༄༅།།ཕྱི་ལོ་ ༢༠༡༩ ཟླ་ ༡༡ ཚེས་ ༥ དགེ་བའི་ཉིན་བཀའ་བློན་ཁྲི་ཟུར་མཁས་དབང་སྐྱབས་རྗེ་སློབ་དཔོན་༧ ཟམ་གདོང་རིན་པོ་ཆེ་མཆོག་དགུང་གྲངས་བརྒྱད་ཅུ་ལ་ཕེབས་པའི་༧སྐུའི་འཁྲུངས་སྐར་གྱ་སྟོན་སྲུང་བརྩི་ཞུ་བའི་མཛད་སྒོ་འཚོགས་པ།
༄༅། །གནའ་དེང་རིག་པའི་གཞུང་ལུགས་མཐའ་དག་ལ་ནང་བྱན་ཆུབ་ཅིང་། རབ་འབྱམས་སྨྲ་བ་ཀུན་གྱི་གཙུག་གི་རྒྱན་དུ་གྱུར་པ་༧འཕགས་མཆོག་ཕྱག་ན་པདྨོའི་བཀའ་ཡི་མདུན་ན་འདོན་ཆེན་པོ་བཀའ་བློན་ཁྲི་ཟུར་མཁས་དབང་སྐྱབས་རྗེ་སློབ་དཔོན་༧ ཟམ་གདོང་རིན་པོ་ཆེ་མཆོག་དགུང་གྲངས་བརྒྱད་ཅུ་ལ་ཕེབས་པའི་༧སྐུའི་འཁྲུངས་སྐར་གྱ་སྟོན་སྲུང་བརྩི་ཞུ་བའི་མཛད་སྒོ་འཚོགས་པ།
ཟམ་མི་ཆད་པ་སྤྲུལ་པའི་རོལ་གར་སྲིད་པ་གསུམ་གྱི་འཇིག་རྟེན་དང་།།
གདོང་དམར་ཡུལ་གྱི་སཱ་ལའི་སྨན་ལྗོངས་བསམ་བཞིན་སྲིད་པ་བཟུང་བ་ཡི།།
བློ་གྲོས་སྟོབས་ཀྱིས་གནའ་རབས་གཞུང་དང་དེང་རབས་དཔལ་ཡོན་ལྷུར་བཞེས་ཤིང་།།
བཟང་པོ་བསླབ་གསུམ་ཡོན་ཏན་ནོར་དང་ངུར་སྨིག་གོས་ཀྱིས་རབ་བརྒྱན་ཏེ།།
བསྟན་དང་འགྲོ་ལ་ཕན་བདེ་སྟེར་མཁས་མིག་མི་འཛུམ་པའི་བཀའ་དགོངས་དག།
འཛིན་ཅིང་སྤེལ་ལ་ཟླ་བྲལ་བླ་མ་ཆོས་ཀྱི་རྒྱལ་མཚན་གསོལ་བར་འདེབས།།
དེ་ཡང་བོད་རྒྱལ་ལོ་༢༡༤༦ཟླ་བ་༩ཚེས༩དང་།ཕྱི་ལོ་༢༠༡༩ལོའི་ཟླ་༡༡ཚེས་༥ཉིན་སྔ་དྲོར་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གིས་བློ་གསལ་གླིང་འདུ་ཁང་སྤྲུལ་པའི་གཙུག་ལག་ཁང་དུ་བོད་བསྟན་སྲིད་མི་རིགས་དང་བཅས་པའི་བདེ་དོན་དུ་སྐུ་ཚེ་ཧྲིལ་པོར་༸གོང་ས་༸སྐྱབས་མགོན་༸རྒྱལ་དབང་ཡིད་བཞིན་ནོར་བུའི་རླབས་ཆེན་བཀའ་དགོངས་རྩེ་གཅིག་སྒྲུབ་པའི་བཀའ་བློན་ཁྲི་ཟུར་༧སྐྱབས་རྗེ་མཁས་དབང་ཟམ་གདོང་རིན་པོ་ཆེ་དཔལ་བཟང་པོ་མཆོག་ཕྱི་ལོ་༢༠༡༩ལོའི་ཟླ་༡༡པའི་ཚེས་༥ཉིན་དགུང་གྲངས་གྱ་ལྔར་ཕེབས་པའི་སྐུའི་འཁྲུངས་སྐར་དུས་ཆེན་ཁྱད་པར་ཅན་ལ་རྟེན་འབྲེལ་གྱི་མཛད་སྒོ་རྒྱས་པ་ཞིག་འཚོགས་ཡོད།
