་རྣམས་ལ་གཟེངས་བསྟོད་ཕྱག་ཁྱེར་འབུལ་བ་དང་།ཟབ་སྦྱོང་སློབ་མ་རྣམས་ལ་ཡང་གཟེངས་བསྟོད་ཕྱག་ཁྱེར་བཅས་ཕུལ་ཡོད།
དེ་ནས་རིམ་བཞིན་ཕྱག་མཛོད་ཁྲི་པ་ཏྲེ་ཧོར་དགེ་བཤེས་བློ་བཟང་ཟླ་བ་མཆོག །དབུ་མཛད་དགེ་བཤེས་ཀོང་པོ་གཙུག་ལག་རྒྱ་མཚོ་མཆོག ། དཔལ་ལྡན་ཁྲིམས་བདག་དགེ་བསྐོས་ཕུ་ཁང་དགེ་བཤེས་བྱང་ཆུབ་ངག་དབང་མཆོག །བླ་མ་གཞུང་ལེན་པ་ཏྲེ་ཧོར་དགེ་བཤེས་ཡེ་ཤེས་ཆོས་འཕེལ་མཆོག ། མཁན་ཚབ་མཁན་ཟུར་རིན་པོ་ཆེ་རྗེ་བཙུན་དཀོན་མཆོག་དཔག་བསམ་མཆོག་དབུས་སྐུ་མགྲོན་རྣམས་ཀྱིས་འབྲས་བློ་གླིང་ཆོས་རིག་འཛིན་སྐྱོང་སློབ་གྲྭ་འདི་ཉིད་ཤེས་ཡོན་གྱི་བསྟི་གནས་གལ་ཆེ་ཞིག་དང་། མ་འོངས་བོད་ཀྱི་ཆོས་དང་རིག་གཞུང་སྤྱི་དང་བློ་གསལ་དོན་གཉེར་ཅན་ལ་ཕན་རླབས་རྒྱ་ཆེན་པོའི་བསམ་པས་ཀུན་ནས་སློང་སྟེ་འཛིན་སྐྱོང་ཕྱག་མཛོད་རྣམ་པ་དང་དཔལ་ལྡན་སློབ་སྤྱི་མཆོག་གི་དབུས་དགེ་རྒན་རྣམ་པས། གཙོ་བོར་༧ སྤྱི་ནོར༧ གོང་ས་༧སྐྱབས་མགོན་ཆེན་པོ་མཆོག་གི་དུས་རྟག་ཏུ་ཤེས་ཡོན་བརྗེ་ལེན་བྱ་རྒྱུ་གལ་ཆེ་ཚུལ་གསུངས་པ་བཞིན་བཀའ་སློབ་ཟབ་མོ་དེ་དག་སྙིང་ལ་བཅངས་ཏེ་རླབས་ཆེ་བའི་ལས་དོན་འདི་བསྒྲུབས་དང་སྒྲུབ་མུས་ཡིན་པར་མ་ཟད་མ་འོངས་པ་ལ་ཡང་འདི་བཞིན་གོ་སྒྲིག་བྱ་ཐུབ་པའི་འབད་བརྩོན་བྱ་རྒྱུའི་འདུན་པ་ཡོད་པ་དང་། སློབ་མ་ཚོས་ངོས་ནས་ཀྱང་གང་སྦྱོང་བ་དང་གང་ཤེས་པ་དེ་དྲན་པ་མ་བརྗེད་པ་ཡང་ནས་ཡང་དུ་སེམས་ལ་བཞག་དགོས། ད་དུང་སློབ་གྲྭ་འདིའི་ནང་དུ་ཟབ་སྦྱོང་སོགས་མང་པོ་འཚོགས་རྒྱུ་ཡོང་གི་རེད་ལ་དུས་དང་རྣམ་པ་ཀུན་ཏུ་སློབ་སྦྱོང་ལ་དོ་སྣང་དང་འབད་བརྩོན་ཧུར་ཐབས་གནང་རྒྱུ་དང་། གཙོ་བོ་གཞུང་ཆེན་པོད་ལྔ་དང་རིག་གནས་ཁག་བཅས་ལ་སློབ་གཉེར་གནང་བའི་ཐོག་དབྱིན་ཇི་དང་རྒྱ་ཡིག་སོགས་ལ་དོ་སྣང་གནང་རོགས་གསུང་གནང་སོང་། སྤྱིར་ན་ཟབ་སྦྱོང་གོ་སྒྲིག་འདི་ཐེངས་གཉིས་པ་རེད་འདུག། མཐའ་གོ་སྒྲིག་འགན་འཁུར་བ་ཨིན་དགེ་ཚ་བ་བློ་བཟང་བཀྲ་ཤིས་མཆོག་དང་། བོད་དགེ་ཏྲེ་ཧོར་མིག་དམར་ཚེ་རིང་མཆོག་གཉིས་ནས་སྐུ་མགྲོན་རྣམས་ལ་ཐུགས་རྗེ་ཆེ་ཞུའི་གསུང་བཤད་གནང་གྲུབ་རྗེས། སྐུ་མགྲོན་རྣམ་པ་དང་དགེ་སློབ་ལྷན་འཛོམས་ཐོག་སྐུ་པར་སྒྲོན་ཏེ་མཛད་སྒོ་གྲོལ་ཡོད།
