རྩེད་ཐང་དགེ་བཤེས་བསྟན་འཛིན་དཔལ་མཆོག་མཆོག་བླ་མ་གཞུང་ལེན་པ་གསར་པའི་ཁྲི་སྟོན་མཛད་སྒོ་གནང་བ།
བླ་མ་གཞུང་ལེན་པ་ཏྲེ་ཧོར་དགེ་བཤེས་ཡེ་ཤེས་ཆོས་འཕེལ་མཆོག་བླ་མ་གཞུང་ལེན་པའི་འགན་བཞེས་ཏེ་ལོ་དྲུག་ཚང་མཚམས། ༸རྒྱལ་བའི་ཕྱག་རྟགས་རིན་པོ་ཆེ་ཕེབས་ཟིན་པའི་མཁན་རིན་པོ་ཆེ་གསར་པ་ལྷོ་པ་དགེ་བཤེས་ཡེ་ཤེས་ལྷུན་འགྲུབ་མཆོག་གིས་བླ་མ་གཞུང་ལེན་པ་རྩེད་ཐང་དགེ་བཤེས་བསྟན་འཛིན་དཔལ་མཆོག་མཆོག་བླ་མ་གཞུང་ལེན་པ་བསྐོས་བཞག་གནང་ཡོད།
དེ་ཡང་བོད་རྒྱལ་ལོ ༢༡༥༡ བོད་ཟླ་ ༦ པ་སྔ་མའི་པའི་ཚེས་ ༡༡ ཕྱི་ལོ་༢༠༢༤ ཟླ་བ་ ༧ ཚེས་ ༡༧ རེས་གཟའ་ལྷག་པ་ཉིན་གྱི་སྔ་དྲོར་བླ་མ་གཞུང་ལེན་པ་གསར་པ་དགེ་བཤེས་བསྟན་འཛིན་དཔལ་མཆོག་མཆོག་རྩེད་ཐང་ཁམས་ཚན་ཚོགས་ཁང་གསར་པའི་ནང་ཁམས་ཚན་ཉེར་ལྔའི་ཁམས་རྒན་རྣམས་ཀྱིས་སྤོས་སྣེ་དང་བཅས་ཚོགས་ཁང་དུ་གདན་དྲངས་ཏེ་རྟེན་གསུམ་ཁག་ལ་མཇལ་དར་སྒྲོན་འབུལ་དང་། དཔལ་ལྡན་ཡོན་ཏན་མ་སོགས་ཞལ་འདོན་གནང་བ་སོགས་མཛད་སྒོ་གྲུབ་པ་དང་།
སླར་ཡང་ཁམས་རྒན་རྣམས་ཀྱིས་སྤོས་སྣེ་དང་བཅས་གྲྭ་ཚང་གི་གཙུག་ལག་ཁང་དུ་གདན་དྲངས་ཏེ་ཐོར་འབྲུ་མེ་ཏོག་ཐོར་བ་སོགས་གདོང་གྲལ་དཀྱིལ་ནས་ཕྱག་འབུལ་བྱས་རྗེས་༧རྒྱལ་བའི་སྐུ་པར་མཐོང་གྲོལ་རིན་པོ་ཆེ་ལ་རྟེན་གསུམ་མཇལ་དར་དང་རྟེན་གསུམ་རྣམས་ལ་སྙན་ཤལ་སོགས་ཀྱིས་མཆོད་སྤྲིན་བཏེགས་ཏེ་ཁྲིའི་སྟེང་དུ་འཁོད་གྲུབ།
དེ་ནས་དབུ་མཛད་ཀྱིས་ཞལ་འདོན་དགའ་ལྡན་ལྷ་བརྒྱ་མ་དང་།ཤེར་སྙིང་།དཔལ་ལྡན་ཡོན་ཏན་མ།བཀྲ་ཤིས་སོགས་དབུ་སྐུལ་གནང་བ་དང་འབྲེལ་གསོལ་ཇ་དང་འབྲས་སིལ་འདེགས་འབུལ་བྱས་ཏེ་ཞལ་འདོན་གྲུབ་མཚམས་གྲྭ་ཚང་རང་གི་ཕྱག་མཛོད་ཁྲི་པ་དགེ་བཤེས་འཇམ་དབྱངས་དབང་ཕྱུག་མཆོག་དང་། དབུ་མཛད་དགེ་བཤེས་གོ་བོ་ཨ་དགའ་མཆོག །ཁམས་ཚན་ཉེར་ལྔའི་ཁམས་རྒན་རྣམས་ཀྱིས་ཁྲིམས་བདག་དགེ་བསྐོས་གསར་པ་མཆོག་ལ་རིམ་གྱིས་བཀྲ་ཤིས་དར་དཀར་འབུལ་བ་སོགས་མཛད་སྒོ་གྲུབ་རྗེས། དཔལ་ལྡན་འབྲས་བློ་གླིང་གྲྭ་ཚང་ནས་ཞོགས་ཚོགས་འཁར་རྔ་བརྡུང་བ་དང་དགེ་འདུན་པ་རྣམས་ཚོགས་ཞུགས་གྲུབ་རྗེས་བླ་མ་གཞུང་ལེན་པ་གཉིས་ཀ་ཚོགས་སུ་ཕེབས་ཏེ་བཞུགས།
ཚོགས་སུ་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཞབས་རིམ་དུ་སྨན་བླའི་གཟུགས་སྔགས་གསུང་གནང་དང་འབྲེལ་གཏོར་འབུལ་རྟ་ཆེན་ཡང་འཚོགས་གནང་། ཚོགས་གྲོལ་བ་དང་བླ་མ་གཞུང་ལེན་པ་གསར་རྙིང་གཉིས་ཀར་སོ་སོའི་ཁམས་ཚན་དུ་རྟེན་འབྲེལ་ལེགས་མཚོན་དང་ཐུགས་རྗེ་ལེགས་གསོལ་འབུལ་བ་སོགས་བྱས་ཏེ་མཛད་སྒོ་གྲོལ།
