༄༅། །དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གི་ཁྲིམས་བདག་དགེ་བསྐོས་སམ་འབྲས་སྤུངས་ཚོགས་ཆེན་ཞལ་ངོ་ཁྲི་སྟོན་མཛད་སྒོ་གནང་བ། དཔལ་ལྡན་འབྲས་སྤུངས་ཚོགས་ཆེན་ཞལ་ངོའམ་མཁས་མང་བློ་གསལ་བྱེ་བའི་གྲྭ་ཚང་གི་ཁྲིམས་བདག་དགེ་བསྐོས་རྙིང་པ་ཕུ་ཁང་དགེ་བཤེས་ལྷ་རམས་པ་བློ་བཟང་ཉི་མ་མཆོག་དགེ་བསྐོས་ལོ་གཅིག་གི་ཕྱག་འགན་བཞེས་པའི་ལས་ཡུན་གྲུབ་སྟེ། འབྲས་སྤུངས་ཚོགས་ཆེན་ཞལ་ངོའམ་དགེ་བསྐོས་གསར་པ་ཕུ་ཁང་དགེ་བཤེས་ལྷ་རམས་པ་ཐུབ་བསྟན་དངོས་སྒྲུབ་མཆོག་དགེ་བསྐོས་གསར་པའི་ཁྲི་སྟོན་མཛད་སྒོ་བྱས།
དེ་ཡང་བོད་རྒྱལ་ལོ ༢༡༤༩ ཟླ་བ ༦ པའི་ཚེས ་ ༢༨ ཕྱི་ལོ་༢༠༢༢ ཟླ་བ་༨ཚེས་ ༢༥ ཉིན་གྱི་སྔ་དྲོར་དཔལ་ལྡན་ཁྲིམས་བདག་དགེ་བསྐོས་གསར་པ་དགེ་བཤེས་ཐུབ་བསྟན་དངོས་གྲུབ་མཆོག་ཕུ་ཁང་ཁམས་ཚན་ཚོགས་ཁང་གསར་པའི་ནང་ཁམས་ཚན་ཉེར་ལྔའི་ཁམས་རྒན་རྣམས་ཀྱིས་སྤོས་སྣེ་དང་བཅས་ཚོགས་ཁང་དུ་གདན་དྲངས་ཏེ་རྟེན་གསུམ་ཁག་ལ་མཇལ་དར་སྒྲོན་འབུལ་དང་། དཔལ་ལྡན་ཡོན་ཏན་མ་སོགས་ཞལ་འདོན་གནང་བ་སོགས་མཛད་སྒོ་གྲུབ་པ་དང་།
སླར་ཡང་ཁམས་རྒན་རྣམས་ཀྱིས་སྤོས་སྣེ་དང་བཅསགྲྭ་ཚང་གི་གཙུག་ལག་ཁང་དུ་གདན་དྲངས་ཏེ་ཐོར་འབྲུ་མེ་ཏོག་སོགས་ཐོར་བ་སོགས་གདོང་གྲལ་དཀྱིལ་ནས་ཕྱག་འབུལ་བྱས་རྗེས་༧རྒྱལ་བའི་སྐུ་པར་མཐོང་གྲོལ་རིན་པོ་ཆེ་ལ་རྟེན་གསུམ་མཇལ་དར་དང་རྟེན་གསུམ་རྣམས་ལ་སྙན་ཤལ་སོགས་ཀྱིས་མཆོད་སྤྲིན་བཏེགས་ཏེ་ཁྲིའི་སྟེང་དུ་འཁོད་གྲུབ།དེ་ནས་དབུ་མཛད་ཀྱིས་ཞལ་འདོན་དགའ་ལྡན་ལྷ་བརྒྱ་མ་དང་།ཤེར་སྙིང་།དཔལ་ལྡན་ཡོན་ཏན་མ།བཀྲ་ཤིས་སོགས་དབུ་སྐུལ་གནང་བ་དང་འབྲེལ་གསོལ་ཇ་དང་འབྲས་སིལ་འདེགས་པར་བྱས་ཏེ་ཞལ་འདོན་གྲུབ་མཚམས་གྲྭ་ཚང་རང་གི་ཕྱག་མཛོད་ཁྲི་པ་དགེ་བཤེས་བློ་བཟང་ཟླ་བ་མཆོག་དང་།དབུ་མཛད་དགེ་བཤེས་གཙུག་ལག་རྒྱ་མཚོ་མཆོག།ཕུ་ཁང་ཁམས་ཚན་གྱི་སྤྱི་རྒན།ཁམས་ཚན་ཉེར་ལྔའི་ཁམས་རྒན་རྣམས་ཀྱིས་ཁྲིམས་བདག་དགེ་བསྐོས་གསར་པ་མཆོག་ལ་རིམ་གྱིས་བཀྲ་ཤིས་དར་དཀར་འབུལ་བ་སོགས་མཛད་སྒོ་གྲུབ་རྗེས།དཔལ་ལྡན་འབྲས་བློ་གླིང་གྲྭ་ཚང་ནས་ཞོགས་ཚོགས་འཁར་རྔ་བརྡུང་བ་དང་དགེ་འདུན་པ་རྣམས་ཚོགས་ཞུགས་གྲུབ་རྗེས་ཁྲིམས་བདག་དགེ་བསྐོས་གསར་པ་ཚོགས་སུ་ཕེབས་ཏེ་སྔར་རྒྱུན་ལྟར་ཕྱག་ལེན་གནང་།
