སྐྱབས་རྗེ་རྒྱུད་སྨད་མཁན་ཟུར་རིན་པོ་ཆེ་རྗེ་བཙུན་མཐུ་སྟོབས་མགོན་པོ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པ་ཡིད་སྐྱོའི་གནས་ཚུལ་ཐོན་པར་མྱ་ངན་གུས་འདུད་ཞུ།
སྐྱབས་རྗེ་རྒྱུད་སྨད་མཁན་ཟུར་རིན་པོ་ཆེ་རྗེ་བཙུན་མཐུ་སྟོབས་མགོན་པོ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པ་ཡིད་སྐྱོའི་གནས་ཚུལ་ཐོན་པར་མྱ་ངན་གུས་འདུད་ཞུ།
༄༅། །བསྟན་པའི་གསལ་བྱེད་དམ་པ་སྐྱབས་རྗེ་རྒྱུད་སྨད་མཁན་ཟུར་རིན་པོ་ཆེ་མཆོག་མདང་དགོང་ཕྱག་ཚོད་བཅུ་གཉིས་ཐོག་གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་ཕྱིར་རེ་ཞིག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པ་ཤིན་ཏུ་ཡིད་སྐྱོའི་གནས་ཚུལ་ཐོས་པར།
གདན་ས་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་མཁན་བླ་འདུས་མང་ཡོངས་ནས་སྐྱེས་ཆེན་དམ་པ་ཁོང་གི་༸སྤྱི་ནོར་༸གོང་༸སྐྱབས་མགོན་ཆེན་མཆོག་གི་བཀའ་དགོངས་ཇི་བཞིན་སྐུ་ཚེ་ཧྲིལ་པོ་བསྟན་འགྲོའི་སླད་དུ་གཞན་ཕན་བྱང་ཆུབ་སེམས་དཔའི་སྤྱོད་པ་ཁོ་ནས་དུས་འདའ་ཞིང་། འཆད་རྩོད་རྩོམ་གསུམ་སོགས་མཁས་པའི་བྱ་བ་རྣམ་གསུམ་གྱི་སྒོ་ནས་བསྟན་པ་འཛིན་སྐྱོང་སྤེལ་གསུམ་མཛད་པའི་རླབས་ཆེན་གྱི་མཛད་བཟང་དག་གི་བཀའ་དྲིན་རྣམས་རྗེས་སུ་དྲན་པའི་ཐོག་གདུང་ཤུགས་དྲག་པོས་ཡིད་སྐྱོའི་མྱ་ངན་གུས་འདུད་ཞུ་རྒྱུ་དང་།
ཤུལ་ལུས་ཕྱོགས་མཐའ་གང་སར་བཞུགས་པའི་དད་ལྡན་སློབ་མ་སྐྱ་སེར་ཕོ་མོ་ཡོངས་ལ་གདུང་སེམས་མཉམ་བསྐྱེད་ཀྱིས་ཐུགས་གསོའི་འཚམས་འདྲི་ཞུ་བ་དང་ཆབས་ཅིག དམ་པ་གང་གི་རླབས་ཆེན་ཟག་མེད་ཐུགས་ཀྱི་དགོངས་པ་ཟབ་མོ་རྣམས་ཡོངས་སུ་རྫོགས་ཏེ་སླར་ཡང་འཕགས་མཆོག་ཕྱག་ན་པདྨོའི་གདུལ་ཞིང་བོད་ཁ་བ་གངས་ཅན་པའི་བསྟན་འགྲོའི་མགོན་དཔུང་དུ་མཁས་བཙུན་བཟང་གསུམ་ལྡན་པའི་ཡང་སྲིད་འཁྲུལ་བྲལ་མྱུར་དུ་བྱོན་ནས་གོང་མའི་རྣམ་མཐར་གཙང་མ་བདག་གིར་བཞེས་ཐུབ་པའི་སྨོན་འདུན་ཤུགས་དྲག་དང་བཅས།
འབྲས་སྤུངས་བློ་གསལ་གླིང་གྲྭ་ཚང་ནས།
ཕྱི་ལོ་ ༢༠༢༢ ཟླ་བ་ ༣ ཚེས་ ༦ ཉིན
