༄༅། །དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གིས་མཁྱེན་དཔྱོད་ཡངས་པ་ཐེ་ཝན་བློ་གསལ་གླིང་ཀུན་ཕན་ལྷན་ཚོགས་ཀྱི་ཚོགས་གཙོ་དགེ་བཤེས་བསྟན་འཛིན་ལམ་བཟང་མཆོག་ལ་༼སྤྱི་ཚོགས་ཕན་བདེའི་གཟེགས་བསྟོད།༽ཅེས་པ་འབུལ་ལམ་ཞུས་པ།

ཕྱི་ལོ་༢༠༢༢ ལོའི་ཟླ་བ་༡༠ ཚེས་ ༡༡ ཉིན་སྔ་དྲོར་གྲྭ་ཚང་གི་གཏོར་འབུལ་རྟ་ཆེན་དང་། སྦྱིན་བདག་ཁག་གིས་རེ་ཞུས་ལྟར་སྒྲོལ་མ་ཉིན་ཚོགས་ཀྱི་ཉིན་མོར་མཁྱེན་དཔྱོད་དང་ལྷག་བསམ་མཆོག་ཏུ་ཡངས་པ་ ཐེ་ཝན་བློ་གསལ་གླིང་ཀུན་ཕན་ལྷན་ཚོགས་ཀྱི་ཚོགས་གཙོ་དགེ་བཤེས་བསྟན་འཛིན་ལམ་བཟང་མཆོག་གིས་ལོ་མང་རིང་གཙོ་བོར་བློ་གླིང་གྲྭ་ཚང་དང་། དགོན་སྡེ་ཁག །བོད་མིའི་གཞིས་ཆགས། རྒྱ་གར་ཡུལ་མི་བཅས་ལ་གཟེངས་སུ་ཐོན་པའི་སྤྱི་ཚོགས་ཀྱི་ཞབས་ཕྱི་ཞུས་གནང་ཡོད་སྟབས་སྤྱི་ཚོགས་ཕན་བདེའི་གཟེངས་བསྟོད་ཅེས་པ་འབུལ་ཡོད།
སྔ་དྲོར་གཏོར་འབུལ་རྟ་ཆེན་ཚོགས་གནང་བ་དང་སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག་དབུ་བཞུགས་ཐོག་སྐྱབས་གནས་དགེ་འདུན་འདུས་པ་རྒྱ་མཚོའི་དབུས་སུ་མཁན་རིན་པོ་ཆེ་མཆོག་གིས་དགེ་བཤེས་བསྟན་འཛིན་ལམ་བཟང་ལགས་ནས་ལོ་མང་པོ་རིང་གྲྭ་ཚང་གི་སྨན་ཁང་ཕྱི་ནང་རྒྱ་བསྐྱེད་དང་། ཐེ་ཝན་གྲྭ་ཚང་གི་ཆོས་ཚོགས་གསར་འཛུགས་གནང་བ་སོགས་ཀྱིས་མཚོན་པའི་བཀའ་དྲིན་ཧ་ཅང་ཆེན་པོ་གནང་སྟེ་རླབས་ཆེ་བའི་བྱ་བཞག་ལ་གཡུར་དུ་ཟ་བའི་འབྲས་བུ་བཟང་པོ་ཐོབ་ཡོད་པ་དང་། སྤྱི་ཚོགས་ཀྱི་ཞབས་ཕྱི་ཕན་ནུས་ལྡན་པ་བསྒྲུབས་ཡོད་པས་གྲྭ་ཚང་གི་ངོས་ནས་༼སྤྱི་ཚོགས་ཕན་བདེའི་གཟེངས་བསྟོད།༽ཅེས་པ་བཀའ་དྲིན་ངོ་ཤེས་པའི་ཐོག་ནས་ཐུགས་རྗེ་བཀའ་དྲིན་ལེགས་གསོལ་མཚོན་བྱེད་དུ་འབུལ་ཚུལ་སོགས་གསུང་གནང་བ་དང་། ཕྱག་མཛོད་ཁྲི་པ་དགེ་བཤེས་འཇམ་དབྱངས་དབང་ཕྱུག་མཆོག་གིས་དགེ་བཤེས་བསྟན་འཛིན་ལམ་བཟང་མཆོག་གི་ལོ་རྒྱུས་སྙིང་བསྡུས་ཤིག་སྒྲོག་སྦྱོང་གནང་བ་དང་། དུས་རྟག་ཏུ་གྲྭ་ཚང་རིན་པོ་ཆེ་མགཏོགས་ཐུགས་ལ་གཞན་དགོངས་རྒྱུ་མེད་མཁན་རྒན་ཁོང་