སྤྱི་ལོ་ ༢༠༡༩ ལོའི་འཛིན་དང་པོའི་འདུལ་མཛོད་གཉིས་ཀྱི་མུ་བཞི་རྩིས་སྤྲོད་དང་དོགས་གཅོད།
ཕྱི་ལོ་ ༢༠༡༩ ལོའི་འཛིན་དང་པོའི་དོགས་གཅོད་ཐེངས་དང་པོའི་འདུལ་མཛོད་གཉིས་ཀྱི་མུ་བཞི་རྩིས་སྤྲོད་དང་དོགས་གཅོད་འཚོགས་ཡོད་པ་རེད། དེ་ཡང་བོད་རབ་བཅུ་བདུན་པའི་མེ་ཕག་ལོའི་ཟླ་ ༥ ཚེས་ ༡༠ དང་། ཕྱི་ལོ་ ༢༠༡༩ ཟླ་ ༧ ཚེས་ ༡༡ ནས་ཉིན་བཞིའི་རིང་གཙུག་ལག་ཁང་གསར་པའི་ནང་དུ་འཛིན་དང་པོའི་དོགས་གཅོད་ཚོགས་ཡོད་ཅིང་། དཔལ་ལྡན་འབྲས་སྤུངས་བློ་གླིང་གྲྭ་ཚང་གི་སྔོན་བྱོན་མཁས་དབང་སྐྱེས་མཆོག་སྡེ་སྣོད་གསུམ་ལ་སྦྱངས་པ་མཐར་སོན་པའི་མཁས་པའི་དབང་པོ་ཚོས་བཞེད་སྲོལ་འཛིན་དང་པོའི་དོགས་གཅོད་ལོ་བསྟར་ཆགས་ཚོགས་བཞིན་པ་ལྟར། ལོ་འདིར་དགེ་བཤེས་ལས་ཐོག་ཚོས་འགན་འཁུར་འོག་མཛོད་འདུལ་དོགས་གཅོད་ཚོགས་སྐབས་གྲྭ་ཚང་གི་སྐྱབས་རྗེ་མཁན་ལས་ཟུར་དང་། རབ་འབྱམས་གཞུང་ལུགས་བརྒྱ་ཕྲག་སྨྲ་བའི་དཔེ་ཁྲིད་དགེ་རྒན་རྣམ་པ། རིགས་པ་སྨྲ་བའི་ཁྱུ་མཆོག་སློབ་གཉེར་བ་ཁག་བཅས་གདན་འཛོམས་པའི་དབུས་སུ། ཉིན་དང་པོར་ཚོགས་ལངས་པ་གཉིས་དམ་བཅའ་བཞུགས་ཏེ། ལྷ་རམས་ལོ་རིམ་གཉིས་པ་དང་འདུལ་བ་ལས་གཞི་འཛིན་གྲྭ་གཉིས་ཀྱིས་འདུལ་བའི་སྐོར་གྱི་མུ་བཞི་རྩིས་སྤྲོད་དང་། ཉིན་གཉིས་པར་འདུལ་བའི་སྐོར་གྱི་དོགས་གཅོད། ཉིན་གསུམ་པར་དགེ་ལུགས་རྒྱུགས་སྤྲོད་ལ་ཞུགས་པ་ཡོངས་དང་མཛོད་གཉིས་པ་ཡན་གྱིས་མཛོད་ཀྱི་མུ་བཞི་རྩིས་སྤྲོད་དང་། ཉིན་བཞི་པར་མཛོད་ཀྱི་སྐོར་དྭོགས་གཅོདགནང་ཡོད་པ་རེད། མུ་བཞི་ཆེན་མོ་ཟླ་བ་འགའ་ཞིག་སྔོན་ནས་བཟོས་པ་དེ་མུ་བཞི་བསྒྲིགས་ནས་རྩིས་སྤྲོད་པ་དང་སྦྲགས་དོགས་གཅོད་ཀྱང་རྒྱ་གཞུང་ཚད་ལྡན་ཁག་ལ་གཞི་བཅོལ་རྗེ་ཡབ་སྲས་གསུམ་གྱི་གསུང་འབུམ་ཁག་དང་། མདོ་སྔགས་རབ་འབྱམས་སྨྲ་བ་པཎ་ཆེན་མཆོག་གི་གསུང་། གཞན་ཡང་མཁས་པ་གཞན་གྱིས་གསུང་སྲོལ་དང་བཞེད་སྲོལ་མི་འདྲ་བ་ཁག་ལ་དྲི་མ་མེད་པའི་ལུང་རིགས་ཀྱི་བརྒལ་བརྟག་ལམ་ནས་དཔྱད་པར་དཔྱིས་ཕྱིན་པ་བཅས་གནང་གྲུབ་རྗེས། སྐྱབས་རྗེ་མཁན་རིན་པོ་ཆེ་མཆོག་དང་། དཔལ་ལྡན་ཁྲིམས་བདག་དགེ་བསྐོས་བཅས་ནས་མཇུག་བསྡུ་བའི་བཀའ་སློབ་དང་འབྲེལ་ཐུགས་རྗེ་ཆེ་ཞུ་བཅས་ཞུས་གནང་སྟེ་ཉིན་བཞི་པའི་དོགས་བཅད་བཅས་ཡོངས་སུ་གྲོལ།
