༄༅། །ཕྱི་ལོ་༢༠༡༩ ལོའི་བློ་གསལ་བྱེ་བའི་གླིང་གྲྭ་ཚང་གི་གསང་བ་སྔགས་དང་གཞུང་ཆེན་པོད་ལྔའི་རབ་འབྱམས་པའི་ཕྱག་ཁྱེར་འབུལ་ལམ་ཞུས་པའི་མཛད་སྒོ་འཚོགས་པ།
བོད་རྒྱལ་ལོ་༢༡༤༦ཟླ་བ་༡༠ཚེས་༧དང་།ཕྱི་ལོ་༢༠༡༩ལོའི་ཟླ་༡༢ཚེས་༣རེས་གཟའ་མིག་དམར་གྱི་དགོང་མོར་ཆོས་སྡེ་ཆེན་མོ་དཔལ་ན་ལེནྡྲ་གཉིས་པ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གིས་ལོ་ལྟར་དགེ་བཤེས་ཀྱི་ཕྱག་ཁྱེར་དང་།དགེ་ལྡན་ལུགས་བཟང་གཙུག་སློབ་གཉེར་ཁང་ནས་རྒྱུགས་སྤྲོད་རྩེར་སོན་པ་རྣམས་དང་རྒྱུགས་ཞུགས་པ་ཡོངས།གསང་སྔགས་རབ་འབྱམས་པ་དང་།གཞུང་ཆེན་པོད་ལྔའི་རབ་འབྱམས་པ་རྣམས་ལ་གཟེངས་བསྟོད་བྱ་དགའ་དང་།གཞན་ཡང་པོད་ལྔའི་རྩ་བ་དང་།དྲང་ངེས་ལེགས་བཤད་སྙིང་པོ།དབུ་མ་དགོངས་པ་རབ་གསལ།དབུ་མ་རིགས་ཚོགས་དྲུག།དབུ་མ་རྩ་བ་ཤེས་རབ།འགྲེལ་པ་དོན་གསལ།པཎ་ཆེན་ཕར་ཕྱིན་སྤྱི་མཐའ།སྤྱོད་འཇུག་ཆེན་མོ་སོགས་ཟུར་རྒྱུགས་འབུལ་བ་རྣམས་ལ་གཟེངས་བསྟོད་བྱ་དགའ་གནང་སྲོལ་ཡོད་པ་ལྟར་འདི་ལོའི་རབ་འབྱམས་པ་དང་ཟུར་རྒྱུགས་འབུལ་མཁན་རྣམས་ལ་གསོལ་རས་གཟེངས་བསྟོད་གནང་བའི་བྱེད་སྒོ་འཚོགས་ཡོད།
བློ་གླིང་སྤྲུལ་པའིགཙུག་ལག་ཁང་དུ་༸སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་དཔལ་བཟང་པོ་མཆོག་གི་དབུས་དབུ་ཆོས་རྣམས་དང་། དཔལ་ལྡན་ཁྲིམས་བདག་དགེ་བསྐོས་དགེ་བཤེས་བྱང་ཆུབ་ངག་དབང་མཆོག །ཕྱག་མཛོད་ཁྲི་པ་དགེ་བཤེས་བློ་བཟང་ཟླ་བ་དབུས་ཕྱག་མཛོད་ལྷན་རྒྱས། རྒྱུགས་སྤྲོད་ཚོགས་ཆུང་གི་ལས་སྣེ་ལྷན་རྒྱས། གཞན་ཡང་བཀའ་རབ་འབྱམས་དགེ་བའི་བཤེས་གཉེན་རྒྱལ་སྲས་བླ་སྤྲུལ་ཁག་དང་དགེ་འདུན་འདུས་པ་རྒྱ་མཚོའི་དབུས་སུ་ཕྱག་ཁྱེར་དང་གཟེངས་བསྟོད་སོགས་གསོལ་རས་བཅས་སྩལ་ཡོད།
དེ་ཡང་རྒྱུགས་སྤྲོད་ཚོགས་ཆུང་ནས་དགེ་བཤེས་དང་སློབ་གཉེར་བ་རྣམས་ཀྱི་མཚན་ནས་འབོད་དེ་དགེ་བཤེས་ལྷ་རམས་པའི་ཕྱག་ཁྱེར་དགེ་བཤེས་ཚོགས་རམས་པའི་ཕྱག་ཁྱེར།གསང་སྔགས་ཀྱི་ཕྱག་ཁྱེར་དང་གསང་སྔགས་ལོ་རིམ་གསུམ་གྱི་གྲུབ་འབྲས་ཤོག་ལྷེ།དགེ་ལུགས་རྒྱུགས་སྤྲོད་ལྷ་རམས་གཉིས།སློབ་དཔོན་གཉིས།བཀའ་རམས་གཉིས་བཅས་འཛིན་གྲྭ་དྲུག་གི་གྲུབ་འབྲས་ཤོག་ལྷེ།མཛོད་རབ་འབྱམས།འདུལ་བ་རབ་འབྱམས།དབུ་མ་རབ་འབྱམས།ཕར་ཕྱིན་རབ་འབྱམས་སོགས་ཀྱི་ཕྱག་ཁྱེར་དང་།གྲུབ་འབྲས་ཤོག་ལྷེ་འབུལ་སྐབས་ལོ་འདིར་རྒྱུགས་སྤྲོད་ཀྱི་རྩོད་སྐྱོར་བྲིས་གསུམ་གྱི་གྲུབ་འབྲས་ཨང་ཐོབ་ཁ་གསལ་སྒྲོག་སྦྱོང་གནང་བ་དང་།གཞན་ཡང་ཟུར་རྒྱུགས་འབུལ་མཁན་རྣམས་ལ་ཡང་སྐྱབས་རྗེ་མཁན་རིན་པོ་ཆེས་ཕྱག་ཁྱེར་གཟེངས་བསྟོད་དང་ཐུགས་རྗེ་ལེགས་འབུལ་ཞུས།
ལོ་འདིར་ཕྱག་ཁྱེར་དབུལ་ཡུལ་དགེ་བཤེས་ལྷ་རམས་ཞལ་གྲངས༢༠ ། དགེ་བཤེས་ཚོགས་རམས་པ་ཞལ་གྲངས་༨༠ ། གསང་སྔགས་རབ་འབྱམས་པ་ཞལ་གྲངས ༣༥ ། མཛོད་རབ་འབྱམས་པ་ཞལ་གྲངས ༨༣ ། འདུལ་བ་རབ་འབྱམས་པ་ཞལ་གྲངས ༡༢༥། དབུ་མ་རབ་འབྱམས་པ་ཞལ་གྲངས ༡༢༩། ཕར་ཕྱིན་རབ་འབྱམས་པ་ཞལ་གྲངས ༡༢༡ ། ཟུར་རྒྱུགས་ལེགས་བཤད་སྙིང་པོ་འབུལ་མཁན་གྲངས ༣༢ ། འགྲེལ་པ་དོན་གསལ་འབུལ་མཁན་ཞལ་གྲངས་༨ ། གཞན་ཡང་རྒྱན་འཇུག་གཉིས་དང་རྩ་བ་སོ་སོ་འབུལ་མཁན་ཞལ་གྲངས་གང་མང་བྱུང་ཡོད་པ་རྣམས་ལ་གཟེངས་བསྟོད་ཕྱག་ཁྱེར་ཕུལ་གྲུབ་རྗེས་མཛད་སྒོ་རྒྱལ་ཁའི་གྲོལ།
ལོ་འདིའི་རྒྱུགས་སྤྲོད་ཚོགས་ཆུང་ངམ་རྒྱུགས་སྤྲོད་དོ་དམ་པའི་འགན་དངོས་སུ་འཁུར་མཁན་ནི་ཕ་ར་དགེ་བཤེས་ལྷ་རམས་པ་དགེ་འདུན་ཆོས་འཕེལ། ཕུ་ཁང་དགེ་བཤེས་ལྷ་རམས་པ་བྱམས་པ་ཆོས་འཕེལ། ཉག་རེ་དགེ་བཤེས་ལྷ་རམས་པ་ཚེ་རིང་ཉི་མ། ཏྲེ་ཧོར་དགེ་བཤེས་ལྷ་རམས་པ་བློ་བཟང་རབ་རྒྱས། གོ་བོ་དགེ་བཤེས་ལྷ་རམས་པ་རྒྱ་ཐར། སྤོམ་ར་དགེ་བཤེས་ལྷ་རམས་པ་བློ་བཟང་རྒྱ་མཚོ། ཏྲེ་ཧོར་དགེ་བཤེས་ལྷ་རམས་པ་འཕྲིན་ལས། ཕུ་ཁང་དགེ་བཤེས་ལྷ་རམས་པ་ཐུབ་བསྟན་དངོས་སྒྲུབ། ཉག་རེ་དགེ་བཤེས་ལྷ་རམས་པ་ཐུབ་བསྟན་གྲགས་པ་དང་། ཕྱག་རོགས་ཏྲེ་ཧོར་དགེ་བཤེས་ཚེ་རྡོ་སོགས་ཀྱིས་རྒྱུགས་སྤྲོད་ཀྱི་སྔ་བར་ཕྱི་གསུམ་ལ་བྱེད་སྒོ་ཆེ་ཕྲ་ཆུང་གསུམ་ཀུན་གྱི་ལས་དོན་གང་ཡོད་ཐུགས་འགན་ཤིན་ཏུ་ནས་ལེགས་པོར་བཞེས་པའི་དྲིན་ལས་རྒྱུགས་སྤྲོད་དོ་ནན་པོ་དང་ཚགས་ཚུད་པོ་བྱུང་ཡོད་པ་བཅས་སོ།