ཕྱི་ལོ་ ༢༠༢༢ ལོའི་ཟླ་བ་ ༦ ཚེས་ ༣༠ ཉིན་འབྲས་སྤུངས་ཞོ་སྟོན་ཡིན་པས་དཔལ་ལྡན་འབྲས་སྤུངས་ཚོགས་ཆེན་ཞལ་ངོ་བརྗེ་ལེན་གྱི་དུས་ཚོད་འཁེལ་ཡོད་པ་རེད། སྒོ་བློ་གྲྭ་ཚང་གཉིས་ཀྱི་སྔར་སྲོལ་བཞིན་འབྲས་སྤུངས་ཞོ་སྟོན་ཉིན་མོར་གདན་ས་ཆེན་པོ་དཔལ་ལྡན་འབྲས་དཀར་སྤུངས་པའི་གླིང་གི་དགེ་བསྐོས་གཉིས་གསར་རྙིང་བརྗེ་གནང་གི་ཡོད་ཅིང་། དེ་རིང་ཞོགས་པའི་ཆུ་ཚོད་༤ /༣༠ཐོག་འབྲས་སྤུངས་ཚོགས་ཆེན་དབུ་མཛད་དང་། བླ་མ་གཞུང་ལེན་པ་ཏྲེ་ཧོར་དགེ་བཤེས་ཆོས་འཕེལ། བླ་སྤྱིའི་ཕྱག་མཛོད་ཏྲེ་ཧོར་དགེ་བཤེས་ཡོན་ཏན་ཕུན་ཚོགས་མཆོག་དང་། གུང་རི་དགེ་བཤེས་བློ་བཟང་སངས་རྒྱས། གྲྭ་ཚང་གཉིས་ཀྱི་ཕྱག་མཛོད་ཁྲི་པ་གཉིས་དང་། ཁམས་ཚན་རྒན་རྣམས་སྤོས་སྣེ་དང་བཅས་དགེ་བསྐོས་གཉིས་པོ་འབྲས་སྤུངས་ཚོགས་ཆེན་གྱི་གཙུག་ལག་ཁང་གི་སྒོ་ཆེན་ཕྱེས་ནས་ནང་དུ་ཕེབས།ཐུགས་སྨོན་མཚམས་སྦྱོར་དང་འབྲེལ་ནས་ཐོར་འབྲུ་མཆོད་ཅིང་དབུས་ཀྱི་གདོང་གྲལ་ནས་ཕེབས་ཏེ་༧རྒྱལ་བའི་སྐུ་པར་མཐོང་གྲོལ་རིན་པོ་ཆེ་ལ་མཇར་དར་དང་།རྟེན་གསུམ་རྣམས་ལ་མཇལ་དར་སྒྲོན་འབུལ་བྱས་ཏེ་བཞུགས་གྲལ་དུ་འཁོད་མཚམས་དབུ་མཛད་ཀྱིས་དགའ་ལྡན་ལྷ་བརྒྱ་དང་།འཇམ་དབྱངས་ཆོས་རྗེ་གསོལ་འདེབས།དཔལ་ལྡན་ཡོན་ཏན་མ་སོགས་ཞལ་འདོན་གྲུབ་པ་དང་།དགེ་བསྐོས་རྙིང་པ་གཉིས་ཀྱིས་འཁར་རྔ་དང་།ཆོས་དུང་།ལྕགས་རྒྱུག་བཅས་རྩིས་འབུལ་སོགས་བྱས་ཏེ་མཛད་སྒོ་གྲུབ།དེ་ནས་ཚོགས་བརྡ་ཕུལ་བ་དང་གྲྭ་མང་རྣམས་ཚོགས་ཞུགས་གྲུབ་རྗེས་དགེ་བསྐོས་གསར་པ་གཉིས་ཀྱིས་ཚོགས་སུ་སྔར་རྒྱུན་ལྟར་ཕྱག་བཞེས་གནང་དགོས།ཚོགས་གྲོལ་རྗེས་བླ་སྤྱིའི་ཡང་ཐོག་ཏུ་འབྲས་སྤུངས་ཁྲི་པ་རིན་པོ་ཆེ་བློ་གླིང་མཁན་ཟུར་རྗེ་བཙུན་དཀོན་མཆོག་དཔག་བསམ་དབུས་གྲྭ་ཚང་ཁག་གི་མཁན་ལས་ཟུར་དང་།སྒོ་བློ་གཉིས་ཀྱི་ཕྱག་མཛོད་ཁྲི་པ་གཉིས།དབུ་མཛད།དགེ་བསྐོས་གསར་རྙིང་གཉིས།ཆབ་རིབ་དང་ཆབ་གཡོག་སོགས་ལས་ཆེ་གྲས་ཁག་ཞོ་འབྲས་མར་ཁུའི་གསོལ་ཞིག་ཀྱང་འབུལ་མ་ཟད།ཁོང་རྣམས་ལ་ཉིན་གུང་བཞེས་ལག་དཀར་ཟས་ཤིག་ཀྱང་འབུལ་སྲོལ་མཆིས།དེ་ནས་གྲྭ་མང་རྣམས་དགེ་བསྐོས་གསར་རྙིང་ལ་རྟེན་འབྲེལ་མཇལ་དར་དང་ཐུགས་རྗེ་ལེགས་གསོལ་འབུལ་སར་ཕེབས་པར་མཛད།
༧རྒྱལ་དབང་ལྔ་པ་ཆེན་པོས་གསོལ་སྩལ་མཛད་པའི་བཅའ་ཡིག་རིན་པོ་ཆེ་བླང་དོར་ཀུན་གསལ་མེ་ལོང་།ཞེས་པ་བོད་ཚེས་བརྒྱད་ཉིན་ཚོགས་ལངས་སྐབས་དགེ་བསྐོས་རྙིང་པ་གཉིས་ཀྱིས་གསར་པ་ལ་གཉིས་ལ་རྩིས་འབུལ་གནང་དགོས་པ་ཡིན།བཅའ་ཡིག་འདི་ནི་གདན་ས་འདི་པའི་གལ་ཆེན་བཅའ་ཡིག་ཅིག་ཡིན་ཞིང་།འདི་ཉིད་གཙོ་བཟུང་གིས་སྒྲིག་ཁྲིམས་ལག་བསྟར་གནང་དགོས་ཀྱི་ཡོད།བོད་དུ་ཚོགས་ཆེན་ཞལ་ངོ་གཉིས་པོ་གཞུང་གི་གོ་ཐོབ་ཡོད་པས་གཞུང་འབྲེལ་གྱི་ཕྱག་དམ་ཕེབས་ནས་གཞུང་གི་ལས་སྣེ་གྲས་སུ་འཇོག་གི་ཡོད་རུང་།བཙན་བྱོལ་དུ་སླེབས་རྗེས་སྔ་སྲོལ་དེ་ཚོ་མི་དགོས་པར་བྱས་ཐོག་ཚོགས་ཆེན་ཞལ་ངོ་དང་གྲྭ་ཚང་གི་དགེ་སྐོས་ལོགས་སུ་མི་དགོས་པར་བྱས་ཏེ་དུས་ཡུན་ལོ་གཅིག་གི་རིང་གྲྭ་ཚང་སྒོ་བློ་གཉིས་ཀྱི་དགེ་སྐོས་རྣམ་གཉིས་ནས་ཚོགས་ཆེན་ཞལ་ངོའི་འགན་གཅིག་ལྕོགས་ཀྱིས་ཁུར་གནང་རྒྱུ་བྱས་འདུག།དགེ་སྐོས་རྣམ་གཉིས་ནི་དགོན་འདིའི་འགན་དབང་ཆེ་ཤོས་ཡིན་པས་གདན་སར་ཞུགས་པའི་སྐྱེ་བོ་སུ་ཞིག་ཡིན་རུང་ཁོང་རྣམ་གཉིས་ཀྱི་སྒྲིག་ཁྲིམས་འོག་ཏུ་མ་འཚུད་པ་མེད།དུས་རྒྱུན་གདན་སའི་ཁ་རྒྱུན་དུ་ཁྲིམས་བདག་དགེ་སྐོས་ཞེས་གསུང་སྲོལ་ཡོད་པ་བཞིན་ཁོང་གཉིས་པོས་དགེ་འདུན་པ་ལྔ་སྟོང་ལྷག་ལ་གདན་སའི་ཁྲིམས་སྒྲིག་ཡོད་ཚེ་འགན་ལེན་གྱིས་ལག་ལྟར་བྱེད་དགོས་པས་ཆེས་དཀའ་ཚེགས་ཆེ་བ་ཞིག་ཀྱང་ཡིན། གྲྭ་མང་གིས་འོས་བསྡུ་ལམ་བསྐོས་ན་དགོངས་པ་ཡང་ཞུ་ས་མི་རྙེད་པ་ཞིག་ཡིན་ནོ།།