༧སྐུའི་གྱ་སྟོན་མཛད་སྒོའི་ཚོགས་མགོན་དུ་ཕྱོགས་བཞུགས་མཁན་ཚབ་ཡོངས་ཀྱི་དགེ་བའི་བཤེས་གཉེན་ཆེན་པོ་སྐྱབས་རྗེ་མཁན་ཟུར་རིན་པོ་ཆེ་རྗེ་བཙུན་དཀོན་མཆོག་དཔག་བསམ་དཔལ་བཟང་པོ་མཆོག་དང་།སྐྱབས་རྗེ་རྒྱུད་སྨད་མཁན་ཟུར་རིན་པོ་ཆེ་རྗེ་བཙུན་མཐུ་སྟོབས་མགོན་པོ་དཔལ་བཟང་པོ་མཆོག།དམིགས་བསལ་སྐུ་མགྲོན་དབུས་བོད་མིའི་སྒྲིག་འཛུགས་ཀྱི་སྐུ་ཚབ་ས་གནས་གཞིས་འགོ་མི་རྗེ་སྐུ་ངོ་ལྷག་པ་ཚེ་རིང་མཆོག།བླ་མ་གཞུང་ལེན་པ་དགེ་བཤེས་ཡེ་ཤེས་ཆོས་འཕེལ་མཆོག།དཔལ་ལྡན་ཁྲིམས་བདག་དགེ་བསྐོས་དགེ་བཤེས་བྱང་ཆུབ་ངག་དབང་མཆོག།དབུ་མཛད་དགེ་བཤེས་གཙུག་ལག་རྒྱ་མཚོ་མཆོག།ཕྱག་མཛོད་ཁྲི་པ་དགེ་བཤེས་བློ་བཟང་ཟླ་བ་གཙོས་ཕྱག་མཛོད་ལྷན་རྒྱས།གཞན་ཡང་བཀའ་རབ་འབྱམས་དགེ་བའི་བཤེས་གཉེན་གནས་བརྟན་བགྲེས་པ་རྣམས་དང་།དགེ་འདུན་འདུས་པ་རྒྱ་མཚོ་ལྷན་འཛོམས་ཐོག་སྐུ་མགྲོན་རྣམས་ཀྱིས་ཐོག་མར་༧གོང་ས་༧རྒྱལ་དབང་ཐམས་ཅད་མཁྱེན་པ་མཆོག་གི་སྐུ་པར་མཐོང་གྲོལ་རིན་པོ་ཆེ་དང་།༧སྐྱབས་རྗེ་ཟམ་གདོང་རིན་པོ་ཆེ་མཆོག་གི་སྐུ་པར་མཐོང་གྲོལ་རིན་པོ་ཆེ་ལ་མཎྜལ་རྟེན་གསུམ་འདེགས་འབུལ་ཞུས་པ་དང་མཇལ་དར་བཅས་འབུལ་བ་དང་མར་མེ་ཞལ་ཕྱེ་གནང་།དབུ་མཛད་མཆོག་གིས་ཚོགས་དབུས་སུ་དབུ་སྐུལ་དང་འབྲེལ་དམིགས་བསལ་༧གོང་ས་མཆོག་གིས་ལྗགས་རྩོམ་མཛད་པའི་བཀའ་ཟུར་མཁས་དབང་སློབ་དཔོན་ཟམ་གདོང་རིན་པོ་ཆེ་མཆོག་གི་ཞབས་བརྟན་གསོལ་འདེབས་ཞལ་འདོན་གནང་།སྐྱབས་རྗེ་མཁན་ཟུར་རིན་པོ་ཆེ་རྣམ་གཉིས་དང་ས་གནས་གཞིས་འགོ་མཆོག་གིས་དེང་ལུགས་ལྟར་སྤྲི་གོར་གཏུབས་ཏེ་སྨོན་ཚིག་གནང་གྲུབ་རྗེས་རིམ་བཞིན་དགེ་འདུན་འདུས་པ་རྒྱ་མཚོ་ལ་སྤྲི་གོར་དང་འབྲས་སིལ་གསོལ་ཇ་བཅས་འབུལ་ལམ་ཞུས་གནང་།
དེ་ནས་རིམ་བཞིན་ཕྱག་མཛོད་བློ་ལྡན་མཆོག་གིས་སློབ་དཔོན་མཁས་དབང་ཟམ་གདོང་རིན་པོ་ཆེ་མཆོག་གི་གལ་ཆེ་བའི་རྣམ་ཐར་དང་འབྲེལ་བའི་སྐུ་ཚེའི་ལོ་རྒྱུས་ཀྱི་གསུང་བཤད་དང་།དཔལ་ལྡན་ཁྲིམས་བདག་དགེ་བསྐོས་དགེ་བཤེས་བྱང་ཆུབ་ངག་དབང་མཆོག་གིས་༧སྐུའི་གྱ་སྟོན་སྲུང་བརྩི་ཞུ་བའི