ལྟ་བུ་གྲྭ་ཚང་འདི་ཉིད་ལ་བཀའ་དྲིན་བསམ་བརྗོད་ལས་འདས་པ་ཆེ་བས། དེ་རིང་བཀའ་དྲིན་མཚོན་བྱེད་དུ་སྤྱི་ཚོགས་ཕན་བདེའི་གཟེངས་བསྟོད་གཅིག་གྲྭ་ཚང་གི་མཁན་བླ་འདུས་མང་ཡོངས་ཀྱིས་ཐུགས་དགོངས་གཅིག་མཐུན་གྱི་སྒོ་ནས་འབུལ་བ་ལགས་ན། རྒན་མཆོག་གིས་དགྱེས་བཞེས་ཡོང་བར་ཞུ། ཞེས་གསུངས་པ་དང་ཐུགས་རྗེ་ཆེ་ཞུས་གནང་།
ཚོགས་དབུས་སུ་སྐྱབས་རྗེ་མཁན་རིན་པོ་ཆེ་མཆོག་གིས་དགེ་བཤེས་བསྟན་འཛིན་ལམ་བཟང་མཆོག་ལ་ཕྱག་འཁྱེར་གཟེངས་བསྟོད་སྩལ་གནང་བ་དང་། ཐེ་ཝན་ཆོས་ཚོགས་བློ་གསལ་གླིང་ཀུན་ཕན་ལྷན་ཚོགས་ལ་འདོད་ཁམས་དམག་ཟོར་རྒྱལ་མོ་དཔལ་ལྡན་ལྷ་མོའི་སྐུ་ཐང་འཚེམ་དྲུབ་མ་ཞིག་འབུལ་གནང་མཛད། དེ་བཞིན་གྲྭ་ཚང་སྨན་ཁང་གིས་ན་བཟའ་ཆ་ཚང་ཞིག་ལེགས་སྐྱེས་སུ་འབུལ།
དེ་ནས་ཐེ་ཝན་ཐེ་ཀྲུང་བློ་གསལ་གླིང་ཀུན་ཕན་ལྷན་ཚོགས་ཀྱི་ཚོགས་གཞོན་wei Jedi fang མཆོག་ལ་གྲྭ་ཚང་གི་ངོས་ནས་ཚེ་ལྷ་རྣམ་གསུམ་གྱི་ཞལ་ཐང་དང་། སྨན་ཁང་གིས་༸ སྐུ་མདུན་ཡིད་བཞིན་ནོར་བུའི་ཞལ་ཐང་། བདུག་སྤོས་སོགས་ཐུགས་རྗེ་བཀའ་དྲིན་མཚོན་བྱེད་དུ་ལེགས་སྐྱེས་ཕུལ་བ་དང་། ཁོང་གིས་ཀྱང་ལོ་མང་རིང་ཐེ་ཝན་ཆོས་ཚོགས་ཀྱི་ཚོགས་གཞོན་ལོ་མང་རིང་འགན་བཞེས་གནང་སྟེ་བཀའ་དྲིན་ཧ་ཅང་ཆེན་པོ་ཡིན་པ་གནང་ཡོད་པ་སོགས་གསུངས།

ཐེ་ཝན་ཐེ་ཀྲུང་བློ་གསལ་གླིང་ཀུན་ཕན་ལྷན་ཚོགས་ཀྱི་ཚོགས་གཙོ་དགེ་བཤེས་བསྟན་འཛིན་ལམ་བཟང་མཆོག་ནི། ཕྱི་ལོ་ ༡༩༥༩ཟླ་བ་ ༤ པའི་ཚེས་ ༢༦ ཉིན་ཐེ་ཝན་གྱི་གྲོང་ཁྱེར་ཐེ་ཀྲུང་དུ་སྐུ་འཁྲུངས། ཝེ་ཀྲུང་ནང་སློབ་ཆུང་དང་། སློབ་འབྲིང་། སློབ་ཆེན་བཅས་ནས་མཐར་ཕྱིན་པ་དང་། དེ་ནས་འཁོར་བ་ལ་སྙིང་པོ་མེད་པར་གཟིགས་ནས་ཕྱི་ལོ་༡༩༩༦ ལོར་རྡ་སར་རིགས་ལམ་སློབ་གཉེར་ཁང་དུ་འཛུལ་ཞུགས་གནང་སྟེ། བོད་ཀྱི་སྐད་ཡིག་དང་། ནང་ཆོས་སྦྱོང་འགོ་བཙུགས་ནས་དང་པོར་བསྡུས་གྲྭ་དང་བློ་རིག ། རྟགས་རིགས་སོགས་ལ་སྦྱངས་པ་གནང་། དེ་ནས་༸ སྤྱི་ནོར་༸ གོང་ས་༸སྐྱབས་མགོན་ཆེན་པོ་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཞལ་སྔ་ནས་དགེ་ཚུལ་གྱི་བསླབ་སྡོམ་ཞུས་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་མཛད། ཕྱི་ལོ་༡༩༩༨ ལོར་མཁས་མང་བློ་གསལ་བྱེ་བའི་གླིང་གྲྭ་ཚང་གི་ཆོས་སྒོར་ཞུགས་ནས་རྒྱ་ཆེ་བ་ཕར་ཕྱིན་གཞུང་ལུགས་དང་། ཟབ་པ་དབུ་མའི་གཞུང་ལུགས། དམ་པའི་ཆོས་འདུལ་བའི་གཞུང་ལུགས་བཅས་ལ་སྦྱངས་པར་མཐར་ཕྱིན་པར་མཛད་ནས་ཕྱི་ལོ་༢༠༡༥ ལོར་དགེ་བཤེས་དམ་འཇོག་གནང་། ཕྱི་ལོ་༢༠༠༣ ཟླ་བ་ ༦ པའི་ཚེས་༢༦ ནས་ཕྱི་ལོ་༢༠༡༩ ཟླ་བ་ ༧ པའི་ཚེས་ ༡༠ བར་ལོ་ངོ་བཅུ་བདུན་རིང་གྲྭ་ཚང་སྨན་ཁང་གི་འགན་འཛིན་གནང་ནས་བློ་གླིང་གྲྭ་ཚང་གི་དགེ་འདུན་པ་གཙོས་དགེ་འདུན་པ་ཡོངས་དང་། གཞིས་ཆགས་མི་མང་། ས་གནས་རྒྱ་གར་ཡུལ་མི་བཅས་ལ་ཕན་ཐོགས་ཧ་ཅང་རྒྱ་ཆེན་པོ་བྱུང་དང་འབྱུང་བཞིན་ཡོད་པ་བཅས་ལ་ཀུན་གྱིས་བསྔགས་བརྗོད་ཀྱི་མེ་ཏོག་མངོན་པ་གཏོར་བཞིན་ཡོད།

ཕྱི་ལོ་༢༠༠༡ ནས་དངོས་སུ་ཐེ་ཀྲུང་ནང་བློ་གསལ་གླིང་ཀུན་ཕན་ལྷན་ཚོགས་ཀྱི་ཆོས་ཚོགས་གསར་པ་དབུ་འཛུགས་གནང་བ་དང་། ཕྱི་ལོ་༢༠༠༦ ལོར་སྐྱབས་རྗེ་མཁན་རིན་པོ་ཆེ་གདན་ཞུས་ཀྱིས་ཆོས་ཚོགས་དབུ་འབྱེད་མཛད་སྒོ་གནང་། དེ་ནས་ད་ལྟའི་བར་དུ་ཐེ་ཝན་ནང་བློ་གསལ་ཀུན་ཕན་ལྷན་ཚོགས་ཐེ་ཀྲུང་དང་། ཀབ་ཞོང་། ཐེ་པེའེ་བཅས་ལ་ཆོས་ཚོགས་གསར་འཛུགས་ཀྱི་ལས་གཞི་རྒྱ་ཆེན་པོ་འབད་སྒྲུབ་གནང་བཞིན་པ་དང་། ཕྱི་ལོ་ ༢༠༡༣ ལོ་ནས་གནས་མཆོག་རྡོ་རྗེ་གདན་དུ་གྲྭ་ཚང་གི་དགོན་པ་གསར་བཞེངས་ཀྱི་ཐུགས་འགན་གཙོ་བོར་བཞེས་ནས་ད་ལྟའི་ཆར་དགོན་པ་དང་གྲྭ་ཤག་བཅས་ཕུན་སུམ་ཚོགས་པ་བྱུང་ཡོད། མ་ཟད་དུས་རྟག་ཏུ་གྲྭ་ཚང་རིན་པོ་ཆེའི་ལས་དོན་ཆེ་ཕྲ་ཆུང་གསུམ་ཚང་མ་ཐུགས་ལ་བཅངས་ནས་སྔ་ཕྱི་བར་གསུམ་དུ་གྲྭ་ཚང་འདི་ཉིད་ལས་གཞན་བསམ་རྒྱུ་མེད་པ་ལྟ་བུའི་གྲྭ་ཚང་ལ་བཀའ་དྲིན་ཧ་ཅང་ཆེན་པོ་ཡིན་པས་དེ་རིང་གི་དུས་བཟང་འདི་ལ་བཀའ་དྲིན་མཚོན་བྱེད་དུ་སྤྱི་ཚོགས་ཕན་བདེའི་གཟེངས་བསྟོད་ཅེས་པ་མཁན་བླ་འདུས་མང་ཡོངས་ཀྱིས་ཐུགས་དགོངས་གཅིག་མཐུན་གྱི་སྒོ་ནས་ཕུལ་བ་མཛད་དོ།།