༄༅། །རྒྱ་གར་དབུས་གཞུང་གྲོས་ཚོགས་གོང་མའི་ཚོགས་མི་དང་བོད་དོན་རྒྱབ་སྐྱོར་ཚོགས་གཙོ་སྐུ་ཞབས་Sujeet Kumar མཆོག་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཏུ་འཚམས་གཟིགས་ལ་ཕེབས་པ།

  རྒྱ་གར་དབུས་གཞུང་གྲོས་ཚོགས་གོང་མའི་ཚོགས་མི་དང་བོད་དོན་རྒྱབ་སྐྱོར་ཚོགས་གཙོ་སྐུ་ཞབས་Sujeet Kumar མཆོག་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཏུ་ཕྱི་ལོ་ ༢༠༢༢ ཟླ་བ་༥་ཚེས་༡༥ ནས་ཚེས་ ༡༩ བར་ཉིན་གྲངས་ལྔའི་རིང་བོད་མིའི་གཞིས་ཆགས་སུ་འཚམས་གཟིགས་བསྐྱང་རྒྱུ་གཏན་འཁེལ་བ་ལྟར། ཕྱི་ཚེས་༡༧ ཉིན་མོན་གྷོར་འབྱོར། ཕྱི་ཚེས་ ༡༨ སྔ་དྲོར་ཆུ་ཚོད་ ༩ པའི་ཐོག་དམག་ཟུར་དྲན་རྟེན་མཆོད་རྟེན་མདུན་ཚོགས་བཅར་ཞུས་པ་དང་། ཆུ་ཚོད་༡༠ པའི་ཐོག་འབྲས་སྤུངས་བློ་གསལ་གླིང་དུ་འཚམས་གཟིགས་ལ་ཕེབས་པ་ལྟར། ལྷོ་སྤྱི་སྐུ་ངོ་འཇིགས་མེད་ཚུལ་ཁྲིམས་མཆོག་དང་། མོན་གྷོ་ས་གནས་གཞིས་འགོ་མཆོག ༧སྐྱབས་རྗེ་བློ་གླིང་མཁན་རིན་པོ་ཆེ་རྗེ་བཙུན་བློ་བཟང་བསམ་གཏན་མཆོག་དང་། བློ་གླིང་ཕྱག་མཛོད་ཁྲི་པ་དགེ་བཤེས་འཇམ་དབྱངས་དབང་ཕྱུག་མཆོག་གཙོས་ཕྱག་མཛོད་རྣམ་པས་སྣེ་ལེན་གཟབ་རྒྱས་ངང་བློ་གླིང་གཙུག་ལག་ཁང་གི་རྟེན་གསུམ་རྣམས་ལ་གནས་མཇལ་གྲུབ་མཚམས་བློ་གླིང་རབ་གསལ་ཁང་དུ་གསོལ་ཇ་བཞེས་ཏོག་འདེགས་འབུལ་དང་། ༧སྐྱབས་རྗེ་མཁན་རིན་པོ་ཆེ་མཆོག་དང་ལྷན་དུ་བོད་དོན་དང་གཞིས་ཆགས། གྲྭ་ཚང་གི་སྐོར་བཀའ་མོལ་ལྷུག་པོར་གནང་། གྲྭ་ཚང་གི་ཐོག་ནས་ཐུགས་རྗེ་ལེགས་གསོལ་མཚོན་བྱེད་དུ་ཚེ་ལྷ་རྣམ་གསུམ་གྱི་ཞལ་ཐང་ཞིག་ཀྱང་འབུལ་བར་བྱས། དེ་ནས་གྲྭ་ཚང་གི་ཆོས་རར་སློབ་གཉེར་བ་དགེ་འདུན་པ་རྣམས་ཀྱིས་རྩོད་གྲྭ་ལ་གཟིགས་སྐོར་ཕེབས་པ་དང་། སྒོ་མང་གྲྭ་ཚང་ལ་འཚམས་གཟིགས་ཕེབས། ཆུ་ཚོད་ ༡༢ ཐོག་བློ་གླིང་སྒོམ་སྒྲུབ་ཚན་རིག་བསྟི་གནས་ཁང་དུ་གསོལ་ཚིགས་གཟབ་རྒྱས་འབུལ་བ་དང་། ཚན་རིག་ཟབ་སྦྱོང་ལ་ཕེབས་པའི་སློབ་མ་དགེ་བཙུན་རྣམས་ཀྱི་ཟབ་སྦྱོང་འཛིན་གྲྭ་སོ་སོར་གཟིགས་རྟོག་སོགས་གནང་ཡོད་པ་རེད། དེ་ནས་དགོན་སྡེ་ཁག་དང་། སློབ་གྲྭ། ས་གནས་འཕྲོད་བསྟེན་སྨན་ཁང་སོགས་ལ་འཚམས་གཟིགས་ཕེབས་པ་དང་། གཞིས་ཆགས་མི་མང་ལ་བཀའ་སློབ་སྩལ་རྒྱུ་ཡིན་པ་རེད།