ཨ་རི་ཨེ་མོ་རིའི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་མཁས་དབང་ལོ་ཙཱ་བ་དགེ་བཤེས་བློ་བཟང་བསྟན་འཛིན་མཆོག་ལ ༧ རྒྱལ་བའི་དགོངས་བཞེད་སྒྲུབ་པའི་གཟེངས་བསྟོད་འབུལ་བ།

༄༅། །ཨ་རི་ཨེ་མོ་རིའི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་མཁས་དབང་ལོ་ཙཱ་བ་དགེ་བཤེས་བློ་བཟང་བསྟན་འཛིན་མཆོག་ལ ༧ རྒྱལ་བའི་དགོངས་བཞེད་སྒྲུབ་པའི་གཟེངས་བསྟོད་འབུལ་བ། དེ་རིང་བོད་རྒྱལ་ལོ་ ༢༡༤༩ ཆུ་སྟག་བོད་ཟླ་ ༣ པའི་ཚེས་ ༥ དང་ཕྱི་ལོ་ ༢༠༢༢ ཟླ་བ་ ༥ པའི་ཚེས་ ༦ ཉིན། རྒྱ་གར་ལྷོ་ཕྱོགས་དཔལ་ནཱ་ལནྡཱ་གཉིས་པ་དཔལ་ལྡན་འབྲས་སྤུངས་མཁས་མང་བློ་གསལ་གླིང་གྲྭ་ཚང་གིས་རྒྱལ་བསྟན་དར་ཞིང་འགྲོ་ཀུན་བདེ་བ་དང་། ལྷག་པར་རང་ཅག་རྣམས་ཀྱི་དཔྲལ་བའི་མིག་དང་ཁོག་པའི་སྙིང་ལྟ་བུ་འདི་དང་ཕྱི་མའི་རེ་ས་བླ་ན་མ་མཆིས་པ་ཆེན་པོ་༸སྤྱི་ནོར་༸ གོང་ས་༧སྐྱབས་མགོན་རྒྱལ་དབང་ཐམས་ཅད་མཁྱེན་པ་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་དཔལ་བཟང་པོ་མཆོག་དང་། ༧སྐྱབས་རྗེ་དགའ་ལྡན་ཁྲི་གདན་ཟུར་དབུས་མཁན་ལས་ཟུར་རྣམ་པ། རྒྱལ་སྲས་བླ་སྤྲུལ་ཁག ། གནས་བརྟན་བགྲེས་སོང་བཀའ་རབ་འབྱམས་དགེ་བའི་བཤེས་གཉེན། དགེ་འདུན་འདུས་པ་རྒྱ་མཚོ་སོགས་རིས་མེད་བསྟན་འཛིན་གྱི་སྐྱེས་བུ་རྣམས་སྐུ་ཚེ་མཛད་དགོངས་འཕེལ་བ་དང་།  འཇིག་རྟེན་བདེ་ཞིང་འགྲོ་ཀུན་བདེ་བའི་སླད་ཁོ་ན་ལ་དམིགས་ཏེ་ཟླ་རེའི་མཚམས་སུ་གཏོར་འབུལ་རྟ་ཆེན་རེ་ཆགས་མེད་ཚོགས་བཞིན་པ་ལྟར། ཉིན་འདིར་ཡང་དཔལ་ལྡན་འབྲས་སྤུངས་བློ་གསལ་གླིང་གཙུག་ལག་ཁང་དུ་༧སྐྱབས་རྗེ་འབྲས་བློ་གླིང་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་དཔལ་བཟང་པོ་མཆོག་དབུ་བཞུགས་ཐོག་དགེ་འདུན་པ་ཞལ་གྲངས་ཉིས་སྟོང་ལྷག་གིས་གཏོརའབུལ་རྟ་ཆེན་ཚོགས་པའི་དབུས་སུ་གཟི་བརྗིད་ལྡན་པའི་ངང་གྲྭ་ཚང་གི་ཐོག་ནས་གོ་སྒྲིག་གནང་བ་བཞིན་༧སྐྱབས་རྗེ་མཁན་རིན་པོ་ཆེ་མཆོག་གིས་དཔལ་ལྡན་འབྲས་དཀར་སྤུངས་པའི་ཡ་གྱལ་མཁས་མང་བློ་གསལ་བྱེ་བའི་གླིང་གྲྭ་ཚང་ལ་བཀའ་དྲིན་བླ་ལྷག་ཏུ་ཆེ་བའི་ཨེ་མོ་རིའི་གཙུག་སློབ་གཉེར་ཁང་གི་སློབ་དཔོན་ཆེན་མོ་དགེ་བཤེས་བློ་བཟང་བསྟན་འཛིན་མཆོག་ལ་༧ རྒྱལ་བའི་དགོངས་བཞེད་སྒྲུབ་པའི་གཟེངས་བསྟོད་ཅེས་པའི་ཕྱག་འཁྱེར་གསོལ་སྩལ་གནང་བའི་སྐབས་བསྔགས་བརྗོད་ཀྱི་མེ་ཏོག་དང་གྲྭ་མང་ནས་ཐལ་མོས་རྡེབ་སྒྲས་ཁེངས། ཚོགས་དབུས་སུ་དཔལ་ལྡན་ཁྲིམས་བདག་དགེ་སྐོས་ཕུ་ཁང་བློ་བཟང་ཉི་མ་མཆོག་གིས་དགེ་བཤེས་བློ་བཟང་བསྟན་འཛིན་མཆོག་གིས་གྲྭ་ཚང་གི་ཕྱག་ལས་ཐོག་སྔ་ཕྱི་བར་གསུམ་ལ་རླབས་ཆེན་གྱི་གྲུབ་འབྲས་ཐོན་ཡོད་པ་སོགས་གསུང་པ་དང་། ཕྱག་མཛོད་ཁྲི་པ་སྤོམ་ར་དགེ་བཤེས་འཇམ་དབྱངས་དབང་ཕྱུག་མཆོག་གིས་དགེ་བཤེས་བློ་བཟང་བསྟན་འཛིན་གྱི་སྐུ་ཚེའི་ལོ་རྒྱུས་སྙིང་བསྡུས་ཤིག་སྙན་སྒྲོན་ཞུས། དེ་ནས་༧སྐྱབས་རྗེ་མཁན་རིན་པོ་ཆེ་མཆོག་གིས་དགེ་བཤེས་བློ་བཟང་བསྟན་འཛིན་ལགས་ཀྱིས་གྲྭ་ཚང་གི་ཕྱག་ལས་མི་ལོ་སོ་ལྔ་ལྷག་གནང་ཡོད་པ་དང་། གྲྭ་ཚང་གི་ཨ་རིར་འཁྲབ་སྟོན་པ་ཚོར་གོ་སྒྲིག་དང་། གྲྭ་ཚང་གི་འཚོབའི་མ་ཐེབས། བློ་གླིང་གཙུག་ལག་ཁང་གསར་བསྐྲུན་སྐབས་དང་ཆོས་ར་གསར་བཞེངས་སྐབས་སུ་རོགས་རམ། སྒོམ་སྒྲུབ་དང་ཚན་རིག་ལྟེ་གནས་ཁང་གསར་བསྐྲུན་སྐབས་ལས་འཆར་དང་རོགས་རམ་གནང་བ་སོགས་ཀྱིས་མཚོན་བཀའ་དྲིན་དེ་ལྷག་མེད་པ་གནང་བ་དང་། གཙོ་བོར༧ རྒྱལ་དབང་ཐམས་ཅད་མཁྱེན་པའི་དགོངས་བཞེད་བསླབ་གཞི་ཚན་རིག་དང་ཆོས་ལུགས་ལ་མ་བརྟེན་པའི་བཟང་སྤྱོད་ཐོག་བྱས་རྗེས་བླ་ན་མེད་པ་རྒྱལ་བ་དགྱེས་པའི་མཆོད་སྤྲིན་གནད་ལ་འཁེལ་བ་བསྒྲུབས་ཡོད་པས་༧ རྒྱལ་བ་ཡིད་བཞིན་ནོར་བུས་ཀྱང་བསྔགས་བརྗོད་དང་ཐུགས་དགྱེས་མཉེས་ཆེན་པོ་གནང་ཡོད་པ་རེད་ཅེས་བཀའ་སློབ་སྩལ། ཕྱག་འཁྱེར་གྱི་ངོས་སུ་ ࿑ ༧རྒྱལ་བའི་དགོངས་བཞེད་སྒྲུབ་པའི་གཟེངས་བསྟོད། ཅེས་དང་། མཚན་ནས་དྲངས་ཏེ། བློ་གྲོས་ཟབ་མོས་རྒྱལ་བའི་དགོངས་པ་བཞིན།། བཟང་སྤྱོད་སྤེལ་ལ་སྙིང་སྟོབས་ཆེས་བརྟན་ཞིང་།། བསྟན་ལ་གཅིག་ཏུ་དད་པའི་ཐུགས་ཁུར་གྱིས།། འཛིན་མའི་ཁུར་ཆེན་འདེགས་པ་ཁྱོད་ལ་བསྟོད།། ཅེས་བཀོད་ཡོད།