་དགོས་པ།བླ་མ་གཞུང་ལེན་པ་དགེ་བཤེས་ཡེ་ཤེས་ཆོས་འཕེལ་མཆོག་གིས་ཆོས་སྲིད་ལུགས་གཉིས་ལ་སྨན་པའི་མཛད་རྗེས་སྐོར།དམིགས་བསལ་སྐུ་མགྲོན་དབུས་བོད་མིའི་སྒྲིག་འཛུགས་ཀྱི་སྐུ་ཚབ་ས་གནས་གཞིས་འགོ་མི་རྗེ་སྐུ་ངོ་ལྷག་པ་ཚེ་རིང་མཆོག་གིས་སློབ་དཔོན་ཟམ་གདོང་རིན་པོ་ཆེ་མཆོག་གི་དབུ་འོག་དཔུང་འདེགས་བྱས་ཏེ་ལོ་ཉི་ཤུ་ལྷག་ཕྱག་ལས་གནང་མྱོང་བའི་ཁོང་གིས་གང་གསུང་པ་རྣམས་ཕྱག་བསྟར་གནང་ཐུབ་མཁན་གྱི་སྙིང་སྟོབས་ཅན་གྱི་སྐྱེས་བུ་ཞིག་ཡིན་པའི་སྐོར་ལས་འཕྲོས་ཏེ་སྤྱི་ཚོགས་སུ་འབུར་དུ་དོད་པའི་ཕྱག་ལས་གང་གནང་ཡོད་པ་དང་འབྲེལ་བའི་གསུང་བཤད་གནང་།མཁན་ཚབ་མཁན་ཟུར་རིན་པོ་ཆེ་རྗེ་བཙུན་དཀོན་མཆོག་དཔག་བསམ་མཆོག་གིས་བློ་གླིང་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག་གི་༧སྐུའི་གྱ་སྟོན་ཐོག་དམིགས་བསལ་གསུང་འཕྲིན་སྩལ་བ་སྒྲོག་སྦྱང་གནང་བ་དང་།སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་བོད་ལ་འཁྲུངས་པ་དང་།དཔལ་ལྡན་འབྲས་སྤུངས་སུ་ཆོས་ཞུགས་གནང་སྟེ་སློབ་གཉེར་གནང་ཚུལ།ཌལ་ཧོར་དུ་དགེ་བཤེས་ལྷ་རམས་པའི་དམ་འཇོག་གནང་ཚུལ།༧གོང་ས་མཆོག་གི་དབུ་འོག་དཔུང་འདེགས་གནང་སྟེ་བོད་རིགས་སྤྱི་བོ་གནམ་བསྟན་ཡོངས་ཀྱི་ཕྱག་ལས་གཟེངས་སུ་ཐོན་པ་གནང་བའི་སྐོར་སོགས་བཀའ་སློབ་ཟབ་རྒྱས་གནང་།
དེ་ནས་ཕྱག་མཛོད་ཁྲི་པ་དགེ་བཤེས་བློ་བཟང་ཟླ་བ་མཆོག་གིས་གསུང་བཤད་པ་རྣམས་དང་སྐུ་མགྲོན་ཡོངས། དགེ་འདུས་པ་རྒྱ་མཚོ་ལ་ཐུགས་རྗེ་ཆེ་ཞུ་དང་འབྲེལ་གྲྭ་ཚང་གིས་༧ སྐུའི་འཁྲུངས་སྐར་དང་འབྲེལ་བའི་གྱ་སྟོན་བསུ་དགོས་པ་ཡང་བླ་མའི་སྐུ་གསུང་ཐུགས་ཀྱི་ཡོན་ཏན་དྲན་དགོས་པ་མ་ཟད་སློབ་དཔོན་ཟམ་གདོང་རིན་པོ་ཆེ་མཆོག་ནི་༧རྒྱལ་དབང་དོན་གྱི་བདག་པོའི་བཀའ་ཡི་མདུན་ན་འདོན་དང་ཕྱག་གཡས་པ་ལྟ་བུའི་སྐྱེས་ཆེན་དམ་པ་བོད་ཀྱི་ཆོས་དང་རིག་གཞུང་ལ་རླབས་ཆེན་མཛད་རྗེས་ཅན་ཡིན་པ་སྐོར་ལས་གསུང་བཤད་གནང་གྲུབ་རྗེས་མཛད་སྒོ་རྒྱལ་ཁའི་ངང་གྲོལ།
